Genese 40
40
Iosepa uvi muru haela ve ivahi ve iele kileape
1Aireaki, hoa aea, Aigupito ve king ve wine kiva haela, kai pai aveaki horova ve kiva haela, arero lei iki heaha leivahaeape. 2Parao areve horova kiva haela orahokaila, wine karikiki haela ve kiva haela i pai aveaki haela ve kiva haela ila hihiri leipe, 3laelave are erealilara uvi muru kiva haela ve uvi paparaehape ehovea kiva leikive, Iosepa aeape la ita ve. 4Hevehe haela ve kapena Iosepa erealilara kiva leivahaeakive maeape, kai are erealilara kiva leipe; erealila hare uku leia apeape.
5Oroa aea, erealila ivahi eavape, uvi muru apeape la Aigupito king ve wine kiva haela i pai aveaki haela ila; erealila ivahi lahua lahua eavavahaeape, la ivahi ve iele kara lahua lahua. 6La opoa vevelare Iosepa erealilave leia hoai ovohae eavape, erealila va iki horahora leivahaeape. 7Laelave, are Parao ve uvi au hahaeai apeape la horova kiva haela velavela leivahaeape: “Ealila ve oropape ikihuru hovea ehovealeve ha?” 8Erealila maeape: “Elalila ivahi laeavila, la ivahi ve iele maeaki haela karia.” Iosepa erealilara maeape: “Ivahi ve iele maeaki haela va Aualari hiki ka ha? Ivahi hela araro kimaeaki.”
9Laelave wine kiva leiki haela areve ivahi Iosepa mari maeape: “Arave ivahi ureve vine kora arave oropa ve lepavila, 10la vine kora ve mamaeako ilehoila; rorore loavila la hoa areve pupuri hulahoreavila, kai haiapo ka vine hae iele hovare le la leivahaeaila. 11Parao ve hekako ara mai le lapaeaila; ara vine hae hovare kaivi haipekeavi vine apu hekako ve lakaitavila, kai la hekako Parao ve mai ve avilarila.” 12La hoa Iosepa arero maeape: “Areve iele ma: Mamaeako ilehoila va hare ilehoila; 13hare ilehoila karia leiki la hoa, Parao ave haro urapai aro aeka horova leikive maeakilai; a overa leipe hovea, a va areve la wine kiva leipe la hoa, lahovea a va aeka Parao ve hekako areve mai ve avarakilai. 14A hela lei veveke leiki la hoa, araro ikikekela, araro ikiheroe hela leiki, arave rare Parao kileakive hela, ehovea ara ma uvi muru hakurepakilai. 15Ehovea ere o iele araro Heberu haela ve ita ve korea lai kihoaupe; aeka, ara va araro uvi muru paraeakive hovea haiae au leila.”
16Pai aveaki horova kiva haela eavape la ivahi ve iele va veveke, are Iosepa mariape: “Ara kara ivahi laeavila; ara va haro akea pai hara ilehoila oraeavi laila, 17akea ve la hara va pai hirore lahua lahua oaria ila, ehovea Parao aiarakive, aka arave haro ve la hara ureve pai ori oaria le lakaraila.” 18Iosepa kavale maeape: “Ivahi ve iele ma: hara ilehoila va hare ilehoila. 19Hare ilehoila karia leiki hoa, Parao ave haro urapai haerapakilai, are aro kora akea ve airovo avikakilai; ori ave aivau le lalavahaeakilai.”
20Hare ilehoila karia leipe la hoa, Parao ve epape hare ve hurae, are horova haela oaria ve hurae eapapo leipe; are wine kiva haela i pai aveaki haela ila ve haro, are horova haela ve aru ve urapape. 21Are wine horova kiva haela aeka areve la wine horova kiva leikive maeape, are kai aeka hekako Parao ve mai ve avarape. 22Aka Parao pai aveaki horova kiva leiki la haela airovo avikape, Iosepa erealilara ivahi ve iele kileape hovea hovea. 23Aka wine horova kiva haela Iosepa iki au kekelaila; are arero iki hoapape.
Currently Selected:
Genese 40: ORO
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
