Luka 8

1Ikaoka misi iraterane akajunguluka viongo na kaa, ekitinda na ekilia mburi jedi ja Ufumwa wa Izuwa, ye na wala ikumi na weri hamwe naye, 2na wache weokie wehodjijwe maluhungu mawiwi na ndwari, Maryamu eitangwa Magdalene, efumiwe ni maluhungu fungate, 3na Yoanna mche wa Kuza kirote chakwe Herode, na Susanna, na weingi wengi, wemwindia ghati ya mali mawo.

4Na matorano meingi wekinatorane, nawo wa viongo vyose wekimzia, akateta hena mfwanano, 5Mhandi efumie ahande mbeu jakwe, na ekioka ekihanda jingi jikagwa nzieni, jikawatwa, ndeghe ja wanga jikajila. 6Jingi jikagwa mabweni; jikamea, jikaoma amu ya kusowa mbombe. 7Jingi jikagwa ghati ya mivwa; mivwa ikamea hamwe najo, ikajidudura. 8Jingi jikagwa ghati ya teri yedi, jikamea, jikagera chwi ighana. Ekiteta ivi akaiya, Ula ena masikio ma kusikia asikie.

9Wakambujanya waanalosha wakwe, Mfwanano uu nikini? 10Akaghamba, Unywi muingiwe kutisiwa ngiliwata ja ufumwa wa Izuwa, na wengi hena mifwanano, nesa wekiwona wasiwone, na wekisikia wasitwarije. 11Na mfwanano ni uu. Mbeu ni kiteto cha Izuwa. 12Nawo wa nzieni niwo wesikia; niho eza Shetani, ekitike kiteto kila ngoroni hawo, wasiitikije nete wasikijwe. 13Nawo wa wanga ya mabwe niwo wesikia wekiuhia kiteto hena kuizihirwa; na awa tewena ikolo, hena hadongo waitikija, na magheri ma kugheshwa wakukemba. 14Najo jigwie ghati ya mivwa, awa niwo wesikia, nawo wekitonga wekidudurwa ni wukiwa na mali, na sola ya moo, wasifishe kugera ndunda. 15Najo ja teri yedi niwo, ghati ya ngoro yedi na ya kididi wesikia kiteto, wekigura, wekigera ndunda hena lugumirio.

16Tehena ewasha taa ekiifinikira na kizembe, kana ekiigera wusini, kake aigera wanga ya kindu cha taa, wandu weingia wawone kyangaji. 17Amu tehena kindu kifinikirwa kisineoka mwaji, nete kiwiswe kisinetisiwika ikuade na kisinewonwa raa. 18Huwo yoeni muvisikia, amu ula ena eneingwa; na ula esina, mtano kila agheshijia ekihete, kineuhwa hakwe.

19Wakamzia mee na wandwawo, wasiidime kumfikia hena wandu kuoka weingi. 20Akawurrwa, Mamako na wandwenyu weimuke shighati, wekundie kukuwona. 21Naye akatalua akawawurra, Iya wangu na wandwetu niwo awa, wesikie kiteto cha Izuwa, wekikigura.

22Ikaoka musi mwe akaingia ngalaweni ye na waanalosha wakwe, akawawurra, Tukele sela ya keri ya ndiwa. Wakafuma kiwambara. 23Nawo wekitonga hena matanga akagurwa ni luwohe. Ikasea ngungu ndiweni, wakaizujwa ni mbombe, wekioka na ndenga. 24Wakamzia wakambusha, wekiteta, Mzuri, mzuri, twafwa. Akawuka akaibohia ngungu na visibwe vya mbombe, ikahuja chwi. 25Akawawurra, Luitikijo lwenyu luohi? Wakaingiwa ni fole wakarighiwa, wekitetana, Niani uu? Amu aaghanya mtano ngungu na mbombe, najo jamwinga isikio.

26Wakafika kiwambara cha isanga la Wageraseni, mbai ya Galilaya. 27Naye ekinasee kiwambara, mundu mwe atorana naye ekifuma kiongoni, eokie na luhungu, misi miingi asidoke suke, nete kuikaa nyumbeni, nde mbireni. 28Ekinambone Yesu akaloza, akamguia, akaghamba hena ighonda ibaha, Nina kini nawe, Yesu Mwana wa Izuwa eoho wanga? 29Nakuomba usinirishe wasi. Amu emwaghanyie luhungu lula luwiwi afume ghati ya mundu. Amu kandu keingi lumgura; akarindwa ekichungwa minyororo na menya; akabaa machungo, akakinywa ni luhungu mashighati. 30Yesu akambujanya ekiteta, Izina lako niani? Akaghamba, Legioni, amu maluhungu memwingie meingi. 31Wakamsemba asiwaaghanye kufuma kutonga iwongoni. 32Heokie na ifio la nguwe nyingi jikirishwa nduwini; wakamsemba awashige wawaingie woo. 33Akawashiga. Maluhungu makafuma ghati ya mundu, makawaingia nguwe; ifio likateremkia ghati ya nduwi mtano ndiweni, wakanyamarikiwa. 34Nawo warisha wekinawone vindu viokie, wakamatuka wakalia mburi kiongoni na mitemeni. 35Wakafuma kuviwona vindu viokie. Wakafika ha Yesu, wakambona mundu efumiwe ni maluhungu ekiikaa, adoka suke, acha, maghuni ha Isa; wakaituka. 36Nawo wewonie wakawatindia, ula eokie na maluhungu sandu ehodjijwe. 37Wandu wose wa mbai ya Wageraseni wakamuomba awafumie; amu wegurwa ni fole mbaha: akaingia ngalaweni akahunduka. 38Akamsemba mundu ula efumiwe ni maluhungu, aoke hamwe naye: 39akamkinya, ekiteta, Hunduka nyumbeni hako, utinde vibaha ani Izuwa akuarehie. Akatonga ekitinda ghati ya kiongo chose vibaha ani Yesu amwarehie.

40Ekinahunduke Yesu, matorano wakamtigha, amu wose weokie wekimyoyia. 41Aho heokie na mundu, izina lakwe Yairo, naye eokie mbaha wa sunagogi, akagwa maghuni ha Yesu, akamsemba aingie nyumbeni hakwe: 42amu eokie na mwana wa kibora mjenye wa miaka ikumi na miri, na uu eokie ekifwa. Na ekioka ekitonga wandu wakamdudura.

43Na mche, eokie na kufuma sakame too miaka ikumi na miri, ekioka eking’ola mali makwe mose ekiwaiha waghanga, esiwone kuhodjwa ni mundu ose, 44akamzia hena nyuma, akamkuwara lutiriwo lwa suke yakwe; chwi kufuma kwa sakame kwakwe kukaoma. 45Yesu akaghamba, Niani anikuwara? Wekinakane wose, Petro akaghamba, nawo weoho naye, Mzuri, matorano wakujunguluka wakududura. 46Yesu akaghamba, Mundu anikuwara, amu natisiwa ti zinya janifuma. 47Ekinawone mche ula tekiwisika, akaza ekidedema, akamguia, akamtindia msongorana wa wandu wose hena kini amkuwariyia na sandu akijwa chwi ila. 48Akamburra, Mwana, luitikijo lwako lwakukija; tonga na kiboha.

49Ekinaoke ekiteta eza mundu efumie hakwe mbaha wa sunagogi, ekiteta, Aidiwa kufwa mwana wako usimrishe wukiwa mlosha. 50Ekinasikie Yesu akamtalua, Usiituke, itikija tiki, naye enehodjwa. 51Ekinaze nyumbeni temshiga mundu kuingia naye, nde Petro na Yakobo na Yohana, na wawee mbora na mee. 52Wakaoka wose wekiiya, wekimlozia. Akaghamba, Musiiyie, amu tafwaye, ateshinjia luwohe. 53Wakamseka muno, wekitisiwa aidiwa kufwa. 54Naye akamgura mkono, akamwitanga, ekiteta, Mbora, wuka! 55Ikahunduka ngoma yakwe, akaimuka chwi; akaaghanya iti aingwe kidjo. 56Wakarighiwa muno wambona wakwe: akawaaghanya wasimburre mundu kiteto cheokie.

Currently Selected:

Luka 8: TAVETA

Highlight

Copy