John 14

Oa ve leia pekaki okiharo

1E va horahora va arekaea. E va Aualari kelavalula, araro kara iki kelavaila. 2Arave Oa ve eravo lalava oaria apearo. Laria la leikiaue va lailava, ara ero overa la maeaki, ehovea ara va eve ita kariki aukilai. 3Ara eve ita kariki la aukilava, ara aeka ekekilai — ero ara i hareho korukaiakive. Ehovea ara aeavila la ita e kara apeakilai. 4Ara v'auki la ita e va oki ore. 5Thomas arero maeape, Amua — ela ore va ka — a va lahoa aukilai: Ela oki learia ore leivahaeakilai? 6Iesu arero maeape, Ara va okiharo i oharo iele, i ovokake ila. Haela ae Oa ve leia oki ae v'ila peka va ka — ara v'ila hiki. 7E va araro ore la lailava, e va arave Oa kara ore leipe. Aireaki e va arero ore leikilai, ehovea e va arero overa eavape.

8Philip arero maeape, Amua, Oa elaro amoeaki — ela iki le kekelakilai. 9Iesu maeape, Ara e i hareho haiapo iele aeavila, Philip, a va araro ore au leila ha? Araro eavape la haela Oa kara eavape. A va leari maeakilai, Elaro Oa amoeakive. 10E iapa va ka ha — ara Oa ve ureve aeavila, Oa kara arave ureve aeavila. Ara ero maeaeaki oharo ara ara v'ila maeaea va ka — aka arave ureve aeavila la Oa areve horova leivahaevila. 11Arave oharo iapai, ara Oa ve ureve aeavila, Oa kai arave ureve aeavila. Aka ehovea horova ve iele araro ikikekelakive.

12O iele, ara ero maeaeaive — araro ikikekela la haela ara leivahaevila la horova are kara leivahaeakilai. Are kai horova ehoaha ae va leivahaeakilai, ehovea ara Oa ve leia pekakilai. 13E va arave rare v'ila velavela leiki la eharu ara laria leikilai, ehovea Oa Akore v'ila lei morapaeakilai. 14E va arave rare v'ila eharu velavela la leivahaeakilai, ara leikilai.

Ove Veveke ve okoare

15E va araro ikiheroe la leikilava e va arave pupu kiva leivahaeakilai. 16Ara Oa ve ivaiva leikilai — are ero Hakakaeaki haela ae avarakilai. Are e i mea oaria aeakilai. 17O iele ove havahu la. La ove meahaiapo ava va ka, ehovea are arero eava va ka kai arero kara ore va ka. E va arero ore, ehovea are e i hareho aeavila — are eve ureve aeakilai.

18Ara ero naoae naoae haitapa va ka — ara eve leia ekekilai. 19Haiapo ka meahaiapo araro eava va ka: aka e araro eavakive: ara ovokake leikilai, laelave e kara ovokake leivahaeakilai. 20La hoa e va ore leivahaeakilai, ara Oa ve ureve aeavila, e va arave ureve aeavila, ara eve ureve kara aeavila. 21Arave pupu oharo iapai kiva leiki la haela are araro ikiheroe iele leivila. Araro ikiheroe leivila la haela, arave Oa kara arero ikivere leikilai: ara kara arero ikiheroe lei ara va areve oropa ve hihika leikilai. 22Judas (Iscariot ka) arero maeape, Amua, learia, a va elave oropa hihika leikilai, aka meahaiapo ve oropa va ka. 23Iesu arero kavale maeape, Haela araro ikivere la leikilava, arave oharo kara are iapai kiva leikilai, arave Oa kara arero ikivere leikilai. Elalila areve leia hoahukakilai, are i hareho apeakilai. 24Araro ikivere leiki aue la haela, arave oharo kara iapai kiva lei va ka. E va iapailula la oharo arave oharo ka, araro kiparaeape Oa ve oharo.

25Ara e i hareho aeavila ma oharo ero lamaeaeaila. 26Aka Hakakaeaki haela, Oa arave rare ve kiparaeaki la Ove Veveke la, are ero eharu oaria kileavahaeakilai, aeva ara ero maeaeape oharo oaria are ero ikikekelakive koarakilai.

27Havila ara e v'ila hakurepakilai: arave havila ara ero avarakilai. Meahaiapo avaraki la havila hovea ara ero avara va ka: e va ikihorahora kalailue, oaoka kara kalailue. 28E va arave oharo iapai — ara aukilai kai aireaki ekekilai. E va araro ikiheroe iele va lailava, e va ikiveveke le leivahaeakilai, ehovea ara lamaeaila — ara Oa ve leia aukilai. Ehovea arave Oa va eapapo, ara va hekai.

29Ara ero mahau oropa lamaeaila eharu aireaki horeavakilai. Laelave eharu kihoreavaki la hoa e va iki kelavakilai. 30Aireaki ara e i hareho oharo oaria hukavava ka, ehovea ma meahaiapo amua ekekilai. Are ara ila horova leikive hoveahovea va ka. 31Kahara, ehovea meahaiapo ore leikilai, ara Oa ikivere leivila, aeva Oa araro maeaeape la horova ara laria leikilai. Urahukaila, elaviila hoahukakilai.

Currently Selected:

John 14: ORO

Highlight

Copy