O Gagagapalag 9

1Naŋ i Saul qale mapsag lue o vavae sorav goro wa o matea mun ra tiŋqoro anan Lord, ti mule sur i moe oloolo, 2ti paere nania o raverave i Damaskus, mun ragai talo ima siwo tuwale ŋaŋ, si ni qe ilo rasei tape matesala ilone, si o mereata, si o tavine, ni takira ma we rot i Jerusalem. 3Wa alo ni we mulemule me ge tamaike; ni me rivtag Damaskus, naŋ o valawar nan o vunana me sar waliogia gaplot. 4Wa ti masu alo tano, ni qara roŋotag o liŋai ti vet munia wa, Saul, Saul, ape sava ko we gege inau? 5Naŋ ni me vet wa, Pa iniko isei, Lord? Naŋ neia wa, Inau i Jesus ta Nasareth ko we gege inau nake. 6Pa tavaraka, mule pata ilo laqlaqe vanua, wa te gaganag muniko aŋaisa o sava ko te ge. 7Wa ragai me mule pulpul ti amaia me tira roroŋo, we roŋotag o roro liŋai, pa gate ilo isei. 8Wa i Saul me tavaraka nan o tano, we lik namatana, pa gate ilo qalo o sava; wa neira me sapania, qara lav pata ineia i Damaskus. 9Wa o qoŋ nitol ni qale matapei, wa ni gate ganagana, wa ni gate unun.

10Naŋ i tuara tiŋqoro a Damaskus, nasasana i Ananias. Naŋ i Lord me vet munia alo qoreqore wa, Ananias. Naŋ neia wa, Ilo, inau, Lord. 11Naŋ i Lord munia wa, Ka tavaraka, ka mule ilo matesala we log si Taniniga, ka varus lele iman Juda i gene nasasana i Saul, o ta Tarsus: ape, ilo, ni we tataro; 12wa ni me ilo o tanun, nasasana i Ananias, we mule pata ma, we taŋovia, sin ilo kel mulaŋ. 13Nava i Ananias me valuia wa, Lord, nau me roŋotag veta amen ragai we qoqo ape tanun iloke, ape ni me ge tatas vagaqoqo aneane ira roŋo anama a Jerusalem. 14Wa iake mulaŋ o mana amaia nan ra oloolo liwoa, sin rot irasei nol we loglog nasasama. 15Panava i Lord me vet munia wa, Ka mule; ape i gene iloke tama o lasa matavires, si a taur nasasak alo nagora sul ŋaŋ we sea, wa o maranaga ŋaŋ, tara nanatun Israel. 16Ape na te gaganag munia o gene we qoqo te ge roŋovivtigia o manigiu nasasak. 17Naŋ i Ananias me vareag, me kalo pata leleima, ti taŋovia, ti vet wa, Tasik, Saul, i Lord, i Jesus ilone, pa ni me ŋaŋa lue veta muniko a matesala ko me mule ma alolona, ni me vatraŋ nau ma, si ka iloilo kel mulaŋ, wa si ka uravag o Vui we Roŋo. 18Wa me masu gaplot nan namatana tam o vaŋerasiu, wa ni me ilo kel; naŋ ti tavaraka qara vasugroŋo ineia. 19Wa ni me la gana o sinaga, qara maremare kel. Wa ni me toga tuan qoŋ amaira tiŋqoro a Damaskus.

20Wa gaplot ni me toretore goro alo ima siwo tuwale ŋaŋ apen Jesus, si neia iloke Natun God. 21Panava iragai nol we roŋotag, we mamakei lava, we vava wa, Gate iloke ineia me saŋrag a Jerusalem irasei we loglog o sasai iloke; wa me mule ma, o manigiu sin vantakira at we rot surira oloolo liwoa? 22Pa i Saul me maremare vagae, wa me vava sus mura Israel we togatoga a Damaskus, mun o vava sargag qalo si ineia iloke i Christ.

23Wa o qoŋ we qoqo me paso, ra Israel me sorasoravia, si a ge mateia. 24Pa i Saul me gilala ape neira we soravia. Wa neira me matag goro o mategeara ŋaŋ, alo maran wa alo qoŋ, si a ge mateia. 25Nava ra tiŋqoro me lavia alo qoŋ, me la sur ineia siwo ape kule geara, we varoroa alo gete.

26Wa ni me niŋa a Jerusalem, ti ge iloilo sin pul tuwale amen ra tiŋqoro, pa neira nol me gogoloa, gate nomtup wa si neia o tiŋqoro. 27Panava i Barnabas ti lavia, ti vantakia at sur ira sala, ti gaganag ulul mun neira si ni me ilo gasavai i Lord a matesala, wa ape ni me vava munia, wa ape ni me wawaŋ gasavai ape toretore goro ragai a Damaskus mun nasasan i Jesus. 28Wa ni me toga amaira, ti kalokalo pata ti roworowo lue a Jerusalem, 29ti toretore, ti wawaŋ alo sasan i Lord Jesus, ti vavava, ti varvarlai amaira Grik; pa neira me gege iloilo si a ge mateia. 30Pa o retatasiu me gilala apena, neira we vantakia siwo i Kaisareia, wa me vatraŋ reagia at i Tarsus.

31Wa o loglue a Judea nol, a Galilea, a Samaria, me toga tamata wa me vilitia, ti va poavag o momogo mun i Lord, wa me lul mun o Vui we Roŋo me varagaira.

32Naŋ me ge tamaike, i Peter we mulemule valvanua ti mule siwo mulaŋ sur ira roŋo we toga a Luda. 33Wa ni me ilo suar aia o tanun nasasana i Aineas, me risa veta o tau laveatol alo epana; ape ineia o mawea. 34Naŋ i Peter me vava munia wa, Aineas, i Jesus Christ we ge esu ko; ka tavaraka, ka wosalag matapuma. Naŋ ni me tavaraka gaplot. 35Wa iragai nol we toga a Luda, wa a Saron, me ilo mora ineia, wa neira qara vusiag kel sur i Lord.

36Wa o tuara tiŋqoro a Jopa, nasasana Tabitha, we vava leas si Dorkas. Pa o tavine iloke me uravag o gagapalag we wia wa o aleŋa ni me gege ti. 37Wa me ge alo qoŋ ŋaŋ ilone, ni me mageregere, ti mate; wa neira me vasug pasoa, qara vanovia ilo tawtaw ima. 38Pa Luda arivtag Jopa; wa ira tiŋqoro me roŋotag si i Peter aia, me vatraŋ o tanun pulrua, we paere munia si, Nipea maumaul ape vanoga ma sur kamam. 39Naŋ i Peter me tavaraka, me van amen rara. Wa me niŋa, neira we vantakia ilo tawtawu ima; wa iraro naro ŋaŋ me tira amaia, we rarao wa we gaganag o siopa sarusaru, wa o sale siopa ŋaŋ i Dorkas me gege ti, ni qale toga amaira. 40Wa i Peter me suware lue ineira nol ivarea, ti vatieqau, ti tataro, ti goleagia sur o tamate, ti vet wa, Tabitha, tavaraka; wa ni we lik namatana, ti ilo i Peter, ti pute raka. 41Wa ni me kaka napanena, ti rave kaloa; wa me log ma ira roŋo, wa iraro naro ŋaŋ, ni qara sueg kel ineia we esu. 42Wa neira nol a Jopa me gilala apena; wa we qoqo me nomtup saro i Lord. 43Naŋ me ge tamaike, i Peter me toga o qoŋ we qoqo a Jopa, amen i gene nasasana i Simon, i mawu vin qoe.

Currently Selected:

O Gagagapalag 9: MOTA

Highlight

Copy