John 15

1Ara vine iele havahu, arave Oa vine kiva haela. 2Arave hae horeavaki aue mamaeako oaria are koerapakilai. Hae ila la mamaeako are au koelaeavahaeakilai, laelave ere hae oaria horeavakilai. 3E va veveroro overa leivahaeape, ehovea ara ero maeaeape la oharo oaria. 4E va arave ureve apeaki. Ara kara eve ureve aeakilai. Maeako vine i hareho aeaki aue laleikilava, hae iele horeava va ka, e kara laria. E va ara i hareho apeaki aue la leikilava, e v'ila iele leivahaea va ka. 5Ara havahu vine: e va mamaeako. Ara i hareho aeaki la haela, ara areve ureve kara aeakilai: are v'ila iele oaria horeavakilai: ehovea e lahua la apeakilava, eve horova iele karia. 6Haela ara i hareho aeaki aue la leikilava, ere arero maeako hovea aukapakilai, harou ila. La mamaeako ere korukaiavahaeai a aroukilai. 7E va ara i hareho la apeakilava, arave oharo kara eve ureve la apeakilava, e va learia eharu velavela leikilai, la eharu e v'ila le leikilai. 8Arave Oa ve morapaeaki eharu iele mae — e va iele oaria horeavakive, laria e va arave kilea haela iele. 9Oa araro ikiheroe leipe laria ara kara ero ikivere leivahaeape. E va arave ikiheroe v'ila apeaki. 10E va arave oharo kiva auhohi laleikilava, hoveahovea e va arave ikiheroe v'ila apeakilai: ara kara arave Oa ve oharo iapai kiva leivahaeape, laelave ara areve ikiheroe v'ila aeavila. 11Ara ero ma oharo lamaeaila ehovea arave ikiveveke e v'ila hareho aeakilai, ikai e kara ikiveveke eapapo leivahaeakilai.

12Arave ape karava oharo ma — ara ero ikiheheroe leivahaeape la maea, e va elarelare ikiheheroe leivahaeaki. 13Ikiheroe eapapo aeva karia, maria hiki, haela are havahu ve ovokake areve kake v'ila avarakilai. 14E va ara ero maeaeape la eharu oaria la leivahaeakilava, e va arave kake iele. 15Ara ma hoa ero horova haela rare hiki itavavahaea va ka. Ehovea horova haela areve Oa ve horova ve iele haveva; aka ara ero kake lamaeaeaila ehovea ara Oa ve iapape la eharu oaria ara ero hihika kileavahaeape. 16E va araro au itavaila, aka ara ero itavavahaeape, kai ero maeaeape e v'ai hae iele horeavakive, aeva eve la hae iele aheke apeakive. Laelave e va Oa arave rare v'ila lela eharu velavela leivahaeakilai, la eharu are ero aiarakilai. 17Ma oharo ara ero ape karava maeaeaive, E va elarelare ikiheheroe leivahaeakilai.

18Meahaiapo ero ikiheaha la leikilava, e va ore are araro kara ikiheaha oropa leipe. 19E va meahaiapo v'ila la lailava, meahaiapo elare haela ikivere le leivahaeakilai. Aka ehovea e va meahaiapo ve haela, aeva ara ero meahaiapo ve itavavahaeape, laelave meahaiapo ero ikiheaha leivahaevila. 20Ara ero lamaeaila la oharo ikikelavaki — horova haela areve haelapo ve akea ve va ka. Ere araro hararua la lailava, ere ero kara hararuakilai. Ere arave oharo kiva la lailava, ere eve oharo kara kiva leivahaeakilai. 21Aka ma eharu oaria ere arave rare v'ila ero leivahaeakilai, ehovea ere araro kiparaeape haela ore va ka. 22Ara erero oharo maeaeakive ekeki aue la lailava, ere va haeae karia, aka ma hoa ereve oki karia — ereve haeae le aeave. 23Araro ikiheaha leivila la haela are arave Oa kara ikiheaha leivila. 24Haela ae au leivahaeaila la horova ara ereve oropa ve leivahaeaki aue la lailava, ereve haeae karia. Aka ma hoa ere va araro Oa i hareho ila eavi ikiheaha leivahaeape. 25Maria iele leipe, ehovea ereve pupu buka haeape la oharo iele le horerakilai, Ere va araro ikiheaha leivahaeape, ehovea iele karia. 26Aka Hakakaeaki haela kihoauki la hoa, ara ero Oa v'ila kiparaeaki la O iele Ove Veveke, Oa v'ila kihorerape la Ove Veveke, are va ara v'ila vavavakilai. 27E kara vavavahaeakilai, ehovea avare koare leipe la hoa ikiki mahau e ara i hareho apealula.

Currently Selected:

John 15: ORO

Highlight

Copy