Luke 16

Mai haeae horova kiva haela

1Are areve kilea haela maeaeape, Horova kiva haela ae va erohoho haela ae ve eharu oaria kiva leivahaeape. Ere are v'ila maeape, Are amua ve eharu naoae naoae oai ka leivila. 2Are arero itavi mari maeape, Ara a v'ila leari oharo iapaive ha? Ave horova oaria hovea araro hihika kileaki — ehovea a va arave eharu kiva leiki horova hoa haerapakilai. 3Horova kiva haela elare iki kekelape — Ara leari leikilai, ehovea arave amua arave horova hoa mave haerapaive? Ara va kekele ihaki horova haveva, ara haela apekarava velavela leikive maeoka leive. 4Arave ikikekela ara maria la leikilava, ara va hoa haerapaki la hoa, ere araro ereve ita ve auhohi leikilai. 5Are areve amua ve apetore leivahaeape haela haroapo haroapo itavi oropa haela maeape, A va amua apetore leavaila leipe ha? 6Are arero maeape, Oil kavapu 100. Are arero maeape, A ve okoare ve hape la pepa kaivi 50 elavelave harive. 7Are kai haela aeva maeape, A va apetore leavaila leipe ha? Are kavale maeape, Wheat hae hurua 100. Are arero maeape, Okoare hape la pepa kaivi 80 hiki elavelave harive. 8Areve haelapo la oharo iapai are areve haeae leipe horova haela morapaeape, ehovea are va ikiore hovea leipe, ehovea ma meahaiapo akoremari ereve ma vilakao hoa ikiore eapapo leilula, ovava ve akoremari la ikiore hoveahovea lei va ka.

Erohoho ve horova iele

9Ara ero maeaeaive, E va haeae ve erohoho apavara hovea leiki, laelave aireaki heaha leiki la hoa ere va ero ereve apeaki ita ureve auhohi leivahaeakilai.

10Horova hekai kiva auhohi leiki la haela, are va horova eapapo kara kiva auhohi leikilai. 11Laelave, e va haeae ve erohoho kiva auhohi leikiaue la leivahaeakilava, ero erohoho iele kiva leikive leita maeaeakilai? 12E va haela ae ve eharu kiva auhohi leikiaue va lailava, e havahu ve eharu veveke ero leita aiarakilai? 13Haela haroapo amua orahokaila ve horova leikive hovea ka. Ae va are ikihairihairi leikilai, aeva are ikivere leikilai: aka aeva are aheke koarakilai, aeva are haure leikilai. E va Aualari i mamona ila ve horova hoa haroapo leikive hovea ka.

Pharisee haela ve mai haeae

14Pharisee haela, ehovea ere va moni ikivere eapapo leilula haela, ma oharo iapai heheo oharo oaria ape. 15Are erero maeaeape: E va elare mai haela oropa ve hiki ehohoe leikive ikivere, aka Aualari eve iki ureve ore, ehovea haela momorupula la haela Aualari ve oropa ve heaha iele leilula.

16Pupu oharo i peroveta haela ve la oharo apeapea John ve hoa. Aireaki la hoa Aualari ve basileia ve iroro haela arula, kai haela aheke la basileia ureve arahavalula. 17Heraho perehekai ma, kaia i meahaiapo ila karia leikive, aka pupu ve oharo haroapo hekai iele havoavakive heraho eapapo.

18Haela ae areve uva haure la leikilava kai uva are la laeakilava, are airi pavora mai leive. Haela la haure leipe uamari la laeakilava, are kara airi pavora mai leive.

Erohoho haela i Lazarus merava haela ila

19Erohoho haela ae elare maea pura ovoka i veveke ila hare oaria oreaupe — hare oaria kara eapai veveke hiki lape. 20Merava ape karava velavela leivila haela ae rare Lazarus areve ara mahokaea ve haiavape: areve maea paila oaria. 21Are hare oaria erohoho haela ve haha ve oaupe la eapai eroe larive ikivere leivila: kaire — avita kara areve maea paila ape mehelape. 22Iapai — merava haela api kai aneru arero oraiavi Abraham ve arahu ve aipepe. Erohoho haela kara api kai ere arero karu le ihape. 23Gehena leia are ovohae iupe Lazarus Abraham ve arahu hahavila eavape. 24Are ara maria hape, Oa Abraham, araro hela ikiheroe leiki, Lazarus mai lekoka ma ve horapakive paraeaki ehovea arave auri kohari vevehere leikive, ehovea arave ma a uru ve aeavila kakare kakare iele. 25Abraham arero maeape, Akore e, a va iki auhohi kekela, ave meahaiapo ovokake hoa a va erohoho eharu oaria ila aeape — Lazarus ka eharu heaha oaria ila aeape. Ma hoa are va maia veveke overa lei iki veveke aeavila, a va kakare eapapo ila. 26Oharo aeva ma — Elave aru hihi ve hahapa koru iele aeave — laelave maia ve ave leia elahukakive ikivere la haela, elahukaki oki karia. Eve la ukai haela kara ma ukai kilahu?-?kakive oki karia. 27Are arero maeape, Laelave, oa, ara aro hela velavela leive, a va arero arave oa ve uvi leia paraeakive. 28Ehovea arave apoheari hue ila le apearo: are erero oharo hihika maeaeakilai, ere va ma kakare eapapo ita kilahukaki ave. 29Aka Abraham arero maeape, Ere va Moses i peroveta haela ve oharo ila. Ere la oharo iapaki va heroe. 30Are kai arero maeape, Ka, oa Abraham, aka au apape haela kai ereve leia la elaukilava, ere haeae ve ikihuru leivahaeakilai. 31Are arero maeape, Ere Moses i peroveta haela ila ve oharo iapaki aue laleivahaeakilava, ere api kai uroupe la haela ve oharo kara iapa va ka.

Currently Selected:

Luke 16: ORO

Highlight

Copy