Genese 42

Iosepa ve huhohoaha Aigupito hoahukape

1Iakobo ore leipe, Aigupito leia eapai ila, are akoremari maeaeape: “E va elarelare ovohae eavaki ehovealeve ha;” 2Are kai maeaeape: “Iapai, ara ore leipe, Aigupito va koni ila? e va leia hoahukakive elaviilave koni uku ilaea leikive, ehovea elaviila lei ovokake leivahaeakive, elaviila apihaeaki ave.” 3Laelave Iosepa ve huhohoaha 10 ila Aigupito leia koni ilaea leikive hoahukape. 4Aka Iakobo Iosepa ve akoreheari Beniamina huhohoaha ila au paraeaila, ehovea are oaoka are leia heaha koaraki ave. 5Laelave, Iseraela ve akoremari leia ilaea leikive hoahukape, aeka haela oaria la hoa haroapo, ehovea Kanana ita leia kara hohera leipe.

6Iosepa va la ita ve amua haela leipe; are havahu ita haela oaria ve ilaea leiki horova kiva leipe. Iosepa ve huhohoaha iki areve leia, areve oropa ve mea ve ekakaopape. 7Iosepa areve huhohoaha ovohae eavi ore leivahaeape, aka are erero ita lahua haela hovea hiki leivahaeape, kai erero iki heaha oharo maeaeape maria: “E va lahoa ve leikevahaeaila ha?” Ere maeape: “Ela Kanana la ita ve leikevahaeaila, ehovea eapai ilaea leikive.” 8Laria, Iosepa areve huhohoaha ore leivahaeape, aka ere arero ore au leila. 9Iosepa iki alalape, are ere v'ila ivahi eavavahaeape; are kai erero maeaeape: “E va ita muruhari eavaki haela, e va ikivere elave ita korea ve ovohae eavakive.” 10Ere arero maeape: “Ka, elave amua e, aka ave horova haela va eapai ilaea leikive ekevahaeape. 11Ela haela haroapo ve akoremari, ela va mai ehoe haela, ave horova haela va ita muruhari eavakive haela ka.” 12Are erero maeaeape: “Ka, e va ekevahaeape iele ehovea elave ita muruhari eavakive.” 13Ere maeape: “Ela, ave horova haela, va apoheari 12 ila, Kanana ita aeavila haela haroapo ve akoremari; iapai, akoreheari va elave oa i hareho aeave, akore haroapo aea va ma hoa karia.” 14Kahara, Iosepa erero maeaeape: “Ara lamaeaila la oharo va iele, e va ita muruhari ovohae eavaki haela. 15Eve heheavaki oki ma, Parao ve ovokake ve, e va ma ita harepa va ka aiai eve akoreheari maia ekekilai. 16Eve haela ae paraeakive, eve la akoreheari lai ekekive, e kepea haela uvi muru ureve apeakilai, eve oharo ve iele laria lei heheavakilai, e iele a ka opore. Leiki aue la leikilava Parao ve ovokake v'ila, e va ita muruhari eavaki haela.” 17Are erero hareho hoa haroapo uvi muru paparaehape, ere hare ilehoila apeape.

18Hare ilehoila la hare Iosepa erero maeaeape: “E va maria la leikilava, e va ovokake leivahaeakilai, ehovea ara Aualari kekelavila, 19e va mai ehohoe la leivahaeakilava, eve haela haroapo uvi muru hiki aeakilai, e kepea haela eve koni eve lalava haela ve eroa hukapakive aiaukive. 20Eve la akoreheari arave maia lai ekekive, eve oharo lei iele leikilai, e kai apihaea va ka.” Ere laria leivahaeape. 21Ere kai elarelare oharo hukavape maria: “O iele, elaviila ve haiae mehau ila, ehovea elaviilave akoreheari, ehovea elaviila areve heraho ovohae eavavahaeape, are elaviilara here leivahaeape la hoa, elaviila areve oharo au iapaila; ehovea la, elaviila ma heraho le koara.” 22Reubena kai erero maeaeape: “Ara ero au maeaeaila ha, akoreheari lei haiae lei v'arekaea? Aka, e va arave oharo au iapaila. Ma hoa elaviila haiae ve kavale apu v'ila leivahaeakilai.” 23Ere haveva Iosepa ereve oharo ore leivahaeape, ehovea areve aru ve uri helariki haela epavape. 24Kahara, are ukai helari hi ape; aire are aeka ereve ukai helari oharo maeaeape. Are Simeona hareavi ereve oropa ve le hahape.

Iosepa ve huhohoaha helari auvahaeape.

25Iosepa areve horova haela maeape, ereve hurua koni ila heheloekoakive, ereve la moni aeka ereve eapai hurua ureve loarakive, aeka erero hahi ve eapai uku aiarakive. Ere v'ila lahovea leipe. 26La hoa ere va ereve koni hurua asini ve kaikava akea ve hahai auvahaeape. 27Ereve haela ae iki paraeaki ita leia areve hurua hapape ehovea asini ve eapai aiarakive, la hoa are areve la moni hurua ve ape ureve ovohae eavape; 28are areve apoheari maeaeape: “Ere arave moni aeka le aipe, are arave hurua ape ve me aeave!” Ere oaria iki le ihahape, ere kai maea paiala paiala leivahaeai elarelare oharo hukavape, “Aualari elaro learia laleivahaeaila, ha?”

29Ere ereve oa Iakobo, Kanana ve ita leia kihorerape la hoa ere koaravahaeape la eharu oaria arero maria maeape: 30“La haela, la ita ve amua haela, elaro oharo aheke maeaeape, kai elaro ita muruhari eavaki haela rare kelavape. 31Aka ela arero maeape, ‘Ela va mai ehohoe haela, ela va ita muruhari eavaki haela ka; 32ela va apoheari 12 ila, oa haroapo ve akoremari, haroapo karia le leipe; akoreheari Kanana leia elave oa ve ita le aeave.’ 33La haela, la ita ve Amua, elaro kimaeaeape, ‘E va mai ehohoe haela la, ara maria ore leikilai; eve haela ae arave maia hakurepa, eve lalava haela ve eroa ve la eapai aiaukive, elare oki auila. 34Eve la akoreheari arave maia lai ekeki, laria ara ore leikilai, e va ita muruhari eavaki haela ka, aka mai ehohoe haela, ara kai eve apoheari paraeakilai, e kai ma ita kakavae horova leivahaeakilai’.”

35Ere hurua hapape ehovea eapai kakaitakive la hoa, iapaila, haela oaria ve moni hurua ape ve le aepavahaeape; ere i ereve oa ila ovohae eavape la hoa ere iki horahora eapapo leivahaeape. 36Ereve oa Iakobo erero maeaeape: “E va arave akoremari orahokaila hareavape: Iosepa karia le leipe, Simeona karia leipe, ma hoa e va ikivere Beniamina kara hareavakive; ara va ma heraho oaria le koarai.” 37La hoa Reubena areve oa maeape: “Ara arero lai kihoauki aue la leikilava, arave akoremari orahokaila haeakive; arero arave mai ve avikiara, ara arero ave maia lai kihoaukilai.” 38Aka are maeape: “Arave akore e i hareho hoau va ka; ehovea areve akoreapo le apape, are hiki aeavila. E leikilai la hahi are heaha la koarakilava, e va arave ma haro harita heaha lei kapu ita havahu le paraeakilai.”

Currently Selected:

Genese 42: ORO

Highlight

Copy