O Gagagapalag 8

1Naŋ i Saul me nonom tuwale amaira ape mateana.

Wa alo qoŋ ilone me kos raka aneane o loglue a Jerusalem; wa neira nol me saleŋa valvanua a Judea, wa a Samaria; nava ira sala tagai. 2Wa tuan tanun we momogo God me sasa lue i Stephen, wa we ruruŋtap liwoa ape neia. 3Pa i Saul, ni me raveg o loglue, me kalo valuima, me wosag lue o rereata wa o revavine ŋaŋ, wa me suegira ilo ima rotrot.

4O manigiu ilone iragai me saleŋa ti we mule valvanua, we maŋmaŋasag o vavae. 5Wa i Philip me siwo ilo laqlaqe vanua a Samaria, me toretore mun neira apen i Christ. 6Naŋ o sul ŋaŋ me tiŋqoro nom sara tuwale o vavae ŋaŋ amon Philip me vava, we roŋroŋotag wa we iloilo mora o vaglala ŋaŋ ni we ge. 7Ape we qoqo o vui gagavu ŋaŋ amaira, pa me rowolue awoawo nan neira; wa me ge esu kel o mawea wa o qages we qoqo. 8Wa me qeteg qaraqara liwoa alo laqlaqe vanua ilone apena.

9Pa tuara tanun nasasana i Simon, me gagapalag moai veta o gaqaleva alo laqlaqe vanua ilone, ti ge mamakei o sul ta Samaria, ti vava si ineia isei we liwoa. 10Wa ineira nol, o tanun liwoa ŋaŋ me niŋa ape tanun worawora, me tiŋqoro gese ineia, we vava wa, I gene iloke gai o mana non God we log si liwoa. 11Wa neira me tiŋqoroa, ape ni me ge mamakei neira ti we tuai mun non o gaqaleva. 12Pa alo neira we nomtup i Philip we gaganag mun neira o lea we wia ape marana non God, wa ape sasan Jesus Christ, qara vasugroŋo neira, o rereata wa o revavine ŋaŋ. 13Wa i Simon me nomtup mona; wa me vasugroŋo ineia, ni qale goara amen Philip, wa we iloilo o vasasa wa o vaglala ŋaŋ we poa we ge, we mamakei lava apena.

14Naŋ ira sala a Jerusalem me roŋotag si o Samaria me la mona o vavae non God, neira me vatraŋ at i Peter tana i John surira. 15Wa rara me siwo qet, me tataro ape neira, si neira a la mora o Vui we Roŋo; 16ape ni gate siwo tiqa avunansei; me vasugroŋo vires neira ilo sasan Lord Jesus. 17Wa rarua qara taŋovira, neira me la mora o Vui we Roŋo. 18Naŋ i Simon me ilo si me le o Vui we Roŋo mun napanera sala we taŋovira, ti vanogag ma o som mun rara, 19ti vet wa, Ura la ma munau mulaŋ o mana iloke, si nau ta taŋov mok isei, ni te taur o Vui we Roŋo. 20Pa i Peter me vet munia wa, Iniko wa nom o som te tagea rua, ape ko me nonom si te tuvag lai o sogov non God mun o som. 21Tagtagai ran o takelei si o tanoi amaiko alo vavae iloke, ape naloloma gate taniniga alo nagon God. 22O manigiu ka nomleas moma ape ganganor iloke ko me ge ti, wa ka tias i Lord sin nomvitag wun o nonomia iloke talo toqama. 23Ape nau we ilo mok ko we toga alo siu gogona, wa alo garotrot ganganor. 24Naŋ i Simon ti valui goroa, ti vet wa, Ura tataro mun i Lord ape nau, nan o sava tea ko me vava ti apena wa ge inau.

25Wa irarua me gaganag we tira, wa me maŋasag o vavae mon Lord; qara vusiag kel i Jerusalem, we gaganag o lea we wia alo vutre vanuara ta Samaria we qoqo.

26Naŋ o angel anan Lord me vava mun Philip, ti vet wa, Tavaraka, mule i siwo, ape matesala a Jerusalem we siwo i Gasa alo vanua vanameag. 27Naŋ ni me tavaraka, ti mule; wa ilo ma, o tanun ta Ethiopia o eunuk we liwoa amen Kandake iro maranaga goro ra ta Ethiopia, ni we ilogoro o moegene ŋaŋ napulana, pa me mule veta i Jerusalem ape tataro; 28wa ni we kel, ti pute vawo non o taplagolago, ti vasogo i Isaia o prophet. 29Naŋ o Vui ti vet mun i Philip wa, Ka mule peteŋia, wa ka tako maremare ape taplagolago ilone. 30Naŋ i Philip me valago suria, ti roŋotagia we vasogo i Isaia o prophet, ti vet wa, We nun, ko we lolomaran gai o sava ko we vasogo? 31Naŋ neia wa, Na te lolomaran gasavai, si isei ta tete tursalemoa inau? Wa ni me paere mun i Philip ni rap kalo, ni pute pulpul amaia. 32Pa o takele raverave ni me vasogo we tamaike wa,

Me vantakia tama o sheep ape tano vus;

Wa tam o nat sheep alo nagora we pala nauluna we toga roroŋo,

Tamaine gina ni gate waka navalana:

33Alo we ge pepewua, me la raka o lea veveg nania;

Isei te vava weswes ape non o veve?

Ape me lareag naesuna nan o marama.

34Naŋ o eunuk me valui goro i Philip, ti vet wa, Na we paere muniko, si ka gaganag mun nau, O prophet we vet tamaike apensei? Ape neia kel, si apensei we sea? 35Naŋ i Philip me waka navalana, ti qeteg ape raverave iloke, qara gaganag o lea we wia apen i Jesus munia. 36Wa alo we mulemule a matesala, irara me niŋa ape pei. Naŋ o eunuk ti vet wa, Ilo, o pei; o sava we ge goro nau, wa vasugroŋo inau? 37Naŋ i Philip me vava wa, Si ko qe nomtup mun natoqama nol, te lai. Naŋ ni me valui goro ti vet wa, Na we nomtup i Jesus Christ, si neia Natun God. 38Wa ni me vet ape taplagolago si ni tira late; wa irara me siwo sur tatarua ilo pei, i Philip wa o eunuk; wa ni me vasugroŋo ineia. 39Wa rara me vara kalo nan o pei; wa o Vui non i Lord me wosag reag i Philip; wa o eunuk gate iloa mulaŋ, ape ni me mule malakalaka alo matesalana. 40Nava me ilo suar i Philip a Asotus, wa ni me maŋasag taso o lea we wia sur vanua nol, ti niŋa a Kaisareia.

Currently Selected:

O Gagagapalag 8: MOTA

Highlight

Copy