Genese 21

Isako ve epape hari

1Iehova Sara kai leia horerape, areve la oharo hovea, kai Iehova Sara leipe areve la okoare hovea hovea. 2Laelave Sara ero‐ila leipe, kai Aberahamo ve auapau hoa, akore hekai epape, Iehova arero maeape la hoa hovea hovea. 3Sara epape la akore, Aberahamo are v'ila epape la akore hekai rare Isako rare itavape. 4Iehova ve la pupu hovea, akore hekai hare 8 leipe hoa, Aberahamo areve he oropa ve iilu haerapape. 5Areve akore Isako epape la hoa Aberahamo va hitolo 100 leipe. 6Sara maeape: “Aualari arave area iele lei horerape; ma oharo iapavahaeaki haela oaria area leivahaeakilai.” 7Are kai maeape: “Leita Aberahamo maeakilai ‘Akore hekai Sara ve amae apu larilai ha?’ Aka arave lauapau hoa ara areve akore hekai epape?”

Hagara i Isamaela ila haruapape hari

8Akore hekai ahai lou ve amae hakurepape; Isako amae hakurepape la hare Aberahamo hurae eapapo leipe. 9Aka, Sara Hagara, Aigupito uamari, Aberahamo v'ila epape la akore hekai i Isako ila erau leivila eavape. 10Laelave, are Aberahamo maeape: “Ma au hahape uamari i akore ila haruapaki; ehovea ma au hahape uamari ve akore hekai arave akore Isako ila haruku herehere lei v'arekaea.” 11Aberahamo ikihairihairi eapapo leipe, ehovea areve akore v'ila. 12Aka Aualari Aberahamo maeape: “A va ikihairihairi kalailue ehovea ave la akore hekai i ave la au hahape uamari ila; Sara aro maeaki la oharo leiki, ehovea ave meavohula Isako ve la okiharo ve rare iele avakilai. 13Ara kai au hahape uamari ve akore v'ila vilaipi eapapo leikilai, ehovea are kara ave epape akore.” 14Laelave Aberahamo vevelare havahu iele uroupe, are pai i ma ve kavapu haroapo ila Hagara avarape, are areve horo akea ve aipepe, arero i akore hekai ila hoa haroapo ila haruapape. Are leia harepai Beera‐sieba la huakara naoae aula kelaripe.

15Kavapu ve la ma karia leipe la hoa, are akore hekai kora ipi ve hakurepape. 16Are perehekai apehai aupe, harita heaki hoa hovea, kai leia haiavape, ehovea are mariape: “Ara arave akore hekai ve apaki hoa eavaki ave.” Are leia haiavape la hoa, akore hekai āra hai itavi hi le ape. 17Aualari akore hekai ve hi iapape; Aualari ve aneru Hagara kaia ve itavi arero maeape: “Hagara, a va le heraho ha? Oaoka kalailue! Aualari akore hekai ve hi la iapaila. 18Urou, akore hekai kaivi mai aheke paeaki, ehovea ara are v'ila vilaipi eapapo leikilai.” 19Kahara, Aualari areve ovohae hapape, are ma hoho eavape; are iki kavapu ve ma hivape, kai akore hekai au larive ma avarape. 20Kahara, Aualari la akore koarape, are kai ahai huakara aeaveape, are kai apo i harita ila ve horova ore havahu leipe. 21Are Parana la huakara aeaveape; areve lou arero Aigupito ve mari areve uva ve laeakive avarape.

Aberahamo i Abimeleka ila ve Okoare

22La hoa Abimeleka i areve hevehe haela ve kapena Pikola ila Aberahamo maeape: “A va leivila horova oaria Aualari aro hukapaivila; 23laelave, Aualari ve oropa ve a va araro okoare arive, a va araro kai arave akoremari kai arave meavohula amuraea va ka, aka, ehovea ara aro mai veveke hiki leipe, a va araro kai a aeaveape la ita haela kara lei ikiheheroe hiki leivahaeakilai.” 24Aberahamo kavale maeape: “Ara okoare arilai.”

25Abimeleka ve horova haela ma karu aea korea leiveape la hari Aberahamo Abimeleka maeape la hoa, 26Abimeleka kavale maeape: “Ma horova leivahaeape haela ara haveva, a va araro au kileaila, ara va ma oharo overa au iapaila, ara va mave lai iapaila.” 27Laelave, Aberahamo mamoe i boromakau ila karai Abimeleka aiarape, kai erealila okoare avahaeape. 28Aberahamo areve mamoe abu āre 7 kaili hiru lahua le leipe. 29Abimeleka Aberahamo maeape: “A va ma mamoe abu āre 7 hiru lahua laleila iele le ha?” 30Aberahamo maeape: “A va ma mamoe abu āre 7 ila arave mai ve aeakilai, ihova hovea, ehovea a va ovohae eavaki haela, ma ma karu ara havahu ihape.” 31Ehoveala, ere la ita rare Beera‐sieba rare itavape, ehovea leia erealila okoare avahaeape. 32Laelave erealila Beera‐sieba leia okoare avahaeape. La hoa Abimeleka i Pikola, areve hevehe haela ve kapena ila, urahukai Filistia haela ve la ita helari auvahaeape. 33Aberahamo hehe kora Beera‐sieba leia aporape, are kai leia Iehova ve rare itavape, mea oaria aeavila la Aualari. 34Kahara, Aberahamo hare perehekai oaria Filistia haela ve la ita aeaveape.

Currently Selected:

Genese 21: ORO

Highlight

Copy