Genese 43

Iosepa ve huhohoaha i Beniamina ila Aigupito hoahukape

1Ita hohera eapapo leipe. 2Ere Aigupito avikepe la eapai karia leipe la hoa, ereve oa erero maeape: “E va aeka hoahukaki elaviila ve eapai perehekai ilaea leikive.” 3Aka Iuda arero maeape: “La haela elaro oharo aheke iele kimaeaeape maria; ‘E va akoreheari lai ekeki aue la leikilava, e va arave oropape eava va ka.’ 4A va elave akoreheari ela i hoa haroapo la kiparaeakilava, ela ave eapai ilaea leikive hoahukakilai, 5aka a va arero kiparaeaki aue la leikilava, ela hoahuka va ka, ehovea la haela elaro kimaeaeape, ‘E va akoreheari lai ekeki aue la leikilava, e va arave oropape eavavahaea va ka’.” 6Iseraela maeaeape: “E va la haela akoreheari ve oharo maeape kai laria araro lei heaha leipe, ehovealeve ha?” 7Ere kavale maeape: “La haela ela i elave lalava haela oaria v'ila velavela auhohi leivahaeape maria: ‘Eve oa ovokake aeavila ha? E va aeka apoheari ila ha?’ Ela va arero maeape oharo va ma eharu ve kavale hiki. Ela learia lei ore leivahaeakilai, are maria maeaeakilai, ‘Eve akoreheari lai kihoaukive’?” 8Iuda areve oa Iseraela maeape: “Akore ara i hareho la kiparaeakilava, ela urai auvahaeakilai, elaviila lei ovokake leivahaeai apihaea va ka, a, kai ela, kai elave akoremari titaeka kara. 9Ara havahu arero kiva leiki okoare ave; a va arave mai ve arero velavela leiki. Ara arero ave mai ve lai kihoai ave oropa ve paraeaki aue la leikilava, ara va mea oaria la haiae ve mehau avakilai, aiai karia lei va ka. 10Ela va haiapo iele kari, hahi orahokaila hovea leiki aue la leikilava, ela va hoa orahokaila overa helari ekevahaeape.”

11Ereve oa Iseraela maeaeape: “Oki aea karia ha! E va maria leikive heroe; elave ita ve kora hae mekaka eve hurua ureve loaraki, la haela ve meru hovea oraiavi auvahaeakive, amare, heroko kapare, muro, kora hae lahua lahua kara. 12Moni ve hiru orahokaila aiaukive; e hurua ureve helari aikepe la moni kavale kara aiaukive; ore ka, ere iki hoapape la. 13Urahukaila, eve akoreheari kara, ma haela ve leia lai hoaukive. 14Ma haela oropa ve, Aualari ero ikihuru leivahaeaki, are eve la apoheari i Beniamina ila helari kiparaeakilai. Arave akoremari la titavakilava, ara le apakilai.” 15Laelave, la haela meru i moni ve hiru orahokaila i Beniamina ila hoa haroapo kailape; ere urahuka Aigupito leia hoahukai Iosepa oropa ve le epavape.

16Iosepa Beniamina ere i hareho ekevila eavape, la hoa are areve uvi kiva haela mari maeape: “La haela uvi ureve kari kihoaukilai, animala haroapo ha, eapai veveke karikikive; ehovea la haela hare hihi hoa ara i hareho eapai larilai.” 17La haela Iosepa arero maeape hoveahovea leipe, are la haela Iosepa ve uvi ureve kari hoahukape. 18La haela lei oaoka leivahaeape, ehovea are erero Iosepa ve uvi ureve kari hoahukape, ere kai mariape: “Ehovea ere elaviilave hurua oropa la hoa aihahaitape la moni, ere elaviilara uvi ureve kari kihoahuka; are va ikivere elaviilara hahaeaki oki aea avakive; ere elaro haiae, au hahaeaki haela leivahaeakilai, kai elaviilave asini ere le aeakilai.” 19Laelave ere Iosepa ve uvi kiva haela ve leia pekahavi uvi ve okiape maeamaea leia maria maeape: 20“Elave amua e, ela oropa hoa eapai ilaea leikive kihoahukape; 21ela va ikiparaeaki ita ve ekepe la hoa ela hurua hapai ereve ape ureve elarelare moni haroapo le koarape, elave la moni hovea hovea, laelave, elave la moni hovea hovea, laelave, elave la moni aeka avikepe. 22Ela va moni aea kara avikepe, ehovea ma hoa ve eapai ilaea leikive. Ela ore ka, elave la moni hurua ureve leita aihahaitape.” 23Are erero kavale maeaeape: “Ikihorahora aea oaoka kalaivahaelue: eve Aualari i eve oa ve Aualari ila eve la moni eve la hurua ureve e v'ila aihahaitape la; ara eve moni koarape.” La hoa are Simeona ereve leia ve lai kihoaupe. 24La kiva haela la haela Iosepa ve uvi ureve kari hoahukape la hoa, are erero ma aiarape; ere elare loa huhela, asini eapai aiarape; 25aireaki ere Iosepa ve hare hihi ekeki hoa la kari, areve meru eharu karikipe, ehovea ere iapape ere leia eapai larilai.

26Iosepa kihoaupe la hoa, ere are v'ila avikepe la meru eharu ere uvi aipekape, kai areve oropa ve mea ye ekakaopape. 27Are ereve maea ve apevelavela leipe kai mariape: “Eve oa veveke ha, e araro kimaeape la haela eapapo ha? Are ovokake ila ha?” 28Ere maeape: “Ave horova haela, elave oa, veveke aeave, are kai ovokake ila.” Ere kai haro ekakaopi arero morapaeape. 29Are ovohae iupe areve akoreheari, areve lou ve akore, Beniamina, eavi mari maeape: “Ma va e araro kimaeape la akoreheari ha? Akore e, Aualari aro lei veveke leiki!” 30Kahara, ehovea are areve akoreheari ikihuru eapapo leipe, Iosepa elavelave hi arive ita haropape. Are kai elare lalava ureve hoai hi eapapo ape. 31Aireaki are areve oropape ma huhela elare oropape lei ehoe lei mariape: “Eapai aipeki.” 32Ere areve eapai lahua leipe, kai la haela kara lahua leivahaeape. Aeka are i hareho eapai lalavahaeape la Aigupito haela lahua leipe, ehovea Aigupito haela i Heberu haela ila hoa haroapo eapai lalavahaea va ka, ipi la mai va Aigupito haela ve pupu ila. 33Ere areve oropa ve avape, hoa hoa ila, akore koare oropa, areve ahea ve hovea, aiai akoreheari areve aireaki ahea hovea. La haela oaria elarelare ovohae eavape, iki horahora eapapo ila. 34Iosepa areve la haha akea ve eapai ukuku ereve leia paraeape, aka Beniamina ve eapai hiru eapapo, ereve hiru 5 ila hovea leipe. Ere are i hareho ma lala iki veveke le leivahaeape.

Currently Selected:

Genese 43: ORO

Highlight

Copy