Luke 18

Heheavahi haela heaha

1Are erero parabole kileape ehovea ere mea oaria ivaiva kiva leikive la heroe, iki mahuka lei va arekaea. 2Are mariape, Karikara ae heheavaki haela aeva aeveape — Are Aualari i haela ila oaoka au leila. 3La karikara uva maitava aeva aeveape — are arero hare oaria iki mari maeape, Arave iri haela heheava kavale leikive. 4Oropa hoa are au iapaila — aka aireaki are elare iki mari kekelape, Iele, ara Aualari i haela ila oaoka lei va ka, 5aka ehovea ma uamari araro heraho leivila ara areve hararuape la haela heheava kavale leikilai: are mea oaria oharo oaria v'ila araro hararuaki ave. 6Amua kai mariape, Haeae la heheavaki haela ve oharo iapai: 7O iele, Aualari are iki havahu akoremari hi ila oroa i hare ila arero velavela leilula la haela are haiapo haure lei ehohoe leivahaea va ka ha? 8Ara ero maeaeaive — Are erero elavelave lei ehohoe leivahaeakilai. Aka haela ve Akore kihoreraki la hoa are meahaiapo ve ikikekela haela eavakilai ha?

Pharisee haela i Tax korukaia haela ila

9Are kai elare mai ehohoe kelavalula kai haela aea kelavaki aue la haela ma parabole v'ila maeaeape: 10Haela orahokaila Hehe Uvi ivaiva leikive pekahavape, aeva Pharisee haela, aeva tax korukaia haela. 11Pharisee haela epavi elare ivaiva mari ape, Aualari, ara aro thank you ave ehovea ara haela oaria, korea, i haeae i airi pavora mai leilula la haela hovea va ka, ma tax korukaia haela hovea. 12Ara hepetome aeva hare orahokaila ere ereavila, ara va arave eharu au hamurea eapapo avaravila. 13Aka tax korukaia haela arai ve epavi ovohae kaia ve au iupevahaila, aka arahu koavi mari ape, Aualari, ara mai heaha haela, araro ikiheroe leikive. 14Ara ero maeaeaive — Ma haela elare uvi ai iki ehoe le leipe, oropa la haela va ka: ehovea pelaea leivila la haela hilaukilai, maeoka la haela lei morapaeakilai.

Iesu akoremari titaeka lei momorapupe

15Ere areve leia akoremari titaeka kari ekepe ehovea ere va ikivere are erero mai koharakive: aka kilea haela erero eavi aihukamaeape. 16Aka Iesu erero itavavahaeai mari maeaeape, Akoremari titaeka ekekive heroe, erero kahereavalue, ehovea ere v'ila Aualari ve basileia iele leikilai. 17O iele ara ero maeaeaive, Aualari ve basileia akore hekai hovea avaki aue la haela, are iele havahu leia araea va ka.

Ovokake iele: Erohoho va hereavaki eharu

18Akea haela ae arero maeape, Amua veveke, ara leari leikilai ovokake haiapo aeakilai ha? 19Iesu arero maeape, A araro rare veveke la itavaki ehovealeve — haela oaria veveke va ka, Aualari hiki. 20A va pupu ore, Airi pavora mai kalailue, oa i lou ila momorapuki. 21Are arero maeape, Ma eharu oaria ara hekai hoa ikiki ma hoa kiva leivila. 22Iesu la oharo iapai mari maeape, A va eharu haroapo hiki karia. A va ai elare eharu oaria ilaea lei merava haela aiarakive; a va kaia ve erohoho oaria aeakilai, iki arave airekai ekela. 23Aka are la oharo iapai ikihairihairi le leipe, ehovea are va erohoho haela iele. 24Iesu lari eavi mari maeape, Erohoho haela Aualari ve basileia arahavakive heraho iele. 25Camel karahe ura avuhapakive heraho perehekai la, aka erohoho haela Aualari ve basileia araeakive heraho eapapo iele. 26Ma oharo iapape haela maeape, Laelave ovokake leita leikilai ha? 27Aka are maeape, Haela haveva leivila la eharu oaria Aualari aupovearai. 28Peter arero maeape, Iapai, ela elare eharu haitapai ave airekai ekevahaeape. 29Are erero maeaeape, O iele ara ero maeaeaive — Areve uvi aka uva, aka apavara, aka oalou, aka akoremari, haela la hakorepakilava ehovea Aualari ve basileia, 30Are maeakoko aeakilai, ma hoa, aeva aireaki basileia hoa ovokake haiapo aeakilai.

Iesu ve aireaki apaki oharo aea

31Are 12 haela kari ai erero maeaeape, Iapaila, elaviila Jerusalem pekahavakive: peroveta haela haela ve Akore v'ila haeape la eharu oaria kihorerakilai. 32Ehovea ere arero ita lahua haela avarakilai, ere arero heheo arilai, hararuakilai, kai areve maea ve apea koakilai. 33Ere arero haru ha huru le harilai: aireaki hare ilehoila are uroukilai. 34Ere ma oharo oaria mekari au iapaila — ehovea ma oharo ve iele ere v'ila au avarapape, la oharo ve iele ere au kelavaila.

Iesu ovohae kariri haela lei veveke leipe

35Iapaila — are Jericho maeamaea aupe la hoa — ovohae kariri haela ae oki poe ve meru velavela leivila haiavape. 36Are haela lakea auvahaelula iapai, areve iele ve velavela leipe. 37Ere arero maeape, Iesu Nazareth haela mave auve. 38Are ara mari hape, Iesu, David ve akore, araro ikihuru hela leiki. 39Oropaki auvahaeape la haela arero erereape, oharo eapapo kailue. Aka are aeka ara eapapo maria hape, David ve akore, araro hela ikihuru leikive. 40Iesu aupavi arero lai ekekive maeape. Are ekepe la hoa Iesu arero velavela leipe, 41A va ikivere ara aro leari leikilai ha? Are arero maeape, Arave ovohae ovava leikive. 42Iesu arero maeape, Ave ovohae veveke leila, ave ikikekela aro lei lamakurila. 43Hoa haroapo areve ovohae ovava leipe. Are arero airekai ai Aualari morapaeape. Haela oaria eavi Aualari momorapupe.

Currently Selected:

Luke 18: ORO

Highlight

Copy