Genese 41

Iosepa Parao ve ivahi ve iele hihika kileape

1Hitolo orahokaila karia leipe la hoa, Parao ivahi mari eavape: Are Nile mai poe ve epavape; 2iapai, Nile mai ve boromakau kapare i maea mekaka 7 ila kivikavahaeape; ere mehere ureve eapai lalavahaeape. 3Iapaila, Nile mai ve boromakau pepekeke i maea heaha 7 ila ereve aire ve kivikavahaeape; ere oropa la boromakau 7 ila Nile ve mai poe ve maeamaea epavape. 4Pepekeke i maea heaha ila la boromakau maea kapare i mekaka ila la boromakau 7 ila le lakarape. Kahara, Parao lei ovokake leipe. 5Are aeka avuku uavi ivahi aea eavape; eavaila, wheat hae paraeapo i mekaka ila 7 ila ikupa haroapo hahaeape. 6Eavaila, wheat hae pepekeke i heaha ila ereve aire huhoreavape, kauri la mea lei heaha leivahaeape wheat hae. 7Maea pepekeke la wheat hae, maea paraeapo la wheat hae hoa haroapo iropi le lakarape. Parao ovokake lei ore leipe are va ivahi hiki. 8Laelave, la opoa vevelare areve iki ureve heraho leipe; are Aigupito ureve la harea haela i ikiore haela oaria itavavahaeape; Parao areve ivahi erero kileavahaeape, aka ere oaria Parao ve la ivahi ve iele maeaki ore au leila.

9 Wine horova kiva haela Parao maeape: “Ara mahau arave haiae iki le kekela. 10Parao elare horova haela hihiri leipe, kai ara i pai aveaki horova kiva haela ila hevehe haela ve kapena ve uvi kiva leivahaeakive paraeape la hoa, 11elalila oroa haroapo ivahi lahua lahua eavape, la ivahi lahua lahua ve iele kara lahua lahua. 12La hoa Heberu harokou haela ela i hoa haroapo aeape, are uvi muru kiva haela ve kapena ve horova haela; elalila arero maeape la hoa are elalilave ivahi ve iele hihika kimaeape, elarelare ivahi hovea hovea. 13Are elalilara maeaeape la oharo iele, aireaki hovea hovea horerape; a araro va horova ve aeka paraeape, pai aveaki horova kiva leiki la haela a airovo le avikape.”

14Parao Iosepa lai ekekive oharo paraeape, ere kai arero elavelave uvi muru ve lai hoaupe; are auhare koro mai, pura āre kohahai, Parao oropa ve epavape. 15Parao Iosepa maeape: “Ara va laeavila la ivahi ve iele arive haela oaria ore au leivahaeakue; ara a v'ila la iapaila, a va ivahi oharo iapaki la hoa a va areve iele arive ore.” 16Iosepa Parao kavale maeape: “Ara havahu ka; Aualari Parao ve kavale veveke maeakilai.” 17La hoa Parao Iosepa maeape: “Iapai, arave ivahi ureve, ara Nile mai poe ve la pavila; 18boromakau kapare i maea mekaka ila 7 ila, Nile mai ve leia la kivikavahavaila; ere mehere ureve eapai la lalavahaeaila; 19aeka boromakau pepekeke i maea heaha ila 7 ila, ereve aire la kivikavahavaila; ara lahovea boromakau Aigupito ita oaria overa au eavaila. 20Pepekeke i maea heaha ila la boromakau, kapare i maea mekaka ila la boromakau le lakaraila, 21aka ere la lalavahaeaila la hoa, aire ere lalavahaeaila la maea haela ore au leikue, ehovea ere va oropa la maea pepekeke hovea laleivahaeaila. Kahara, ara ovokake laleila. 22Ara aeka ivahi hoa eavape, wheat hae kapare i mekaka ila 7 ikupa haroapo akea ve huhoreavape; 23aeka wheat hae pepekeke i heaha ila, kauri mea koape wheat hae hovea, 7 ila, ereve aire huhoreavape; 24pepekeke la hae 7 ila, mekaka ila la hae 7 ila iropi la lakaraila. Ara harea haela maeaeape, ere oaria la ivahi ve iele arive ore au leivahaeakue.”

Ivahi ve iele

25Iosepa Parao maeape: “Parao ve la ivahi ve iele haroapo; Aualari areve aireaki leiki eharu Parao hihika la kileaila. 26Boromakau mekaka 7 ila va hitolo 7 ila, kai wheat hae mekaka 7 ila va hitolo 7 ila; ivahi ve iele haroapo hiki. 27Pepekeke i maea heaha ila la boromakau 7 ila va hitolo 7 ila: pepekeke i heaha ila, kauri mea heaha la leivahaeaila la wheat hae va hohera leiki hitolo 7 ila. 28Ara Parao lamaeaila la oharo hovea, Aualari ve aireaki leiki eharu, are Parao la kileaila. 29Maea maea hitolo 7 ila eapai maeakoko koarakilai, Aigupito ve ita oaria hareho, 30aka aireaki la hitolo 7 ila mea hohera eapapo leikilai, eapai oaria la hitolo haela haveva leivahaeakilai, Aigupito ve ita oaria ureve, la hohera ita eapapo hoa haroapo leikilai. 31Eapai maeakoko ita oaria ere haveva leivahaeakilai, ehovea aireaki la hohera hoa, ehovea la hoa va heraho eapapo iele leikilai. 32Parao ivahi orahokaila laeavila ve iele maria, la va Aualari ve ikivere okiharo, are kai haiapo ka, o iele leikilai. 33Laelave, veveke maria, Parao va ikiore i ikikekela veveke ila haela haroapo hareavakive, ehovea Aigupito ita hoa haroapo ovopakive. 34Parao aeka ita ve hiru lahua lahua ve kiva haela maeaeaki, ere Aigupito la mea ve la eapai hamureai hiru 5 ila mekaka la hitolo 7 ila ureve, are va hiru haroapo kaivi kiva leikive. 35Ere la hitolo mekaka ve eapai hoa haroapo korukaiakilai; wheat hae oaria Parao havahu kiva leikilai. 36Ere va la eapai kiva leikilai, ehovea aireaki hohera ila la hitolo 7 ila, Aigupito la ita oaria ve koarakilai, hohera hoa haela oaria apihaeaki ave.”

Iosepa Aigupito ve Amua leipe

37Parao i areve horova haela oaria ila ma okiharo ikivere leivahaeape. 38Parao areve koaraki haela maeaeape: “Aualari ve Ove ila mahovea haela elaviila koarakilai ha?” 39Laelave, Parao Iosepa maeape: “Ehovea Aualari ma eharu oaria aro lakileaila, ikiore i ikikekela veveke ila haela ae karia, a hiki; 40a arave uvi kiva leikilai, arave haela oaria ave oharo hiki iapai leivahaeakilai; terona akea ve hiki ara ave akea ve.” 41Parao Iosepa maeape: “Eavaki! Ara Aigupito ita hareho aro avilarila, ehovea kiva leikive.” 42La hoa Parao areve mai lekoka ve la maimari hareavi, Iosepa ve mai lekoka orape, areve maea pura mekakure kohahape, kai gold ela haroapo areve karave heropape; 43are arero areve aire la kariota horeakive maeape; ere areve oropa ve āra hai itavape maria: “Loa ari ekaopaila!” Laria are arero Aigupito la ita hoa haroapo ve kiva haela leipe. 44Parao aeka Iosepa maeape: “Ara va Parao! a maeaki aue la maeakilava, Aigupito ita oaria ve haela mai aka loa hara urahuka va ka.” 45Parao Iosepa rare Sapenata?-?panea rare itavape; are Ona ve oharo haela Potipera ve mari Asenata uva ve avarape. Kahara, Iosepa Aigupito la ita ve oki lahua loa veavelaripe.

46Iosepa Aigupito ve king, Parao, ve horova ipopeavape hoa areve hitolo 30 ila. Iosepa Parao ve leia hoai Aigupito la ita hareho loa veavelaripe. 47Hitolo mekaka 7 ila hoa, oru eapai maeakoko leivahaeape. 48Aigupito ureve la hitolo mekaka 7 ila la hoa, are eapai oaria karikara ureve korukaiavahaeape, oru oaria ve la eapai oaria ereve maeamaea la karikara ureve korukaiavahaeape. 49Iosepa koni maeakoko korukaiavahaeape, ahea ma ve la kekele hovea, areve numera au koaila, ehovea areve numera kaoakive hovea au leila.

50Hohera la hitolo aireaki, Iosepa akoremari orahokaila oropa erape; Ona ve oharo haela Potipera ve mari Asenata are v'ila epape. 51Iosepa akoare koare rare Manase rare itavape; are maeape: “Ehovea arave heraho oaria, kai arave oa ve lalava haela Aualari araro lei haveva la leipe.” 52Aire la akore are rare Eparaima rare itavape, “Ehovea ara heraho leipe la ita Aualari araro lei veveke leipe.”

53Aigupito la ita ureve eapai oaria la hitolo mekaka 7 ila karia le leivahaeape. 54Hohera eapapo la hitolo 7 ila le ipopeavape, Iosepa maeape oharo hovea hovea. Ita oaria hohera leivahaeape, aka Aigupito la ita oaria va pai ila. 55Aigupito haela oaria eroa haeai Parao ve leia eapai v'ila hivavara avahaeape la hoa, Parao erero maeaeape: “E va Iosepa ve leia auvahaeaki, are ero maeaeaki hovea, leivahaeaki.” 56Laelave, ita oaria hareho hohera eapapo leipe la hoa, Iosepa la eapai uvi hapape kai Aigupito haela ilaea leivahaeape, ehovea Aigupito la ita oaria hohera heaha eapapo leipe. 57Aeka, ita lahua lahua haela kara Aigupito Iosepa leia eapai ilaea leivahaeakive auvahaeape, ehovea meahaiapo ita oaria hohera heaha eapapo leivahaeape.

Currently Selected:

Genese 41: ORO

Highlight

Copy