Genese 24

Isako ve uva laeaki hoa

1Aberahamo haela eapapo leipe, hitolo oaria iele; Iehova Aberahamo eharu oaria v'ila lei morapaeape. 2Aberahamo areve akea horova haela, areve uvi i eharu oaria kiva leivahaeroape la horova haela, maria maeape: “Ave mai horapai arave mauki ureve aipekive, 3a va Iehova oropa ve okoare arive, kaia i meahaiapo ila ve Aualari, a va ara aeavila ma ita haela, Kanana haela, ve mari arave akore v'ila uva kavararue, 4aka arave la ita i apavara ila kai hoaukive, leia arave akore Isako ve uva haropakive.” 5Horova haela arero maeape: “Ore ka, la mari ma ita ve arave aire ekekive haure la leikilava, ara ave akore eve oropa ekepe la ita lai aukilai ha?” 6Aberahamo maeape: “Arekaea! A arave akore leia lai au v'arekaea. 7Iehova, Kaia Akea ve Aualari, arave oa ve uvi ve kai araro epape la ita ve hareavape la Aualari, are arave okoare ape maria ‘Ara ave meavohula ma ita avarakilai’, are areve aneru ave oropa ve paraeakilai, a va arave akore ve uva leia havahu laeakilai. 8Aka la mari a i hareho ekekive haure la leikilava, a va arave ma okoare kekela ka; aka arave akore leia lai au v'arekaea.” 9Laelave, la horova haela areve mai avihorapai areve haelapo Aberahamo ve mauki ureve aipepe, kai eharu ve okoare ape.

Rebeka

10Kahara, la horova haela areve haelapo ve kamela 10 ila ai kari aupe, are kai haelapo ve meru mekaka lahua lahua oaria aiaupe; are urai Mesopotamia ve karikara rare Nahora aupe. 11Hailaea hoa, are karikara mahokaea ve ma koru poe ve are kamela loa ari hukakaraupi haiavaki leipe, uavila ma hihukakive hoahukape la hailaea hoa. 12Are kai maeape: “Iehova e, arave haelapo Aberahamo ve Aualari, ma hoa hela araro hukapakive, ara aro here leive; a arave haelapo Aberahamo ikiheroe eapapo leikive. 13Eavaki, ara ma karu maeamaea ve peave. Ma karikara haela ve marita ma hihukakive la kihoahukakilai. 14Ara mari ae maria maeakilai, ‘A hela ave hahu mea ve aipa, ehovea ara ma larilai’; are kavale la maeakilava, ‘Ma larive, kai ara kamela kara avarakilai’, la mari va iele ave ikikekela ave horova haela Isako laeakilai. Ara ore maria leikilai, a va arave haelapo ikiheroe eapapo iele leivila.”

15Are la oharo a, haiapo ka, iapai, Betuela, Milika ve akore, Nahora ve uva, Aberahamo ve apoheari ve mari rare Rebeka, ma hahu horo ve aepai kihoaupe. 16Are ka mari veveke iele, mari popou, haela arero ore au leila. Are ma koru ve hoai ma la hivi le kai kivikape. 17La horova haela vivila arero mari maeape: “Ave la hahu ve ma perehekai hela araro avikiarakive, ehovea ara larilai.” 18Are maeape: “Amua e, le la.” Are elavelave hahu mai pae, arero au larive avarape. 19Are arero ma oropa avarape, aireaki are maeape: “Ara ave kamela ve ma kara aiarakilai, aiai ereva ma lala hovea hukavi,” 20Laelave, are elavelave hahu ve ma kepea huhu kakaitape, kai ma koru ve ma hivakive aeka hoaupe; are ma hivape, kamela oaria ve ma hovea hovea aiarape. 21La haela muruha hiki epavi arero ovohae eavape, ehovea ore leikilai Aualari areve hahi iele hukapape la.

22Kamela oaria ma lala karia leipe la hoa la haela gold maimori, mehau sekela hapu hovea, kai mai kae orahokaila, mehau gold sekela 10 hovea, kailape, 23are kai maeape: “Araro kimaeaki, a va leita ve mari ha? Ave oa ve uvi ureve ela va apeaki ita hovea hovea ha?” 24Are maeape: “Ara va Milika, Nahora ve epape akore, Betuela ve mari.” 25Are aeka maeape: “Ela va kora eroe i eapai ila hovea hovea, kai apeaki ita hovea hovea.” 26La haela haro ekaopi Iehova morapaeape, kai mariape: 27“Iehova, arave haelapo Aberahamo ve Aualari lei morapaeaki, kai areve mai ehoe karia au leila. Ikiveveke, Iehova araro lai ikiki arave haelapo ve apavara ve uvi ara le koarai.”

28Kahara, la mari harava vivila areve lou i lalava haela oaria ila ma eharu kileavahaeape. 29Rebeka ve loare ila rare Labana; Labana harava vivila hoai ma karu leia la haela koarape. 30Are maimori eavape kai areve mariheari Rebeka ve mai ve la mai kae, aeva mariheari Rebeka ve oharo iapape maria: “La haela araro maria lakimaeaila”, la hoa are la haela ve leia hoaupe; iapai, la haela i kamela ila ma karu poe ve epavape. 31Are maeape: “Kihoaukive, Iehova ve lei morapaeaki haela; a va mahokaea ve hiki peavila ehovealeve? Ara va uvi ita overa kariki, kai kamela ve ita kara.” 32Laelave, la hilavila uvi pekape; Labana kamela helaukape, kai arero kamela ve kora eroe i eapai ila aiarape; are ma avarape, ehovea areve loa ma huhelakive, kai are i hareho ekevahaeape la haela ve loa kara. 33Ere eapai areve oropa ve aipeaupe; aka are maeape: “Ara oropa eapai le va ka aiai ara ero overa kileape arave hahi ve iele.” Are maeape: “Oharo arive.”

34Laelave are maeape: “Ara va Aberahamo ve horova haela. 35Iehova arave haelapo lei morapaeape, are iki amua haela le leipe; boromakau i mamoe hiru oaria, silver i gold ila, horova haela i marita ila, kamela i asini ila, Aualari arero aiarape. 36Aeka Sara, arave haelapo ve uva, lauapau hoa Aberahamo v'ila akore epape; are areve eharu oaria arero aiarape. 37Arave haelapo araro ape karava maeape maria: ‘A va arave akore ve uva va Kanana haela ve mari kalailue, ara aeavila ma ita ve, 38aka a va arave oa i apavara ila ve ita aukive, leia ve arave akore ve uva laeakive, heroe’, 39Ara arave haelapo maria maeape: ‘Ore ka, la mari araro koarai eke va ka’. 40Aka are araro kimaeape: ‘Iehova, arave oropa veavila la Iehova, areve aneru a i hareho paraeakilai, ehovea aro hukapakive; a va arave akore ve uva, arave apavara i oa ve uvi leia ve hareavakilai; 41a va arave apavara ve leia aeaki hoa, a va okoare hapururukaki hoa va la. Ere mari aro avara va ka, laria kara, ave okoare le hapururukakilai.’

42“Ara mahau ma koru poe ve leikila kai arave oharo maria, ‘Iehova e, arave haelapo Aberahamo ve Aualari e, a va mahau arave okiharo la hukapakilava, 43iapai, ara ma koru poe ve peave; ma hivakive kihoauki la mari ara maria maeakilai “Ikiheroe hela, ave la hahu ve ma perehekai araro avikiarakive, ehovea larive” 44are maria la maeakilava “Lela, kai ara ave kamela kara ma aiarakilai”, veveke, la mari va Iehova ve ikivere arave haelapo ve akore avarakive.’

45“Ara la oharo a, haiapo ka, iapai, Rebeka ma hahu horo aepai lakihoaila; are ma koru hoai ma la hivaila. Ara arero lamaeaila ‘Ara hela ma larilai’. 46Are elavelave horo ve hahu aepai kai mari lamaeaila: ‘Ma la lela; ara kai ave kamela kara au larive ma aiarakilai’. Ara larila, are kamela kara ma avilarila. 47La hoa ara arero velavela lalaila: ‘A va leita ve mari ha?’ Are kavale lakimaeaila: ‘Betuela, Nahora ve akore, Milika are v'ila epape mari’, Laelave ara maimori areve overa ve laoraupila, kai mai kae areve mai la oreaila. 48Kahara, ara haro ekaopi Iehova Aualari la morapaeaila, arave haelapo Aberahamo ve la Aualari, ehovea are araro okiharo ehoe lai leikila, arave haelapo ve apavara ve mari areve akore v'ila laeakive. 49Laelave, a va arave haelapo o iele lei ehoe la leikilava, araro kimaeaki, la leiki aue la leikilava, kimaeaki; ara va mai ore ukai aka mai keva ukai ve helarikilai.”

50Labana i Betuela kavale maeape: “Ma eharu Iehova ve kihoaupe. Elalila heaha aka veveke maeaki hovea ka. 51Iapai, Rebeka ave oropa ve le peave, arero lai aukive; are ave haelapo ve akore ve uva leikilai, Iehova oharo le ara.”

52Aberahamo ve horova haela erealila ve oharo iapape la hoa, are Iehova oropa ve mea ve ekaopape. 53La horova haela silver i gold maupa eharu i pura ila kaili Rebeka aiarape; are areve akoreapo i lou ila kara kavale eapapo maupa eharu aiarape. 54Are i hareho ekevahaeape la haela ila eapai i ma ila lalavahaeape, kai oroa leia urupape. Ere vevelare urahukape la hoa, are maeape: “Araro arave haelapo ve leia helari paraeaki.” 55Mari ve akoreapo i lou ila maeape: “Mariheari hoa ka hekai aeakive, hare 10 ila hovea, aireaki aukive heroe.” 56Aka are erealilara maeaeape: “Arave oki ka hereavalue, ehovea Iehova arave oki lei veveke laleila; araro hela paraeaki, heroe; ara arave haelapo leia helari itaukilai.” 57Erealila maeape: “Elalila mariheari itavakilai, areve oharo iapakive.” 58Kahara, erealila Rebeka itavi velavela leivahaeape: “A va ma haela i hareho itaukilai ha?” Are kavale maeape: “Ara itaukilai.” 59Laelave, erealila erealilave mariheari Rebeka i areve kiva koaraki mari are i hareho paparaehape; Aberahamo ve horova haela i areve haela ila kara. 60Ere Rebeka lei morapaeai mariape: “Elave mariheari e, a va akoremari 10,000 ve thousand ve louapo leiki; ave meavohula ereve iri haela ve karikara ve oki heaorapakilai!” 61Kahara, Rebeka i areve horova marita ila urahuka kamela akea ve hita avape, kai la haela airekai auvahaeape; laelave, la horova haela Rebeka laeai elare oki le itaupe.

62Isako Beera‐lahai‐roi ve oki ekepe kai diho hoa leia aeaveape. 63Kahara, hailaea hoa, Isako uvi mahokaea ve hoaupe ehovea āra ureve iki kekelakive; la hoa are ovohae eavape, are kamela oaria ekevahaelula eavape. 64Rebeka ovohae iupepe; are Isako ovohae eavape la hoa, are kamela ve le kihoaupe. 65Are horova haela maeaeape: “Leia ve āra ureve elave ukai ekeki haela va leita ha?” Horova haela maeape: “La va arave haelapo.” Laelave are elare haro pura kaivi oropape le haritopape. 66La horova haela are leivahaeape la eharu oaria Isako maeaeape. 67Isako Rebeka areve kovo uvi lai pekape, kai arero laeape; are areve uva leipe, kai are arero ikivere havahu leipe. Laria, Isako elare lou apape la ikihuru ve are elare le hakakaeape.

Currently Selected:

Genese 24: ORO

Highlight

Copy