Genese 19

Sodoma i Gomora ila hai ka leivahaeape

1La aneru orahokaila hailaea hoa iki Sodoma leia; Lota Sodoma ve okiape haiavape. Lota erealilara eavape la hoa, are iki erealilave ukai ve ai oropape mea ve ekaopape, 2are kai maeape: “Haelakakaru e, maia ki helari, ara ealilara here leive, iki ealilave horova haela ve uvi ureve ma oroa avuku urupakive, ealila ve loa hara huhelaki; kahara, opoa vevelare havahu ealila urahukai elare oki auvahaeaki va heroe.” Erealila maeape: “Ka! Elalila oroa hoa okiharo hiki apeakive, heroe.” 3Aka are erealilara ape karava maeaeape; laelave erealila areve ukaki helari uvi le pekape; are erealilave eapai karikipe, are muramura aue pai a veape, erealila eapai lalavahaeape. 4Aka, ere va urupaki hoa āre la hoa, karikara haela oaria, Sodoma la haela, haela āre i haela hoaha ila, haela oaria hoa haroapo hareho Lota ve uvi helari hupakaeape. 5Ere Lota āra hai maria itavape: “Ma oroa ave leia leikila haela lahoa apearo ha? Erealilara kari kikoahukakive, ela erealilave maea ore leikive.” 6Lota okiape mahokaea ve hoai okiape areve aire kokaukape, 7are kai erero maeaeape: “Apavara, ara ero here leiro, mahovea mai heaha kalaivahaelue. 8Eavaila, ara va marita orahokaila ila, erealila haela ore au laila; ara erealilara kari kihoai ero aiarakilai, heroe; e va eve ikivere mai leivahaeaki: aka ma haela heaha kalaivahaelue, ehovea erealila arave uvi kavu avakive la kivikavahavila.” 9Aka ere maeape: “A va aireaki pavaki.” Ere kai maeape: “Ma haela iki oropa maia ekepe ehovea au hiki aeakive, aka, ma hoa, are ikivere haela ve heheavaki haela leikive! Ma hoa ela va aro lei heaha eapapo leikilai, erealila ve heaha va hekai.” Ere la haela Lota aheke iele huikapape, kai maia iele ekepe, ehovea okiape koekakakive. 10Aka la haela orahokaila elare mai horapai Lota uvi ureve ere i hareho hailavape, kai okiape kokaukape. 11Erealila uvi okiape mahokaea la haela ovohae lei kariri leivahaeape, āre haela i ehoaha haela ila, laelave ere va okiape haropakive heraho eapapo leivahaeape.

12Kahara, la haela orahokaila Lota maeape: “A va ma ita apavara uku la apearo ha? Evera, aka akoremari, aka marita, aka karikara ureve kake haela ae la, erero ma ita kari kihoaukive, 13ehovea elalila va ma ita hai ka leiki maia iele, ehovea Iehova oropa ve haela oaria ma ita haela ve heaha ikihairihairi lei hivavara eapapo arura, Iehova elalilara kiparaeape ehovea erero hai ka leivahaeakive.” 14Laelave, Lota mea hoai areve eveahaura maeaeape: “Urahukaila, ma ita hakurepaila, ehovea Iehova ma karikara hai ka leiki maia iele.” Aka la harokou ve ikikekela are va heheo hiki ape.

15Vevelare mea vitovito hoa, la aneru orahokaila Lota ape karava maeape: “Urou; ave uva i maia la marita orahokaila ila hoa haroapo elavelave hukaukive, e va ma karikara ve kavale heaha hoa haroapo avaki ave.” 16Are va horohora la pavape la hoa, aneru orahokaila arero mai aheke paeape, areve uva i marita orahokaila ila kara hoa haroapo, ehovea Iehova arero ikihuru leipe; erealila arero karikara mahokaea ve lai kihoaupe. 17Erealila erero kari kihoahukape la hoa erealila maeaeape: “Oaoka lei hukauki, aireaki ka helari keavalue, kai hahapa ita kapealue; kela ve leia hukauki, ero hai ka leivahaeaki ave.” 18Lota kavale maeape: “Haelakakaruru e, arekaea. 19Eavaila, ealilave horova haela ealila ikivere le laleila, ehovea araro lei ovokake leikive; aka ara kela ve leia vivilakive hovea ka, la heaha araro heaorapaki ave. 20Eavaila, la ukai karikara perehekai maeamaea, ehovea hukaukive; are va karikara hekai. Ara leia vivilakilai, heroe, are va karikara hekai; ara va leia lei ovokake leikilai.” 21Are arero maeape: “Heroe, ara aro la oki avarakilai, a v'oharo laila v'ila la karikara ara hai ka lei va ka. 22Elavelave leia hukauki, a va oropa leia koarakive, ara va horova aireaki leikilai.” Laelave la karikara ve rare itavape rare Soara. 23Lota Soara ekepe la hoa hare overa pekape.

24La hoa Iehova Sodoma i Gomora ila akea ve have ahea i a ila Iehova ve Kaia ve le paraeape. 25Are la karikara i hahapa ila hoa haroapo hai ka leivahaeape; la karikara ve haela oaria kai mea ve aheaupe la eharu oaria kara. 26Aka Lota ve uva airekai ovohae helari eavape; are ma kaikara have hovea leipe. 27Vevelare havahu iele Aberahamo Iehova oropa ve epavape la ita aeka hoaupe; 28are kai Sodoma i Gomora ila ve leia la hahapa ita eapapo ovohae eavape; iapai, la ita ve a mahuvu kemo eapapo ve mahuvu hovea pekape.

29Laelave, Aualari hahapa ve la karikara oaria hai ka leivahaeape la hoa, Aualari Aberahamo iki kekelape. Are Lota la heaha ve paraeai lei ovokake leipe, are Lota aeaveape la karikara oaria hai ka leivahaeape la hoa.

Moaba i Amona ila Haela ipopeavape hoa

30Lota Soara hakurepape; are i areve marita orahokaila ila kela pekahavi apeape, ehovea are Soara aeakive oaoka leipe; laelave are i areve marita orahokaila have ura ae va apearoape. 31Mariapo mariheari maeape: “Elavailave oa va haela eapapo, aeva elaro koaraki haela va karia havahu iele, meahaiapo la mai hovea. 32Ekela, elavaila oa wine oaria avarakilai, elavaila are i hereho urupakilai; laria elavaila oa v'ila meavohula koarai kiva leivahaeakilai.” 33Laelave erealila la oroa elare oa wine eapapo avarape. Mariapo pekae oa i hareho hahavi uavape. Are uavape kai hoaupe hoa oa ore au laila. 34La opoa hare, mariapo mariheari maeape: “Iapai, ara haila oroa oa i hareho la uavaila; elavaila ma oroa kara arero wine oaria avarakilai, la hoa a va pekai are i hareho hahavi uavakive heroe, ehovea oa v'ila meavohula koarai kiva leivahaeakive.” 35Laelave erealila la oroa kara wine oaria avarape: mariheari kara pekai oa i hareho hahavi uavape; are uavape kai hoaupe hoa oa ore au laila. 36Laria, Lota ve marita orahokaila elare oa v'ila ero‐ila leivahaeape. 37Mariapo akore hekai epape; are arero rare Moaba rare itavape; are Moaba haela oaria ve houva hoa haela ikiki mahau. 38Mariheari kara akore hekai epape, are arero rare Ben‐ami rare itavape; are Amona haela oaria ve houva hoa haela ikiki mahau.

Currently Selected:

Genese 19: ORO

Highlight

Copy