John 20

Kapu ita haroka

1Hebedoma ve oropa hare, mea opi hoa, Mary Magdalene kapu ita pekai have overa avarura eavape. 2Are Peter i Iesu ikivere havahu leipe la kilea haela ila ve leia vivila erealilara maeaeape, Ere Amua kapu ita ve hareavi, lahoa la ailepila ela ore va ka. 3Peter i la kilea haela ila mea hoahuka kapu ita auvahaeape. 4Erealila hareho vivilape. La kilea haela Peter heaorapa kapu ita oropa ekepe. 5Are ekaopi ure ovohae eavi, maea kohahape la pura eavape. Are ure ve au hoaila. 6Simon Peter areve aire iki kapu ure ve hoaupe. Are maea kohahape la pura eavavahaeape, 7Haro hahape la muko, la maea hahape pura i hareho au aeaila, aka ita lahua aeape. 8Aire la kilea haela ae, kapu ita oropa pekape la haela, ureve araeai eavi iki le kekelape. 9Ehovea ere va la hoa buka hape la oharo ore au leila, are va apai kai uroukilai.

Iesu Mary oropa ve hihika pavape

10Laelave kilea haela elare ita le hoahukape.

11Aka Mary kapu ita mahokaea ve hi ila epavape. Are hi ila ekaopi kapu ita ureve ovohae eavape. 12Are aneru orahokaila avahaelula eavape, aeva haro ita aeva loa ve ita, Iesu ve maea aipepe la ita. 13Erealila arero maeape, Uamari, a va hi ehovealeve? Are erealilara maeaeape, Ehovea ere arave Amua la hareavi, ara ore va ka ere arero lahoa aipepe. 14Are la oharo avi airelariape kai Iesu epavila eavape. Are ore ka are va Iesu la. 15Iesu arero maeape, Uamari, a hi ehovealeve ha? A va leita haropave ha? Areve ikikekela are aru kiva haela, laelave are arero maeape, Haelapo, a va arero hareavi la lailava, a arero aipepe la ita araro hela kimaeaki — ara arero hareavakilai. 16Iesu arero maeape, Mary. Are helari arero Hebrew uri maeape, Rabboni! la oharo ve iele, Haelapo. 17Iesu arero maeape, Araro mai kapaealue: ehovea ara Oa ve leia au pekakue. A v'ai arave apavara oaria maeaeaki, Ara arave Oa ve pekakilai, eve Oa, arave Aualari, eve Aualari la. 18Mary Magdalene iki areve kilea haela maeaeape, Ara Amua laeavila. Are kai arero maeape la oharo are erero maeaeape.

Iesu aposetolo haela oropa ve hihika leipe

19Laelave, hailaea hoa, la hebedoma ve oropa hare la, okiape overa kokauka ehovea ere Jew haela oaoka leivahaeape, la hoa Iesu iki ereve aru hihi ve epavi mari maeaeape, E havila i apeaki. 20Are ma oharo avi areve mai i kararapi ila erero amoeape. Kilea haela ikiveveke eapapo leivahaeape ehovea ere Amua la eavape. 21Laelave Iesu erero aeka maeaeape, E havila i apeaki. Oa araro kiparaeape: ara kara ero laria paparaehakilai. 22Are ma oharo avi ereve akea ve ape mea la hohoape kai mariape: E Ove Veveke availa. 23E va haela ve haeae la hapururukakilava, areve la heahaha le hapururukakilai. E va haela ve hahaeae hapururukaki aue la leikilava, areve la hahaeae apeakilai.

Iesu Thomas oropa ve hihika pavape

24Aka 12 ve haela ae, Thomas, rare aea Didymus, Iesu ekepe la hoa au ekeila. 25Kilea haela ae arero maeape, Ela Amua laeavila. Aka are erero maeaeape, Ara iapa va ka aiai ara areve mai ureve karahe huape la hohara eavakilai, kai arave mai lekoka la karahe ve hohara paraeakilai, kai arave mai areve kararapi la ita ve kara.

26Hare 8 kari leipe, la hoa kilea haela i Thomas ila hareho uvi ve korukaiavahaeape: okiape overa kokauka — Iesu iki ereve aru hihi ve epavi mari ape, E va havila ila apeaki. 27Aire are Thomas maeape, Ave mai lekoka horapa arave mai eavaki, ave mai horapai arave kararapi paraeaki: iapaki aue mai kahara; ikikekela. 28Thomas arero maeape, Arave Amua, arave Aualari! 29Iesu arero maeape. Ehovea a araro laeavila ava iki lakekelaila. Au eavaila kai iele iapape la haela ere ka veveke iele.

John ve iroro oharo ve iele

30Eharu aeva oaria Iesu areve kilea haela ve oropa ve leivahaeape. Erero ma buka au haeaila. 31Aka ma oharo haeape ehovea e ikikelavakilai Iesu va Keriso, Aualari ve Akore. E iki la kekelakilava, e va areve rare v'ila ovokake le avakilai.

Currently Selected:

John 20: ORO

Highlight

Copy