Luka 10

1Ikuade Mzuri akasawura wengi makumi mafungate, akawatuma weri weri msongorana wa wusho wakwe kutonga kiongo chose, na handu enehatonga mwenye. 2Akawawurra, Mafindiko ni meingi, wahiri si weingiwo, amu ii muombeni Mzuri wa mafindiko, awone kuingija wahiri mafindikoni hakwe. 3Tongeni; yoeni, namtuma unywi sa madorome ghati ya mabau. 4Musitike mbinda, nete kikuchu, nete viratu, nete musimkezie mundu nzieni. 5Na nyumba yose muingia kuwoka ghambeni, Luworo nyumbeni uko. 6Na ekioho mwana wa luworo, luworo lwenyu lunemwikayia; kwakicha sihuwo, lunemuhunduia. 7Muikae nyumbeni uko, mukila na mukinywa vya vyawo, amu muhiri ni wedi wa kuingwa awahache yakwe. Musitonge nyumba hena nyumba. 8Na kiongo chose muingia, nawa wakamutigha unywi, vileni vila wamwingiiya: 9muwahodje wewadjua weohoho, muwawurre, Ufumwa wa Izuwa wamusongeria unywi. 10Na viongo vyose muviingia, wasimtigha unywi, mukifuma nzieni hakwe ghambeni, 11Mtano purughushe ghati ya kiongo chenyu yagurana na maghu metu, twamukukundia unywi, kake tisiweni ivi, ti Ufumwa wa Izuwa wamusongeria unywi. 12Namburra, Ineoka keba Sodoma musi ula kukela kiongo kila. 13Wukiwa wako, Korazin! Wukiwa wako, Betsaida! amu vindu vila viarehike henyu, idje viarehike ghati ya Turo na Sidona, idje wechwie muti kae, wekiikaa ghati ya masambo na maifu. 14Kake ineoka keba Turo na Sidona ghati ya kuchiliwa kukela henyu. 15Nawe Kapernaum, unekwejwa mtano wanga? unesejwa mtano Hades. 16Ula emusikia unywi enisikia mi: ula emudaa unywi enidaa mi: naye enidaa mi amdaa ula enitumie.

17Wakahunduka wala makumi mafungate hena kuizihirwa, wekiteta, Mzuri, mtano maluhungu matutumikia hena izina lako. 18Akawawurra, Nimbonie Shetani ekigwa sa kiremera kufuma wanga. 19Namuinga unywi zinya ja kuwata nyoka na kishushe, najo zinya jose ja maring’a; nete tehena kiteto kinembinya. 20Kake amu ii musiizihirwe, amu ya maluhungu memutumikia; kake izihirweni amu ya mazina menyu kutamwa wanga.

21Magheri mala akaizihirwa hena Ngoma Mshenete, Akaghamba, Nakuinga haika, Apa, Mzuri wa wanga na si, amu utewisa ivi hena wenye kucha na kutwarija, urewajughuia ngerengere: huwo, Apa, amu nihuwo kuizihira msongorana wako. 22Vindu vyose vigerwa hangu ni Apa wangu, nete tehena mundu etisiwe Mwana niani, nde Apa, nete Apa niani, nde Mwana, naye ekundie Mwana kumjughuia. 23Akawagharukia waanalosha hena ngiliwata akaghamba, Keba meso meviyoa vila muviyoa unywi. 24Amu namburra, Waroti weingi na wafumwa wekundie kuviwona vila miviyoa unywi, wasiviwone, na kuvisikia vila muvisikia unywi, wasivisikie.

25Mchili mwe akaimuka ekimghesha, akateta, Mlosha, niarehe kini niuhodje moo wa tendarasi? 26Akamburra, Ghati ya Kiteto vitamiwe vindu ani? 27Wasomeze? Naye akatalua akaghamba, Mkunde Mzuri Izuwa wako, hena ngoro yako yose, na hena ngoma yoko yose, na hena zinya jako jose, na hena kucha kwako kwose; na walatya wako sa we mwenye. 28Akamburra, Watalua nezo; keta huwo, nawe unekia. 29Naye ekikunda kukuarehia uwedi akamburra Yesu, Na walatya wangu ni ani? 30Yesu akatalua akaghamba, Heokie na mundu ekisea ghati ya Yerusalemi kutonga Yeriko; akagwa ghati ya wasoki wakauha suke jakwe, wakambinya, wakatonga, wakamshiga hadongo ya kufwa. 31Na akasea mkara mwe turu na nzia ila, akambona, akambetia mbai. 32Na Mlawi huwowa, ekinafike handu hala, akambona, akambetia mbai. 33Kake Msamaria mwe ekizoka akamzia, 34naye ekinambone, akamsaria, akamsongeria, akamchunga arata jakwe, ekigera mafuta na mawa; akamkweja wanga ya nyamao yakwe, akamwete hena nyumba ya wagheni, akamwaja. 35Na heyawo akang’ola denari mbiri, akamwinga mwenye nyumba, akaghamba, Muwaje, najo jose unejinig’olawa, nineikanihunduke ninekuiha. Wawoneze? 36Uhi wa awa watatu eokie walatya wakwe mwenye kuguyia ghati ya wasoki? 37Akaghamba, Niye emsarie. Akamburra Yesu, Tonga, nawe warehe huwo.

38Wekinaoke wekitonga akaingia kiongo kimwe, mche, izina lakwe Martha, akamtigha nyumbeni hakwe. 39Naye eokie na rumburie, eitangwa Maryamu, naye akaikaa si maghuni ha Yesu, akamsikija viteto vyakwe. 40Naye Martha ebighanika hena kuhira kuingi, akamzia, akaghamba, Mzuri touwona ti mundwetu anishigia ndima mwenye? 41Mburre anighenje. Akatalua Mzuri, akamburra, Martha, Martha, wala wasi na kubighanika hena vindu viingi: 42kake kindu kimwe chikundike: amu Maryamu asawura ngata yakwe yedi, nete isikawushijwa hakwe.

Currently Selected:

Luka 10: TAVETA

Highlight

Copy