Luka 9

1Akawaitanga wala ikumi na weri hamwe, akawainga zinya na luidimo wanga ya maluhungu mose, na kuhodjwa ndwari. 2Akawatuma kuutindia ufumwa wa Izuwa, na kuhodjwa wewadjua. 3Akawawurra, Musitike kindu cha nzieni, nete isibo, nete kikuchu, nete ibumunda, nete fetha, nete musioke na kanzu mbiri. 4Na nyumba yose muingia, aha muikae, aha mufume. 5Na wose wesimtigha unywi, mukifuma kiongo kila mukutekute purughushe ya maghu menyu hena kuwondja kwawo. 6Wakatonga, wakajunguluka viongo, wekitinda Sumu Yedi, na wekihodja wandu handu hose.

7Herode tetrarko akavisikia vyose viokie: akarighiwa amu ya kuteta kwa wandu, Yohana awuka ghati ya wefwie; 8na wengi, Eliya awonwa; na wengi, Mroti mwe wawo wa kae atewuka. 9Akaghamba Herode, Yohana namchwa mtwi mi; niani uu mwenye mburi najisikia? Akaenda ambone.

10Na wekinahunduke wasu, wakamtindia vyose weviarehe: akawatika akatonga hena ngiliwata mtano kiongo kiitangwa Betsaida. 11Na matorano wekinatisiwe wakamratera: akawatigha akateta nawo vindu vya ufumwa wa Izuwa, nawo wekundie kuhoa, akawahodja. 12Mtano hakawoka kuswa, wakaza wala ikumi na weri, wakamburra, Uwasame matorano, watonge hena viongo vijunguluke na miteme, wawone maikao na vidjo, amu aha tuoho ni shighati. 13Akawawurra, Waingeni unywi wale. Wakaghamba, Totuna kindu nde mabumunda masano na nguluma mbiri, isiteoke tutonge tuwazorie wandu awa wose kidjo. 14Amu weokie sa wome maghana makumi masano. Akawawurra waanalosha wakwe, Waikajeni wandu hena siri sa makumi masano hena makumi masano. 15Wakaareha huwo wakawaikaja wose. 16Akamauha mabumunda masano na nguluma mbiri, akayoa wanga Izuwa, akamatasia, akamabaa, akawainga waanalosha kuwaingijia matorano. 17Wakala wakaighuta wose: vikatikwa vishigajike vibengeru vya mabumunda mbinda ikumi na mbiri.

18Ikaoka ekinaombe mwenye, waanalosha wakwe weokie hamwe naye; akawawujanya ekiteta, Matorano wenitaa kuoka ani? 19Wakatalua wakaghamba, Yohana Mbatizaji; na wengi, Eliya; na wengi, ti mroti mwe wawo wa kae atewuka. 20Akawawurra, Na unywi muniitaa kuoka ani? Petro akatalua akaghamba, Masihi wa Izuwa. 21Naye akawaaghanya akawawurra, wasimburre mundu kiteto iki, 22ekighamba, Yambe Mwana wa Adamu kurishwa wasi wingi na kusuwa ni waghosi na wakara wabaha na watama, na kukomwa, na musi wa katatu kuwuka. 23Akawawurra wose, Ula ekundie kuza nyuma yangu, akukanie ngoro yakwe, autike msalaba wakwe misi yose aniratere. 24Amu mundu ekikunda kukija ngoro yakwe eneitesha; naye ekiitesha ngoro yakwe hena lwangu, uu eneikija. 25Amu mbucha ani ya mundu ekiwona masanga mose, ekikutesha ngoro yakwe kana ekiitagha? 26Amu mundu ose ekigurwa ni soni hena lwangu na lwa viteto vyangu, Mwana wa Adamu enegurwa ni soni hena lwakwe uu, eneikaeze na ubaha wakwe, nawo wa Apa, nawo wa malaika washenete. 27Namburra hena kididi, weoho weimuka aha, tewenewona kifwa mtano weneikawawone ufumwa wa Izuwa.

28Ikaoka kutera kwa viteto ivi sa misi minane, akawatika Petro na Yohana na Yakobo, akakwea nduwini kuomba. 29Ikaoka ekinaombe, fwana ya wusho wakwe ikaoka ingi, na suke jakwe jikaoka nyewa, jikaakaka. 30Weokie na wandu weri wekiteta naye, 31niwo Musa na Eliya, wefumie na kirami wakakutetea kufwa kwakwe enekufisha ghati ya Yerusalemi. 32Petro nawo weoho naye wakagurwa muno ni luwohe: na wekinaoke kiawi, wakauwona uwedi wakwe, na wandu wala weri weimuke naye. 33Ikaoka, wekioka wekitana naye, Petro akamburra Yesu, Mzuri, ni kyedi uswi tuoke aha: tuarehe maanda matatu, imwe lako, imwe la Musa, imwe la Eliya; esitisiwe ekiteta. 34Naye ekinaoke ateta huwo, likaoka ijumbi, likawagera kiwuri; wakaituka wekioka weingia ijumbini. 35Ighonda likafuma ijumbi, likateta, Uu ni Mwana wangu, msawurwa wangu, msikieni. 36Na ighonda ili likinaoke, Yesu awonwa mwenye. Nawo wakahuja chwi, wasimburre mundu misi ila kiteto wekiwonie.

37Ikaoka musi wa keri, wekinasee nduwini, matorano meingi wakatorana naye. 38Mundu mwe wa matorano akaloza, ekiteta, Mlosha, nakuomba, myoe mwana wangu, amu ni mjenye wangu. 39Na yoa, luhungu lumgera, chwi aiya, lumbaja eking’ola mafuo, hena wukiwa lumshiga lukimketa viwiwi. 40Nikawaomba waanalosha wako, walukinye, nete wasiidime. 41Akatalua Yesu akaghamba, Unywi irika lisiitikije, lisirongeke, mtano rini nineoka na unywi, na kutikana na unywi. 42Mwete mwana wako aha. Ekioka eza luhungu lukamghusha, lukambaja viwiwi: Yesu akalubohia luhungu luwiwi, akamhodja mwana, akamhunduia wawee. 43Wakarighiwa muno wose hena zinya jakwe Izuwa.

Na wose wekioka werighiwa hena vindu vyose eviareha, akawawurra waanalosha wakwe, 44Gereni viteto ivi masikioni henyu, amu Mwana wa Adamu eneng’olwa mikonoi ha wandu. 45Kake tewetisiwe kiteto iki, kikaoka kiwiswe hawo, wesikitwarijwe; wakaondoka kumbujanya kiteto iki.

46Kukawaingia kuwujanyana, niani wawo eneoka mbaha. 47Naye Yesu ekinawone kuwujanyana kwa ngoro jawo, akauha kamwana, 48akamgera afuhi yakwe, akawawurra, Mundu ekimuhia kamwana aka hena izina langu, aniuhia mi; na mundu ekiniuhia mi, emuhie enitumie: amu eokie mdongo ghati yenyu wose, niye mbaha.

49Yohana akatalua akaghamba, Mzuri, twawona mundu ekinya maluhungu hena izina lako, tukamwima, amu teraterana na uswi. 50Akamburra Yesu, Musimwime, amu esioke wanga yenyu ni wa mbai yenyu.

51Ikaoke ikinafike misi ya kukwejwa kwakwe, mwenye akarongeja wusho kutonga Yerusalemi. 52Akatuma wasu msongorana wakwe; wakagura nzia wakaingia kiongo cha Wasamaria wamwarehie. 53Nete tawatighwa niwo, amu ya wusho wakwe wuokie kutonga Yerusalemi. 54Wekinawone waanalosha wakwe Yakobo na Yohana, wakaghamba, Mzuri, ukundie tuaghanye moto usee wanga kuwatesha hae? 55Akagharuka akawabohia. 56Wakagura nzia mtano kiongo kingi.

57Nawo wekioka wetonga nzieni, mundu emburra, Ninekuratera hose utongaho. 58Akamburra Yesu, Maging’a mena makongo, na ndeghe ja wanga jina vichanja, kake Mwana wa Adamu tena na ha kugera mtwi. 59Akamburra ungi, Niratare. Akaghamba, Mzuri, unishige ini nitonge nde nimjike apa wangu. 60Akamburra, Uwashige wefwie wajike wefwie wawo, kake we tonga uretindia ufumwa wa Izuwa. 61Akaghamba ungiwa, Ninekuratera, Mzuri, kake unishige ini nitonge nde niaghane na wa kaa hangu. 62Akamburra Yesu, Tehena mundu agera mkono kuima, ekiyoa nyumaye ewaye hena ufumwa wa Izuwa.

Currently Selected:

Luka 9: TAVETA

Highlight

Copy