Genese 20

Aberahamo i Abimeleka ila

1Aberahamo leia ve hahi leipe aiai diho hoa, are kai Kadesa i Sura ila ve aru hihi ve aeaveape; are Gerara hoa uku aeape. 2Aberahamo areve uva Sara v'ila mariape: “Are arave mariheari.” Abimeleka Gerara ve king iki haela paraeai Sara laeakive. 3Aka Aualari oroa hoa iki Abimeleka ivahi ureve mariape: “Iapai, a va apakilai, ehovea a laeape la uamari; ehovea are haela ae ve uva.” 4O iele, Abimeleka la uamari au koaraila; laelave are mariape: “Iehova e, a va haiae karia la haela haeakilai ha? 5Are havahu araro au maeaila ‘Are arave mariheari’ ka ha? Uamari havahu kara maeape ‘Are arave akoreapo’. Arave iki ureve ehoe iele, kai arave mai veveroro iele ila ara ma mai leipe.” 6La hoa Aualari arero ivahi hoa maeape: “Kaire! Ara v'ore a va iki ureve ehoe hiki v'ila, ma mai leipe, o iele ara havahu aro mai haiae leikive au hereavape; laelave a va arero mai au paeaila, ehovea ara aro hereavape. 7Ehoveala, ma haela ve uva aeka avaraki; ehovea are peroveta haela, are a v'ila ivaiva leikilai, a kai ovokake leikilai. Aka, a arero helari avaraki aue la leikilava, a hela ore leiki, a va apakilai, a i ave haela oaria hareho ila.”

8Laelave, Abimeleka vevelare havahu iele urai horova haela itavavahaeape, are erero ma eharu oaria kileavahaeape, la haela oaria oaoka eapapo leivahaeape. 9Kahara, Abimeleka Aberahamo itavi mari maeape: “A va elaro learia leivahaeape ha? Ara aro lei haiae learia leipe ha, ehovea a va ara i arave hiru haela ila ma haiae leipe ha? A va pupu haure lei araro ma mai leipe.” 10Abimeleka aeka Aberahamo maeape: “A va iki learia kekelape ha, ehovea a maria leipe ha?” 11Aberahamo maeape: “Ara laria leipe iele, ‘ehovea ara maria kekelape, ma ita haela oaria Aualari oaoka lei va ka; ere araro harilai, ehovea arave uva ila.’ 12Aeka, o iele, are arave mariheari, are arave oa ve mari, aka are arave lou ve mari ka; are kai arave uva leipe. 13Aualari araro oa ve uvi harepai hahi leikive maeape la hoa, ara arero maeape ‘A va araro maria leikive, elaviila kihoahukakive la ita oaria, a ara v'ila maria arive, “Are arave akoreapo”.’ ” 14La hoa Abimeleka mamoe i boromakau ila karape, kai horova haela i marita ila oaria, kai erero Aberahamo aiarape, are kai areve uva Sara kara helari avarape. 15Abimeleka kara mariape: “Eavaki, arave ita ave oropa ve aeave; a v'ikivere ita aeakive, heroe.” 16Are Sara maeape: “Iapai, ara ave akoreapo silver moni 1,000 aiarape; la va aro lei ehoe leiki eharu, a i hareho apealula la haela oaria oropa ve. A va haela oaria oropa ve lei ehoe le leive.” 17La hoa Aberahamo Aualari ve ivaiva ape; Aualari Abimeleka lei makuripe, are kai areve uva i horova uavila ila kara lei makukuripe, laelave, ere oaria ve korovu hoa karia le leipe. 18Ipi, Iehova Abimeleka ve uvi uavila oaria ve eharau kokaukape, ehovea Sara, Aberahamo ve uva.

Currently Selected:

Genese 20: ORO

Highlight

Copy