Luke 17
17
Iesu ve kileaki oharo uku
1Are areve kilea haela maeaeape, Hereavaki hoa iele kihorerakilai, aka ikihuru hela ehovea haela ve oki hereavaki la haela. 2Veveke, wheat hae haipepekaki have la haela ve karave heropakive, kai arero avavu iele paraeakive, are maria akore hekai hereavaki ave. 3E va kiva auhohi leila, ave apoheari aro haeae la leikilava, arero erereakive: are haeae ve ikihuru laleikilava, areve haeae hapururukaki. 4Are aro hare haroapo hoa 7 haeae laleikilava, kai hoa seven kara ikihuru lei aro la maeakilava, are iki le helari areve haeae hapururukaki.
5Aposetolo haela Amua maeape, Elave ikikekela lei aheke leikive. 6Amua erero kavale maeaeape, Eve ikikekela mustard hae ve aheke hovea la leikilava, e va ma lauka kora mari maeakilai, A hareai ahea ma ure ve epavakilai, are kai eve la oharo iapai lari leikilai.
7Aka, e v'ila kekele ihaki horova haela, aka mamoe kiva haela ila haela ae, are la horova haela oru ve kihoreraki la hoa arero mari maeakilai, Aula, eapai larive ha? 8Ka, are va arero mari maeakilai, Arave eapai karikikive, pura hahai arave eapai avikela, ara eapai ma ila oropa larilai, ave eapai i ma ila aireaki larilai. 9Are la horova haela thank you oharo maeakilai, ehovea are arero ape karava maeape la horova oharo are iapape ha? 10E kara laria, ero ape karava maeaeape la eharu oaria e va lailava, e va maeaki, Ela horova haela veveke havahu ka, ela leipe horova elaro ape karava maeaeape la horova hiki.
Iesu leper haela 10 lei makukuripe
11Iapai — Ere Jerusalem la okiharo pekahavape la hoa — ere Samaria i Galilee ila ve aru hihi auvahaeape. 12Are karikara ae pekape la hoa leper haela 10 arero koarape: 13Ere va arai ve epavi ara mari hape, Iesu, Amua, elaro hela ikiheheroe leikive. 14Are erero eavi mari maeaeape, Auila, eve maea oharo haela amoeaki. Ere auvahaeape la hoa ereve maea veveke le leivahaeape. 15Ere ve haela haroapo elare maea veveke leivila la eavi aire helari Aualari ve rare ara hai morapaeape. 16Are Iesu ve loa ipi ve ekaopi thank you oharo ape. Are va Samaria haela. 17Iesu arero kavale maeape, Haela 10 hareho veveke au leivahaeakiaue ha? 9 haela lahoa apearo ha? 18O iele haela oaria Aualari morapaeakive au ekekue ha, ma ita lahua haela hiki ha? 19Are arero maeape, Urou, elare oki aukive, ave ikikekela aro lei lamakurila.
Basileia ve ekeki hoa
20Pharisee haela arero velavela leivahaeape, Aualari ve basileia leahau ekekilai: are kai erero kavale maeaeape, Aualari ve basileia hihika ve ekeva ka. 21Ere kara mari maea va ka, Are ma, aka are la! Iapaila, Aualari ve basileia eve ureve aeave.
22Are areve kilea haela maeaeape, Hare ae kihorerakilai, e va haela ve Akore ve hoa hovea eavakive ikivere la leikilava, aka e va arero eava va ka. 23Ere ero maeaeakilai, Maia eavaila, leia eavaila, E kauvahaelue, ereve airekai auvahaea va arekaea; 24Ehovea hoveahovea kevao kaia ve ukai makaemakae leiki la hoa, are ukai kara makaemakae leikilai, areve hoa hovea, haela ve Akore kara laria. 25Aka oropa areve kakare oaria koarakilai, kai ma vilakao arero haure leikilai. 26Noah ve hoa leipe hovea, haela ve Akore ve hoa kara laria leikilai. 27Ere eapai i ma ila lalavahaeape, uavila maepape i karape kara, aiai Noah vevaea ureve pekape la hare, aiai ma haa lei, erero haela oaria hareho le ihahape. 28Lot ve hoa kara hovea, ere eapai i ma ila lalavahaeape, ilaea lei kakavae leivahaeai, oru hahai uvi kara kukueape. 29Aka Lot Sodom harepape la hare kaia ve a i salupa ila, lai hovea, ihaupe, erero heaha lei haeavahaeape. 30La hovea haela ve Akore hihika leiki hoa kihorerakilai. 31La hare, uvi arari akeave aeavila la haela, uvi ureve apeaki la eharu kailakive ka hoahukalue: oru apea la haela kara kihorera va arekaea. 32Lot ve uva ikikekelavakive. 33Ovokake kiva leikive ikivere la haela le havoavakilai, aka ovokake havoavaki la haela lei makurikive. 34Ara ero maeaeaive — La oroa haela orahokaila ita haroapo avuku la urupakilava, haela aeva hareavakilai, haela aeva aeakilai; 35Uavila orahokaila hareho wheat hae la huharakilava, aeva hareavakilai, aeva aeakilai. 36Haela orahokaila oru horova la leikilava, aeva hareavakilai, aeva aeakilai. 37Ere arero kavale maeape, Amua, lahoa? Are erero maeaeape, Apape la maea ve la ita, aivau laralula la ori korukaiakilai.
Currently Selected:
Luke 17: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
