John 19

Pilate Jew haela ve oharo iapape

1Laelave Pilate Iesu kaivi haru le koape. 2Hevehe haela kora mamareke v'ila korona hai areve haro koharitopape: Ere areve maea pura ovoka ila orape. 3Ere iki areve leia mari maeape, A va la ha, Jew haela ve Amua! Ere arero elare mai ve koavape. 4Pilate aeka mea hoai erero maeaeape, Iapaila, ara arero eve maia ve lai kihoaukive e va ore leivahaeaki, are areve haeae au eavaila. 5Laelave Iesu haro kora mamareke v'ila hahai kihoaupe: areve maea kara pura ovoka ila. Pilate erero maeaeape, Haela eavaila! 6Oharo haela i kapena haela ila arero eavi ara eapapo hape maria, Arero satauro harive, arero satauro harive! Pilate erero maeaeape, E havahu arero kaivi satauro harive, ehovea ara areve haeae eava va ka. 7Jew haela arero kavale maeape, Elave pupu le aeave — ehovea la pupu are va apakive hovea, ehovea are elare maea Aualari ve Akore maeape. 8Pilate ma oharo iapai oaoka le leipe. 9Are praetorium aeka pekai Iesu maeape, A va lahoa ve ha? Iesu arero kavale oharo au maeaila. 10Laelave Pilate arero maeape, A araro oharo kimaea va ka. A va ore va ka ha ara va aheke ehovea aro paraeakive, kaire, ehovea aro satauro harive? 11Iesu arero kavale maeape, A va aheke akea ve avakiaue la lailava, a va aheke iele lei va ka. Laelave aro araro avarape la haela ve haeae eapapo, a va perehekai.

12Pilate ma oharo iapai are ikivere arero paraeakive. Aka Jew haela āra mari hape, A va ma haela la paraeakilava, a va Caesar ve loaukai va ka. Are elare rare amua rare avila la haela are va Caesar ve iri haela. 13Pilate la oharo iapai Iesu lai kihoai heheavaki haha akea ve haiavape. La ita rare Have Ita, Hebrew rare Gabbatha, 14La hoa Passover ve kariki hoa — hare hihi hovea. Are Jew haela maeaeape, Eavaila! Eve Amua. 15Ere āra mari hape, Arero lai aukive — arero lai auki satauro harive. Pilate erero maeaeape, Ara eve Amua satauro harilai ha? Oharo haela maeape, Elave amua karia, Caesar hiki. 16Laelave, la hoa, are arero erero avarape, ehovea arero satauro harive.

Iesu satauro hape hoa

17Laelave ere Iesu lai aupe — are elare satauro oraiavi ai ita haroapo rare, harohae ita. Hebrew rare va Golgotha. 18Ere arero leia satauro hape. Ere are i hareho haeape haela orahokaila, aeva ukai aeva ukai, Iesu va aru hihi ve. 19Pilate hohoa hai satauro akea ve koape: Iesu, Nazareth haela, Jew haela ve Amua. 20Jew haela oaria ma oharo mureape, ehovea ere Iesu hape la ita karikara maeamaea vea — la oharo Hebrew i Roman i Greek uri ila hape. 21Jew haela ve oharo haela Pilate maeape, Maria he va arekaea, Jew haela ve Amua. Aka mari, Are maeape, Ara Jew haela ve Amua. 22Pilate oharo kavale maeaeape, Ara va oharo le hara. Kahara.

23Hevehe haela Iesu satauro hape. Aireaki ere areve pura au hamureai hiru four — hevehe haela haroapo hiru haroapo. Areve ure pura maeakoko, au kokorape ita karia: 24laelave ere elarelare mari hukavape, Ela ma pura haipararapa va arekaea — ela are v'ila koai koakilai, leita la avakilai. Ehovea buka hape la hohoa iele horerakilai maria:

Ere arave pura elarelare au hamureape:

Arave maea pura v'ila ere koai koape.

Hevehe haela maria leivahaeape.

25Aka Iesu ve satauro maeamaea epavape areve lou i lou ve mariloa, i Mary, Cleophas ve uva, i Mary Magdalene ila. 26Iesu areve lou i la kilea haela ila maea iele epavila eavi are areve lou maeape, Uamari, eava! Ave akore ma. 27Are la kilea haela maeape, Eava, ave lou. La hoa havahu la kilea haela arero are havahu ve ita lai aupe.

28Aireaki, ehovea are ore eharu oaria karia le leipe, buka hape la oharo hoveahovea, Iesu mariape: Ara ma karave koave. 29Leia hahu vinegar ila aeape. Laelave ere pura hakaea vinegar paraeai hyssop kora huhai areve ape le paraeape. 30Iesu vinegar avi mariape, Kahara. Are haro ekaopi le apape.

Lape huhape hoa: Karu ihape hoa

31Ehovea sabati ve oropa karikiki hare, maea satauro akea sabati hare apeaki ave, Jew haela Pilate velavela leipe maria — ereve loa overa koekavaki erero aiaukive. 32Laelave hevehe haela iki are i hareho satauro haeape la haela orahokaila ve loa koekavape. 33Aka ere iki Iesu ve leia ovohae eavape are va overa apape, laelave ere areve loa au koekavaila. 34Lae vi va hevehe haela ae areve kararapi lape huape. La hoa apu i ma ila kihorerape. 35Ovohae eavape haela ma oharo vavavape. Areve oharo va iele. Are v'ore areve oharo iele, ehovea e kara ikikekelakilai. 36Ma eharu leivahaeae ehovea buka hape la oharo iele horerakilai Areve uki haroapo ere koeka va ka. 37Buka oharo aeva ma Ere lape huhape la haela ovohae eavakilai.

38Ma eharu karia lei Joseph Arimathaea, Iesu ve kilea haela ae (are muruhari leipe ehovea are Jew haela oaoka leipe) are iki Pilate velavela leipe — are Iesu ve maea hareavakive — Pilate areve oharo iapape. Laelave are iki Iesu ve maea hareavape. 39Nicodemus kara, overa hoa oroa ekepe la haela, muo veveke muramura myrrh i aloes ila, 100 pound mehau la, avikepe. 40Ere Iesu ve maea avi muramura i pura veveke ila hahape, Jew haela ve karu ihaki mai hoveahovea. 41Ere arero satauro hape la ita aru ila. La aru ureve kapu ita are aeape. Leia apape haela overa au ihaila. 42Ehovea Jew haela ve sabati karikiki hoa, ere arero leia ihape, ehovea la ita maea iele.

Currently Selected:

John 19: ORO

Highlight

Copy