Luke 15

Au havoavape Mamoe akore haroapo

1Tax korukaia haela i mai heahaha haela oaria iki areve leia areve oharo iapakive. 2Pharisee i Sadducee haela elarelare hihiri oharo mari avahaeape, Ma haela mai heahaha haela auhohi leivila, are ere i hareho eapai lalavila.

3Are erero parabole oharo mari maeaeape, 4Eva leita haela are va mamoe 100 ila, haroapo la havoavakilava, are 99 ita merava haitapava ka ha, kai ai havoavape la mamoe haropi haropi aiai koarakilai la. 5Are arero la koarakilava, are arero horo oraiavi ikiveveke le leikilai. 6Are elare ita kihoreraki la hoa are apavara haela i are i hareho apealula la haela oaria itavi mari maeaeakilai, Elaviila hareho ikiveveke leivahaeaki, ehovea lahavoavila la mamoe ara le koarai. 7Ara ero maeaeaive — Laria kara ere kaia ve ikiveveke eapapo leivahaeakilai, ehovea mai heaha haela haroapo areve haeae ve ikihuru leikilai, 99 mai ehohoe haela ve la ikiveveke hoveahovea va ka, ehovea ereva haeae au leila.

Au havoavape moni haroapo

8Aka uamari ae va moni 10 ila, areve moni haroapo la havoavakilava, are lamepa avea va ka ha, uvi hoapai arero haropi haropi aiai koarakilai. 9Are arero koaraki la hoa are apavara ila are i hareho apealula la haela itavi erero mari maeaeakilai, Elaviila hareho ikiveveke leivahaeakilai, ara la loapaila la moni ara le koarai. 10Laria kara ara ero maeaeaive — Haela haroapo areve haeae ve ikihuru laleikilava, Aualari ve aneru oaria ikiveveke leivahaeakilai.

Au havoavape akore haroapo

11Are maeaeape, Haela ae ve akoremari orahokaila; 12akoreheari areve oa maeape, Oa, ara va aireaki aeaki la eharu araro mave aikiara. Oa areve eharu erealila ve hamuri aiarape. 13Haiapo ka akoreheari elare eharu korukai, ita apehai hahi aupe, leia areve eharu naoae naoae mai heaha ila ilaea lei lei kari le leivahaeape. 14Areve eharu oaria karia leivahaeape la hoa la ita ve mea avora leipe: are merava le leipe. 15Are la ita haela ae ve horova leipe: are arero ilaita ve eapai kiva leikive maeape. 16Are ilaita lape la eapai ikivere lei lape, ehovea haela arero eapai au avaraila. 17Are iki auhohi kekelape la hoa are elare iki ure mari kekelape, arave oa ve horova haela oaria eapai oaria, kepea ila, ara kai eroa hahave, apaki maea iele. 18Ara urai oa ve leia aukilai, ara kai arero maeakilai, Oa, ara va kaia oropa ve ai ave oropa ve mai haeae eapapo leipe. 19Ara veveke va ka a akore rare arive. A va ave horova haela araro rare ari. 20Are urai oa ve leia aupe: are va ekepe la hoa oa arero arai eavi ikihuru eapapo leipe: are vivila areve maea hahavi arero ape popoa i overa hihipe. 21Akore areve oa mari maeape, Oa, ara va kaia ve oropa ai ave oropa ve mai haeae eapapo leipe. Ara va akore veveke va ka ave akore rare arive. 22Aka oa areve horova haela maeaeape, Pura veveke elavelave avikela areve maea orakive: maimari areve mai lekoka oraki, loa iilu areve loa la oreauila. 23Boromakau akore kapare aviki harive — elaviila ikiveveke leivahaeai eapai larilai. 24Ehovea arave ma akore api kai ovokake leipe — au havoavape kai mahau le eavi. Ere ikiveveke leivahaeape.

25Areve akoreapo oru ve horova leipe. Are uvi leia pekape la hoa are hivi i mahea ila iapape. 26Are horova haela itavi ma eharu ve iele apevelavela leipe. 27Are arero maeape, Ave akoreheari leikila, laelave ave oa boromakau akore kapare lahila, ehovea are maea popou aheke ila leikila. 28Are hihiri lei uvi pekakive haure leipe. Oa kihoai arero here leipe. 29Aka are oa kavale kimaeape, Iapai, ma hitolo oaria ara ave horova hiki leivila — ara ave pupu oharo haroapo haure au leila. Aka a va ara v'ila goat akore au haila, ehovea apavara ila ikiveveke leikive. 30Aka ma ave eharu oaria mai heaha ila naoae naoae leipe la akore lai leikilava, a va boromakau akore kapare are v'ila le hara. 31Are arero maeape, Akore e, a ara i hareho mea oaria aeavila, arave eharu va ave eharu. 32Veveke ela ikiveveke maria leikive — ehovea ave akoreheari api kai ovokake laleila — ela arero havoavi kai le koarai.

Currently Selected:

Luke 15: ORO

Highlight

Copy