Luke 14

Maea epe apo heheva haela sabati hare lei makuripe

1Hare ae are Pharisee haela ve akea haela ve uvi sabati hare eapai larive pekape la hoa ere arero ovohae auhohi eavape. 2Iapai — maea epe apo heheva haela areve oropa ve ekepe. 3Iesu Pharisee haela i pupu ore haela kavale mari maeaeape, Sabati hare haela ve maea veveke leikive heroe ha, aka pupu ila? Ere kavale oharo ka. 4Are la haela lai ai maea veveke lei le paraeape. 5Are erero maeaeape, Haela ae areve asini aka boromakau ma karu ve la oaukilava, are arero sabati hare kara elavelave hareava va ka ha? 6Ere va arero kavale oharo kimaeakive horahora le leipe.

Maeoka mai: Hurae hoa haiavaki mai

7Are la eapai ve itavavahaeape haela akea ita avakive ikivere leivahaelula eavape la hoa are erero parabole oharo mari maeaeape: 8Haela ero eapai larive la itavakilava, akea ita kavalue, ave akea haela aire ekeki ave, 9Ealilara itavape la haela kara iki aro mari maeaki ave, Ma haela ve ita hakurepa, aire a maeoka eapapo lei ipi havahu la ita hoaukilai. 10Aka are itavaki hoa a hoai ipi havahu la ita haiava, laelave, aro itavape la haela ve ekeki hoa are aro mari maeakilai, Kake e, a va akea ita pekaki — la hoa a i hareho eapai lari haela aro le morapaeakilai. 11Ehovea maea pelaea leiki la haela maeoka leikilai — maeoka leiki la haela ere le morapaeakilai.

12Are arero itavape la haela maeape, A va hare hoa aka hailaea hoa haela eapai larive la itavakilava, a i hareho loalula la haela, aka apoheari, aka apavara aka erohoho haela kaitavavahaelue, a leipe la hurae ve kavale leikive aro kai itavaki ave. 13Aka a va hurae la leikilava, merava haela i loa hahaeae haela, i ovohae kariri haela la itavavahaeaki. 14A va ikiveveke leikilai, ehovea ere va aro kavale leikive eharu karia: mai ehohoe haela apihaeai kai urahukaki la hoa a ikiveveke iele leikilai.

Uva laeaki hurae ve parabole

15Leia eapai lape haela ae ma oharo iapai mari ape, Aualari ve basileia ureve eapai larilai la haela ikiveveke leikilai. 16Aka are arero maeape, Haela ae hurae leipe kai haela oaria itavavahaeape. 17Eapai larive hoa are areve horova haela ae paraeape — au itavavahaeape la haela maeaeakive, Ekeila, eharu oaria hoveahovea overa leivahaeai. 18Kahara, ere oaria ikihairhairi oharo ape. Haela ae va mari ape, Ara kekele uku ilaea leipe ara va la ita ovohae eavakive aukive leive: ikiheroe hela, ara kahara. 19Haela ae mari ape, Ara va boromakau maroka hue ila ilaea leipe; la boromakau ara maea hovea eavakilai. 20Haela ae va mariape, Ara uva are laeape, laelave ara va au va ka. 21La horova haela iki areve haelapo ma oharo oaria maeape. La uvi haela hihiri lei horova haela mari maeape, A va okiharo i oki lakalaka ila elavelave auki — leia ve merava i maea kakare i ovohae kariri i loa hahaeae haela oaria ila kari ekekive. 22Horova haela maeape, A lakimaeaila la oharo overa leila, ita kepea le aeave. 23Haelapo areve horova haela maeape, A va kaipure i kara mahokaea ve okiharo oaria aula, leia ve haela oaria maeaeaki, ere va hareho ekevahaeakive, arave uvi heloekoakive, heroe. 24Ehovea ara ero maeaeaive, Oropa itavavahaeape la haela oaria hareho arave eapai aireaki lalavahaea va ka.

Basileia ve horova haela heraho ikikekela

25Haela oaria are i hareho auvahaeape: are helari erero mari maeaeape: 26Haela arave oki la ekekilava kai are havahu ve oa i lou, i uva i akoremari i apoheari i maritaloa ikihairhairi leikiaue la leikilava, kaire, are havahu ve ovokake kara, are arave kilea haela hovea ka. 27Areve satauro oraiavi araro airekai ekeki aue la haela are va arave kilea haela va ka. 28Ehovea e leita haela uvi arari kukive ikivere la leikilava, oropa haiava va ka, kavale oropa ikikekelakive, areve moni hoveahovea la, aka hovea va ka ha? 29Aireaki hare are va ihau oropa paparaehai uvi hovea leikiaue la leikilava, arero eavaki haela oaria aireaki arero heheo i ari ave maria, 30Ma haela uvi horova ipopeavape, kai karia au leila. 31Ae va le la amua iki amua ae i mare arive ikivere la leikilava, oropa are haiava va ka ha, iki ure heheavakive, areva haela 10,000 ila, 20,000 ila ekeki la amua are heaorapakilai la, aka heaorapa va ka? 32Are hovea leikiau la leikilava, la amua arai ve pavaki la hoa are havila leiki oharo paraeakilai la. 33Laelave e va leita haela, elare eharu oaria hahaure leikiaue la leikilava, are va arave kilea haela hovea lei va ka.

34Kaikara va veveke, aka la kaikara areve iele la havoavakilava, are va leari lei hoveahovea leikilai ha? 35Are va oru ve hovea ka, kai eroroma ita kara hovea ka. Haela arero au hiki aukapakilai. Avako ipi haela ere iapakilai.

Currently Selected:

Luke 14: ORO

Highlight

Copy