John 21
21
Iesu Tiberius ma haru poe ve hihika leipe
1Ma eharu kari lei Iesu areve kilea haela ve oropa ve Tiberius ma haru ve hihika leipe. Are areve maea erero maria amoeape. 2Simon Peter i Thomas rare aeva Didymus i Nathaniel, Cana Galilee karikara ve haela, i Zebedee ve akoremari, i kilea haela aeva 2 kara, hareho apearoape. 3Simon Peter mariape, Ara horera ekaka haropakive. Ere arero maeape, Ela a i hareho horerakilai. Ere hoahukai boti horeavi, la oroa ekaka au koaraila.
4Mea opi hoa, Iesu miri epavape. Lai vi va, kilea haela haveva are va Iesu la. 5Iesu erero maeaeape, Mekehaku, e va eapai ila ha? 6Ere arero kavale maeape, Karia. Are erero maeaeape, Loko boti ve ore ukai ve paraeaki — e va leia koarakilai. Ere paraeai arero hailavakive ore au leila ehovea ekaka oaria iele arero heloe la koape. 7Iesu ikivere havahu leipe la kilea haela Peter maeape, Amua la! Peter Amua ve la oharo iapai, elare maea pura hahape (ehovea are maheare) kai ma ve hareaupe. 8Kilea haela ae boti hekai ve uka?-?kepe (ehovea ere apehai ka, 200 cubit hiki). Ere loko ekaka maeakoko ila hakeavape.
9Ere miri epavape la hoa ere a ovohae eavape, ekaka uku akea ve apeape, pai uku kara. 10Iesu erero maeape, E lakoaraila ekaka oaria aikeila. 11Simon Peter pekai loko i ekaka ehoaha oaria ila hakeavape, ekaka ehoaha va 53, ekaka oaria iele, aka loko au haiparara?-?paila. 12Iesu erero maeaeape, Iki eapai larive. Kilea haela oaria oaoka arero apevelavela leikive, A va leita ha? ehovea ere ore are va Amua. 13Iesu iki pai mai paeai erero aiarape — ekaka kara. 14Hoa three ma Iesu elare maea areve kilea haela amoeape, apai kai uroupe la hoa.
Iesu Peter maeape hita oharo
15Ere eapai lala Iesu Simon Peter maeape, Simon, Jonas ve akore, a araro ikivere eapapo leivila ha ma haela perehekai ha? Are arero maeape, Kaire, Amua e, a v'ore ara aro ikivere leive. Are arero maeape, Arave mamoe titaeka ve eapai aiarakive. 16Are arero aeka maeape, Simon, Jonas ve akore, a araro ikivere iele leive ha? Are arero maeape Kaire, Amua e, a v'ore ara aro ikivere leivila. Are arero maeape, Arave mamoe kiva leikive. 17Are arero aeka hoa ilehoila kai maeape, Simon, Jonas ve akore, a araro ikivere leivila ha? Peter ikihairihairi leipe ehovea are arero hoa ilehoila maeape, A va araro ikivere leivila ha? Are kai arero maeape, Amua, a va eharu oaria ore hiki — a v'ore ara aro ikivere leivila. Iesu arero maeape, Arave mamoe ve eapai aiarakive. 18O iele, o iele, ara aro maeaive — ave harokou hoa a va elare pura hahape: ave ikivere oki a le aupe. Aka ava haela eapapo leiki la hoa a va mai horapai haela ae aro pura hahakilai, kai ava ikivere leiki aue la okiharo are aro oraiavi aukilai. 19Are ma oharo maeape ehovea areve apaki hoa, are Aualari la morapaeaki maea va kileakilai. Are ma oharo maeai arero aeka maeape, Arave airekai ekela.
20Peter aire helari Iesu ikivere havahu leipe la kilea haeala ereve airekai ekevila eavape. La kilea haela eapai hoa areve arahu ve haiavape kai mariape, Aro hihila epaki haela va leita ha? 21Laelave Peter arero eavi Iesu velavela maria leipe, Amua, ma haela leari leikilai ha? 22Iesu arero maeape, Ara ikivere la leikilava are arave aire kihoreraki hoa la karikilai, la va ave horova ha? A araro airekai ekekive. 23Laelave ma oharo kilea haela ve leia mea oaria hukavape maria — la kilea haela aireaki apa va ka. Aka Iesu arero au maeaila are va apa va ka, aka, Are va ikivere la leikilava are araro karikilai, la va ave horova ha?
Kokaukaki oharo
24La kilea haela ma oharo oaria vavavila, kai ma oharo oaria haeape haela ma. Ela va ore areve vavavaki oharo va iele.
25Aeka Iesu leivahaeape eharu oaria le apearo. La oharo oaria buka la haeakilava, meahaiapo la buka oaria korukaiakive hoveahovea lei va ka.
Currently Selected:
John 21: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
