Genese 17

Peritome mai va Okoare ve Ihova

1Aberamo va hitolo 99 la hoa, Iehova areve oropa ve hihika leipe kai arero maeape: “Ara va Akea Iele Aualari; a arave oropa ve loa vea la veakilava, a va heaha koara va ka. 2Ara va arave okoare elavaila ve aru ve leikilai; ara va ave meavohula lei oaria leivahaeakilai.” 3La hoa Aberamo areve oropa ve ekaopape; Aualari kai arero maeape: 4“Iapai, arave okoare a v'ila aeavila; a va vila ipipi maeakoko ve vilali leikilai. 5Ave rare va Aberamo rare lei va ka, aka ave rare va Aberahamo leikilai, ehovea ara aro vila ipipi oaria ve vilali leipe. 6Ara va aro meavohula maeakoko aiarakilai; ara a v'ila vila ipipi oaria leivahaeakilai, kai a v'ila king kara kihoreavakilai. 7Ara va arave okoare elavaila ve aru ve leikilai, kai ave meavohula kara, aiai vilakao oaria, ehovea eve Aualari haiapo iele leikilai. 8Aeka a va hahi hiki oropa leipe la ita, ara va aro avarakilai, kai ave meavohula kara, Kanana ita hareho, ere va mea oaria apeakilai; ara kai ereve Aualari leikilai.”

9Aualari Aberahamo maeape: “A havahu, a va arave okoare kiva leikilai, a i ave meavohula oaria kara aiai vilakao oaria. 10Ma va arave okoare, a va kiva leikilai la okoare, elavaila ve aru ve, kai ave meavohula oaria kara; eve akoremari oaria peritome mai leikilai. 11Eve he oropa ve iilu haerapakilai, la va elavaila ve okoare ve ihova. 12Hare 8 hovea hovea la akoremari oaria he oropa ve iilu haerapakilai; eve vilakao oaria ve akorevila, ave uvi ureve epape la haela, aka ave moni ila ita lahua haela ve ilaea leipe la haela kara, a havahu ve akoremari hiki ka, 13ave uvi ureve epape la haela, kai ave moni ila ilaea leipe la haela kara, he oropa ve iilu haerapakilai. Laria arave okoare eve aivau ureve, okoare leikilai, aiai karia lei va ka. 14Leita haela areve he oropa ve iilu haerapaki aue la leikilava, la haela haela lahua le leikilai, ehovea are arave okoare le haerapape.”

15Kahara, Aualari Aberahamo maeape: “Sarai, ave uva, a va arero Sarai rare itava va ka, areve rare va Sara leikilai. 16Ara arero lei morapaeakilai, kai are v'ila ara aro akore avarakilai: Ara arero lei morapaeakilai, are va vila ipipi oaria ve uvari apo leikilai. Are v'ila haela ve king oaria kihorerakilai.” 17La hoa Aberahamo oropape ekaopi area keape, kai elare iki ureve ape: “Hitolo 100 ila la haela akore epakilai ha? Hitolo 90 ila la uamari, Sara, akore epakilai ha?” 18Aberahamo Aualari maeape: “Ara va ikivere Isamaela ave oropa ve aeakilai, heroe!” 19Aualari maeape: “Ka! aka ave uva Sara a ve akore hekai epakilai, a va areve rare Isako rare itavakilai. Ara arave okoare are v'ila leikilai, mea oaria aeavila okoare, ehovea areve meavohula kara. 20Isamaela ve oki ma — ara ave oharo la iapaila; ara arero lei morapaeakilai, ara arero meavohula oaria aiarakilai, ere va maeakoko leivahaeakilai; areve akoremari va oropa haela 12 leivahaeakilai: ara arero vilaipi eapapo leikilai. 21Aka arave okoare ara Isako ureve o iele leikilai. Sara oropaki hitolo epakilai la akore hekai.”

22Areve oharo karia leipe la hoa Aualari Aberahamo hakurepai pekape. 23La hoa, Aberahamo areve akore hekai Isamaela mai paeape, kai areve uvi ureve erape la horova akoremari oaria, kai areve moni v'ila ilaea leivahaeape la haela, Aberahamo ve uvi ureve la akorevila oaria; are la hare havahu ereve he oropa ve iilu aivau haerapape, Aualari arero maeape hovea hovea. 24Aberahamo va hitolo 99 leipe, elare he oropa ve iilu haerapa, peritome mai leipe la hoa. 25Aeka areve akore Isamaela va hitolo 13 leipe la hoa areve he oropa ve iilu haerapape. 26La hare haroapo Aberahamo i areve akore Isamaela ila elare he oropa ve iilu haerapape: 27Aeka areve uvi ureve haela oaria, areve uvi ureve erape la haela oaria, ita lahua haela ve ilaea leivahaeape la haela oaria kara, ere oaria are i hareho he oropa ve iilu haerapa peritome mai avape.

Currently Selected:

Genese 17: ORO

Highlight

Copy