Genese 23

Sara ve apape hoa: Aberahamo kapu ita ilaea leipe

1Sara hitolo 127 ovokake aeaveape, la va Sara ve ovokake hitolo oaria la. 2Sara, Kiriata‐areba (rare aea va Heberona) apape; Kanana ve ita aea la; Aberahamo iki Sara v'ila ikihuru lei hi arive pekape. 3Kahara, Aberahamo areve apape uamari ve oropa ve uroupe, kai Hiti haela maeaeape: 4“Ara va ita lahua i hahi hiki leiki haela e ve aru hihi ve; araro hela ita aea avikiarakive, ehovea kapu ita leikive, laria arave apihaeape lalava haela, ara ita muruhari hovea karu ihakilai.” 5Hiti haela Aberahamo kavale maeape: 6“Amua, elave oharo iapai; a va elave aru hihi ve Amua eapapo iele, elave kapu ita mekakure aea ave ikivere hovea, ave apape uamari karu ihakive; elave haela ae a v'ila kapu ita kokauka va ka, kai ave kapu ihakive la okiharo hereava va ka.” 7Aberahamo urai Hiti haela, la ita haela la, ve oropa ve ekaopape. 8Are mariape: “E va ikivere la leikilava, ara eve ita aea arave apape uamari karu ihakive; arave oharo hela iapai, kai Eperona, Sohara ve akore velavela leiki, 9are va areve ita Makepela ve la have ura, areve oru ve kao ve aeavila la have ura, araro hela avikiarakive. Kavale hovea hovea eve oropa ve, are araro la ita avikiarakive, ehovea kapu ita iele karikikive.” 10Eperona va Hiti haela ve aru hihi ve haiavape; Eperona, Hiti haela, Hiti haela oaria oropa ve, karikara ve okiape pekahavi kihoahukaki la haela oaria oropa ve Aberahamo kavale maeape: 11“Kahara, Amua e, arave oharo iapai; ara va la ita kai areve oru ve la have ura kara ara aro avarakilai; arave haela ve akoremari oaria ve oropa ve ara aro avarakilai; ave apape uamari karu ihakive.” 12La hoa Aberahamo la ita ve haela oaria oropa ve ekaopape. 13Are kai ita haela oaria oropa ve Eperona mari maeape: “A va ikivere la leikilava, arave oharo iapai; ara va la ita kavale hovea hovea avarakilai; ara v'ila hela avakive, ehovea arave apape uamari ara leia karu ihakilai.” 14Eperona Aberahamo kavale maeape: 15“Arave Amua, arave oharo hela iapai, la kekele ita ve kavale va silver moni 400 hovea, la va elaila ve aru ve iele le ha? Ave apape uamari karu ihakive.” 16Aberahamo i Eperona ila iki hovea kelavape, laelave Eperona Hiti haela oropa ve maeape la silver, Aberahamo mehau hovea lei avarape, silver moni 400, kakavae leilula haela oaria ve la mehau hovea hovea.

17Laelave, Makepela ureve Eperona ve la ita i areve ureve la have ura ila, Mamere ve kauri ukai ve, kai areve kora oaria, areve la ita hareho la kora, 18ere Hiti haela oaria oropa ve Aberahamo avarape, karikara ve okiape pekahavaki i kihoahukaki la haela oaria ve oropa ve kara. 19Aireaki, Aberahamo areve uva, Sara, Makepela la kekele ureve la have ura ureve (Mamere ve kauri ukai ve) karu le ihape, (la va iele Heberona, Kanana la ita ve). 20La kekele i areve have ura ila, Hiti haela Aberahamo avarape, ehovea areve lalava haela oaria ve kapu ita.

Currently Selected:

Genese 23: ORO

Highlight

Copy