Genese 22

Aualari Aberahamo Isako arura mai leikive maeape

1Kahara, ma eharu karia leipe, la hoa Aualari Aberahamo au amuraeape kai arero itavape: “Aberahamo!” Are kavale maeape: “Ara ma.” 2Are maeape: “Ave akore, ave iki havahu akore, Isako, ave akore haroapo iele la, kaivaki, Moria la ita lai aukive, kai leia ara aro maeaki kela haroapo a arura haha akea ve ave la akore hekai a veakive, ehovea araro morapaeakive.” 3Laelave, Aberahamo, vevelare havahu iele, urai areve asini ve hahi maea karikipe, are kai horova harokou orahokaila kari aupe, kai areve akore Isako kara; are va a ve la a ukuku kovavaelape, kai Aualari arero maeape la ita erero kari aupe. 4Hare 3 hoa, Aberahamo ovohae iupe arae ve la ita ovohae eavape. 5La hoa Aberahamo harokou haela maeaeape: “Ealila maia apea asini kiva leikive, ara i erekai akore ila oropaki pekakilai, kai aeka kihoahukakilai.” 6Aberahamo arura haha ve la a ukuku kaivi akore le avarape, are a hari i hoi ila elare mai paeape. Laelave erealila hoa haroapo pekahavape. 7Isako areve oa Aberahamo maeape: “Arave oa!” Are kavale maeape: “Akore e, ara ma.” Are maeape: “Eavi, a hari i a ukuku ila ma; aka a veaki la mamoe akore lahoa ha?” 8Aberahamo maeape: “Akore e, Aualari havahu a veakive la mamoe akore avikiarakilai.” Laelave erealila hoa haroapo pekahavape.

9Erealila Aualari arero maeape la ita ekepe la hoa, Aberahamo arura haha leia kupe; are a ukuku akea ve korukaiape; are areve akore Isako au hahape, arero arura haha akea ve korape, a ukuku akea ve. 10La hoa Aberahamo mai horapai hoi kaivape ehovea areve akore harive. 11Aka Iehova ve aneru arero kaia ve itavape maria: “Aberahamo, Aberahamo!” Are kavale maeape: “Ara ma!” 12Are maeape: “Akore hekai mai kapaealue kai arero heaha kalailue; ehovea ara ma hoa ore havahu iele, a va Aualari iki kekelavila, ehovea a va ave akore, a havahu ve akore haroapo iele la, a va araro avikiarakive haure au leila.” 13Aberahamo ovohae iupe, areve aireaki ovohae eavape, mamoe mea eapapo, haro karahe kora mamareke ureve au hahape mamoe mea eapapo; Aberahamo iki la mamoe mea kaivi arura haha akea ve, areve akore ve ita ve aipepe; kai a le veape, Aualari v'ila a le veape. 14Laelave Aberahamo la ita rare itavape rare Iehova‐Ire (Iehova avarakilai), ikiki ma hoa ere arura, “Iehova ve kela are hihika avarakilai.”

15Iehova ve aneru kaia ve Aberahamo aeka itavi mariape: 16“Ara havahu okoare laila, Aualari maeape, ehovea a maria laleila, ave akore, ave akore haroapo iele la, a Aualari avarakive haure au leila, 17ara o iele aro lei morapaeakilai, ara kai ave meavohula lei maeakoko leivahaeakilai, kaia ve kou oaria kai miri ve la horo ve numera hovea hovea. Kai ave meavohula ereve iri haela ve okiape le heaorapakilai. 18Aeka, ave meavohula ve la okiharo ve, meahaiapo ve vilaipipi oaria lei mekaka leivahaeakilai, ehovea a arave oharo la iapaila.” 19La hoa, Aberahamo helari areve la harokou orahokaila ve leia hoaupe. Ere oaria hareho Beera‐sieba leia auvahaeape. Aberahamo Beera‐sieba aeaveape.

Nahora ve meavohula

20Ma eharu karia lei, haela ae Aberahamo kileape: “Iapai, Milika ave akoreheari Nahora v'ila akoremari erape; 21akore koare va Usa, areve akoreheari va Busa, Kemuela, Arama ve oa, 22Keseda, Haso, Pilidasa, Idilapa i Betuela ila. 23Betuela va aireaki Rebeka epape. Ma akoremari 8 Milika Nahora, Aberahamo ve akoreheari, v'ila erape.” 24Aeka areve aireaki uamari, rare Reuma, Teba, Gahama, Tahasa i Maaka ila erape.

Currently Selected:

Genese 22: ORO

Highlight

Copy