Genese 25

Aberahamo i Ketura ila ve meavohula

1Aberahamo uamari aeva laeape, areve rare va Ketura. 2Are epape akoremari va Simerana, Iokesana, Medana, Midiana, Isabaka, i Sua ila. 3Iokesana va Sieba i Dedana ila ve oa. Dedana ve akoremari va Asurima, Letusima i Leumima ila. 4Midiana ve akoremari va Epa, Eperi, Hanoka, Abida, i Eleda ila. Ma oaria va Ketura ve akoremari. 5Aberahamo eharu oaria Isako aiarape. 6Aka areve aireaki karape la uavila ve akoremari, Aberahamo meru hiki aiarape, areve apaki hoa maea maea la hoa are la akoremari arai ve paparaehape, Isako maea maea ka, kauri ukaki ve la ita.

Aberahamo api kai karu ihape hari

7Ma va Aberahamo ve ovokake ve hitolo oaria ma, hitolo 175. 8Aberahamo oalou le leipe, kai hitolo oaria ila le apape; are kai haela eapapo, hitolo maeakoko; ere kai arero elare ita ve leia karu ihape. 9Areve akoremari, Isako i Isamaela ila, have ura rare Makepela karu ihape, Eperona, Sohara, Hiti haela ve oru ureve, Mamere ve kauri ukai ve; 10La kekele ve Aberahamo Hiti haela ilaea leipe. Ere Aberahamo areve uva Sara i hareho koru ihape. 11Kahara, Aberahamo oropa apape, aireaki Aualari areve akore Isako lei morapaeape. Isako Beera‐lahai‐roi aeaveape.

Isamaela ve meavohula

12Aberahamo ve akore, Isamaela, Hagara Aigupito uamari, Sara ve horova uamari, Aberahamo epape akore, Isamaela ve meavohula ma. 13Isamaela ve akoremari ve rare ma: Akore koare epape aiai aireaki erape la akoremari: Nebaiota, Isamaela ve akore koare, aireaki Kedara, Adabela i Mibisama ila, 14Misima, Duma i Masa ila, 15Hadada, Tema, Ietura, Napisa i Kedema ila. 16Ma va Isamaela ve akoremari, ereve rare rare ma, ereve karikara karikara ve, ereve apearoape hoa ve, eravo oropa haela 12 ila, ereve koru ipi ve hoa. 17(Isamaela ve ovokake hitolo hovea ma, hitolo 137 ila; areve ove karia lei le apape, kai lalava haela ve la kapu ita koru ihape.) 18Ereve apeape ita va Havila aiai Sura, Aigupito ve oropa ve, Asiria ve la ukai ve; are i areve haela ila apearoape laria.

Esau i Iakobo ila erape hari

19Aberahamo ve akore, Isako ve meavohula ma; Aberahamo Isako ve oa, 20Isako Rebeka laeape hoa are va hitolo 40 ila; Rebeka va Betuela Padana‐arama ve Aramaea haela ve mari, Aramaea haela, Labana, ve mariheari. 21Isako areve uva v'ila Iehova ve ivaiva leipe, ehovea are korovu; Iehova areve ivaiva iapape kai Rebeka ero i avi ape. 22Akoremari areve eharau mihua mahua hahari hovea leipe; are mariape: “Laria la leikilava, ara ovokake leve leikive?” Kahara, are Iehova velavela leipe. 23Iehova arero kavale maeape: “Ave eharau ureve vilaipipi orahokaila apearo, a v'ila eraki vila‐ipi orahokaila, au kovaelakilai; haroapo aheke leikilai, haroapo mahuka leikilai. Akore koare akoreheari ve horova leikilai.” 24Kahara, akoremari erape la hoa maraehae areve eharau ureve apeape. 25Akore koare ve epape hoa areve maea ovoka ai maea koro ila, koro pura hovea, laelave ere arero rare itavape rare Esau. 26Aire akore epape hoa, areve mai Esau ve loa ikipi le paeape; laelave ere arero rare Iakobo rare itavape. Akoremari erape la hoa Isako va hitolo 60 ila.

Esau akore koare ve haruku ilaea leipe

27Akoremari aheaupe hoa, Esau hahie haela aheke iele leipe, huakara veavila haela, aka Iakobo va ita hiki aeaveape haela, are ita au hiki aeaveape. 28Isako Esau ikivere eapapo leipe, ehovea are hahie mea haeape eharu lape. Rebeka Iakobo ikivere leipe.

29Hare aea Iakobo papaa mekakure aepape, la hoa Esau huakara ve kihorerape, are eroa eapapo hape. 30Esau Iakobo maeape: “Ave la papaa perehekai hela araro hivi avikiara, ehovea ara eroa havahu hahave.” (Laelave areve rare Edoma rare itavape.) 31Iakobo maeape: “Oropa ave la akore koare ve haruku araro avikiarakive.” 32Esau maeape: “Ara apaki maeamaea, akore koare ve haruku arav'ila iele le ha?” 33Iakobo maeape: “Okoare havahu arive.” Kahara, are okoare ape, kai areve akore koare ve haruku Iakobo ilaea le leipe. 34La hoa Iakobo pai i papaa ila Esau avarape, are eapai i ma ila lape kai elare oki le aupe. Lahovea Esau areve akore koare ve la haruku haure leipe.

Currently Selected:

Genese 25: ORO

Highlight

Copy