Genese 18

Isako ve epaki hoa ve okoare

1Iehova Aberahamo oropa ve hihika leipe, Mamere ve ita heheapa leia, are areve kovo uvi ve okiape haiavape, hare ahea la hoa. 2Are ovohae iupei ovohae eavape, haela ilehoila areve oropa ve urahuka apearoape. Are erero eavape la hoa are okiape ure kihoaupe, ehovea erero koarakive. 3Are maeape: “Arave Amua e, e va araro ikivere la leikilava, ave horova haela haure lei heaorapa va ka. 4Ere va ma perehekai avikekilai, ehovea eve loa huhelakive, e va la kora ipi ve iki perehekai papararaehakive; 5ara va pai perehekai kara avikekilai, e va elare maea oropa lei mekaka leivahaeaki, kai aireaki ev'elare oki auvahaeakilai, ehovea e va eve horova haela ve oki ve ekevahaeape.” Laelave ere maeape: “A laila la oharo hovea, a leikive heroe.” 6Aberahamo elavelave kovo uvi ureve pekape kai Sara maeape: “Flour mekakure hiru ilehoila karikiki, kai pai kokororu ilehoila airoavakive.” 7Aberahamo mahokaea ve leia vivilape, kai boromakau mere mahuka i veveke ila horova akore avarape; la akore arero elavelave karikipe. 8La hoa are laa apu i amae apu ila kailape, kai au karikipe la boromakau mere kara, kai ereve oropa ve aipepe; kahara, ere eapai lalavahaeape la hoa are kora ihau ve ereve maeamaea epavape.

9Ere arero maeape: “Ave uva Sara lahoa ha?” Are erero maeaeape: “Are va kovo uvi ureve.” 10Are mariape: “O iele ara va hitolo are hoa eve maia kihelarikilai: aeka ave uva Sara akore hekai epakilai.” Sara kovo uvi ve okiape ureve pavape, kai ereve oharo iapape. 11Kahara, Aberahamo i Sara ila va haela hoaha, oa i lou maea le leivahaeape. Sara uavila āre la mai karia overa leipe. 12Laelave, Sara elare iki ureve area keape, kai mariape: “Ara va lauapau la hoa, kai arave vila kara auapau iele, ara ikiveveke leikilai ha?” 13Iehova Aberahamo maeape: “Ehovealeve Sara area keape, kai mariape ‘Ara iele epakilai ha, arave uamari eapapo leiki hoa ha?’ 14Le eharu Aualari va hovea hovea ka ha? Hoa hovea hovea ara aeka kihoaukilai, hitolo āre hoa. Sara akore epakilai.” 15Sara mariape: “Ara va area au leikue”; ehovea are oaoka leipe. Are maeape: “Ka! a va area la keaila.”

Aberahamo Sodoma v'ila apevelavela leipe

16La hoa la haela leia hakurepai Sodoma ve ukaki ovohae eavape. Aberahamo ere i hareho aupe, ehovea erero paparaehakive. 17Iehova maeape: “Arave ikivere leiki okiharo ara Aberahamo kilea va ka ha? 18Ehovea Aberahamo ve vilaipi eapapo i aheke ila leikilai, kai are v'ila meahaiapo ve vila ipipi oaria lei mekaka leivahaeakilai? 19Ka! Ipi ara arero ikivere lei hareavape, ehovea are areve akoremari i ereve uvi haela oaria ila mai iele i ehoe ila kileavahaeakilai: Iehova ve okiharo kiva leivahaeakive; laria Iehova Aberahamo okoare avahaeape la eharu o iele leivahaeakilai.” 20Kahara, Iehova maeape: “Ehovea haela oaria Sodoma i Gomora ila ve heaha oaria lei hi eapapo arura, erealila ve haiae eapapo iele. 21Ara va hoaukilai ehovea ovohae eavakive, ara va iapape la haiae ve hi eapapo va iele la, aka iele ka; ara kai ore leikilai.”

22Laelave la haela leia ki helari Sodoma ve ukai aupe. Aka Aberahamo aeka Iehova oropa ve epavape. 23Aberahamo maeamaea iki mariape: “A va o iele mai ehoe haela i mai haiae haela ila hoa haroapo haeakilai ha? 24Lehae, karikara ureve mai ehoe haela 50 lapeakilava, a va la ita hai ka leikilai, kai mai ehohoe haela 50 lei ovokake leivahaea va ka ha? 25A va lahovea eharu lei v'arekaea, mai ehoe haela i mai haiae haela ila hoa haroapo kahaealue, laria mai ehoe i mai haiae ila haela hovea hovea leivahaeakilai! Laria v'arekaea! Meahaiapo hareho heheavaki la Iehova mai ehoe lei va ka ha?” 26Iehova maeape: “Ara Sodoma ureve mai ehohoe haela 50 la koarakilava, ara la karikara lei ovokake leikilai.” 27Aberahamo maeape: “Ara kekele mahuvu i a hurae ila hovea hiki haela, ara Iehova hilahila leikive oaoka au leila. 28Mai ehohoe haela 50 ve 5 hiki karia la leikilava, a va karikara hai ka leikilai, ehovea 5 hiki karia ha?” Are kai kavale maeape: “Ara 45 la koarakilava, ara karikara hai ka lei va ka.” 29Are aeka maeape: “Lehae, 40 hiki lapeakilava ha?” Are kavale maeape: “Ehovea 40 hiki leia, ara karikara hai ka lei va ka.” 30Are aeka maeape: “Iehova e, araro hihiri kalailue, ehovea ara aeka hilahila leikilai; A va 30 hiki leia la koarakilava ha?” Are kavale maeape: “Ara 30 la koarakilava, ara arero hai ka lei va ka.” 31Are maeape: “Iapai, ara Iehova aeka velavela leive, a va 20 hiki lakoarakilava ha?” Are kavale maeape: “Ehovea ara 20 hiki lakoarakilava, ara karikara hai ka lei va ka.” 32Are aeka maeape: “Iehova e, araro hihiri kalailue, ara aeka hoa haroapo velavela leikilai, a va 10 hiki la koarakilava ha?” Are kavale maeape: “Ara 10 hiki la koarakilava, ara arero hai ka lei va ka.” 33Kahara. Iehova Aberahamo oharoharo ape la oharo karia lei, elare okiharo aupe. Aberahamo kara elare ita helari ekepe.

Currently Selected:

Genese 18: ORO

Highlight

Copy