O Gagagapalag 7

1Naŋ i moe oloolo wa, Pa si alova we tamaine? 2Naŋ neia wa, Ragai, ratatasik, tamiu ira tamtamak, tur tiŋqoro nau; God we leŋas me ŋaŋalue mun tamanina i Abraham a Mesopotamia, alo ni gate togag vanua tiqa a Haran; 3me vava munia wa, Vareag nan navanuama, wa nan rasogoma, wa sirig ilo vanua na te gaganag muniko. 4Naŋ ni qara rowolue nan navanuara ta Kaldea, wa me togag vanua a Haran; wa i tamana me mate veta, God qara ge sirigia ilo vanua iloke, kamiu we togatoga iake ilokenake. 5Wa ni gate le ilo munia gan o tano usurag aia, tagtagai qalo si tam o tano raŋoi; pa ni me ligoligog ti sin te la at munia ni taur mona, wa mun ra tuptupuna tagirina; pa natuna tagai tiqa. 6Wa God me vava tamaike wa si ra tuptupuna te toga galtag alo vanua we sea, wa te ge neira mun tanun mawmawuitag, wa te ge lalamasagira, o tau melnol vagavat. 7Wa o veve sul neira te mawmawui surira na te veveg mok, amon God me vava; wa me paso, neira te rowolue ma, te gagapalag mun nau alo vatike. 8Wa God me le munia o vatavata teve vaglala; wa ni me vawota Isaak tamaine, wa me teve vaglala ineia alo qoŋ lavetoliu; wa i Isaak me vawota Jakob; wa i Jakob ira qeteg veve o numei nirua. 9Wa ira qeteg veve me loloanu i Joseph, me wol vitagia i Misraim; wa God qale toga amaia. 10Wa ni me ramo kaloa nan non o mamagarosa nol, wa me ge Pharaoh, o maranaga goro Misraim, sin lolowia ineia, wa ni lolomaran alo nagona; wa ni me vatira ineia, ni moai goro ra ta Misraim, wa naimana nol. 11Naŋ o maro me ge lolovag nol o vanua Misraim wa Kanaan, wa o magarosa we poa apena; wa ira tamanina gate ilo qalo o sinaga. 12Pa i Jakob me roŋotag o roro sinaga a Misraim, pa ni me vatraŋ at ira tamanina amoa. 13Wa alo varue vanoga me ge lue i Joseph mun ira tasina, pa i Pharaoh qara gilala ape ra sogon Joseph. 14Wa i Joseph me vatraŋ, we suware ma i tamana i Jakob wa ira sogona nol; ineira saŋavul lavearua o numei tavelima. 15Naŋ i Jakob me mule siwo i Misraim; wa ineia wa ira tamanina me mate gegese aia. 16Wa me sasa levegao neira i Shekem, me mapura alo qaraŋ tamate, i Abraham me tuvag tuai ti mun o som o silver mun ra natun i Emor a Shekem. 17Naŋ o masao ligoligog me rasu ma, God me vatavata we titin ti mun Abraham apena, o sul me lul me qoqoqo a Misraim; 18gai tavaraka o maranaga we sea goro Misraim, wa ni gate gilala i Joseph. 19Wa ni me gege nurnurug o sul inina, me lalamasag ira tamanina, si neira savrag ira tete ŋaŋ amaira, nan neira wa vawota we esu. 20Naŋ alo masaoi ilone i Moses me wota ma, wa ni me lulum mun God, wa me tokosia alo iman tamana o vula nitol. 21Pa me savragia, natun i Pharaoh o tavine me tapan kaloa, wa me tokosia mun natuna. 22Wa me vatogo i Moses ape liŋe lolomaran nol nora ta Misraim; wa ineia we mana alo mon o vavae wa mon o gagapalag ŋaŋ gese. 23Naŋ natauna arivtag me saŋavul vat veta, nalolona qara toron sin vaatev ira tatasina ŋaŋ, ira nanat Israel. 24Wa ni me ilo o tuarasei we roŋo maslailai, wa ni me piriŋia, me rapa i gene lopsag, we vus o ta Misraim ilone. 25Pa ni me nonom si ira tatasina te ilo vaglala mora si God te la o vaesuva muneira mun napanena; nava neira gate ilo vaglala. 26Wa tavala maran rowo, ni me rowolue mun neira we kesa, wa sin ge pul kelura ape tamata, ti vet wa, Ragai, kamiu o tatasiu; ape sa kamiu we var ge malmalkeke kamiu? 27Pa i gene me ge variava ti i tagvanuana me is vitagia, ti vet wa, Isei gai me vatira iniko, si a liwoa goro wa a veveg kamam? 28Ko we maros we vus mate nau, tama ko me vus mate veta o ta Misraim ananora? 29Naŋ i Moses me toa ape liŋai iloke, me toga tawu alo vanua Midian; wa me vawota natuna nirua aia. 30Wa o tau saŋavul vat me paso qet, o angel anan God me ŋaŋa lue munia alo vanua vanameag, ape tauwe Sinai, alo malawo av alo tangae qarqaruga. 31Wa i Moses me ilo, ti mamakei ape gene ni me ilo; wa ni me va peteŋ ma si ni ilo mona; pa naliŋan God me rowo ma suria wa, 32Inau God ira tupuma, God Abraham, wa God Isaak, wa God Jakob. Wa nasurun i Moses me gogoloiga, pa ni me nomnom mot matila sin ilo mona. 33Naŋ i Lord me vet munia wa, Ka ul o qoas goro malekai, ape vatike ko we tira iake o tano roŋo. 34Nau me ilo, nau me ilo mok o sul anak we mamagarosa a Misraim, wa nau me roŋotag nor o masorsor; wa nau me siwo ma si na wosag reagira; wa ilokenake, van ma, na te vatraŋiko at i Misraim. 35I Moses iloke neira me titis vitagia, pa me vava wa, Isei me vatira iniko si a liwoa goro wa a veveg? i gene iloke God me vatraŋ kelua, sin liwoa, wa sin ulsag, mun napanen i angel me ŋaŋalue ti munia alo tangae qarqaruga. 36Pa i gene iloke me la lue neira ma, me ge paso o vasasa wa o vaglala ŋaŋ, alo vanua Misraim, wa alo lama we memea, wa alo vanua vanameag, o tau saŋavul vat. 37Iloke i Moses nake, i gene me vava mun ra nanatun Israel wa, God te vatira mun kamiu o prophet amaira tatasimiu tama inau. 38Iloke ineia me toga alo loglue alo vanua vanameag, amen i angel me vava ti munia avune tauwe Sinai, wa amaira tamanina; pa ni me la mona o vavae esuesu ŋaŋ sin la ma mun nina. 39Pa ira tamanina gate maros we maŋas goro ineia, nava neira me is vitagia, me nom ris kel alo toqara ape Misraim; 40we vet mun Aaron wa, Ka ge o god ŋaŋ mun nina, si neira a tursalemoa nina; pa ape Moses iloke me vanogag inina ma nan o vanua Misraim, nina gate gilala si o sava me ge ineia. 41Naŋ neira me ge o totogale nat kau alo qoŋ ŋaŋ ilone, wa me map kalo o oloolo mun o totogale, wa me malakalaka ape tanopanera. 42Pa God me kilau ris, wa me ukegira, si neira a gagapalag mun o vavtig gene ŋaŋ talo tuka; tama me rave ti alo raverave nora prophet wa,

Pa kamiu me oloolo mun nau mun o qoe mate ŋaŋ, wa o oloolo ŋaŋ,

O tau saŋavul vat alo vanua vanameag, ragai talo iman Israel?

43Wa kamiu me la raka naiman Molok,

Wa o vitu non i Rephan o god,

O tarapei ŋaŋ kamiu me toto momiu si a taqaloŋ goro;

Wa nau te ge sirig kamiu i tavala Babulon.

44Wa o ima sausau tape vatavata amen tamanina alo vanua vanameag, tama ni me vareg mona apena, ti vet mun Moses sin taur tataga o tarapei ni me ilo ti. 45Wa ra tamanina me la tapare mora ilone, me sau pata ma amen i Joshua, neira qara taur mora navanuara sul ŋaŋ we sea, God me tuqerag savragira alo nagora tamanina, me niŋa ma naqoŋin David. 46Wa God me ilo mana ineia, wa ni me paere sin ilo suar o tano togatoga mun God non Jakob. 47Pa i Solomon me taur o ima munia. 48Panava i Eleele tete toga alo tanopane tanun, tama o prophet ti vet wa,

49Nok o tano pute maranaga o tuka,

Wa nok o tano ververesag o marama;

Pa o ima we savai kamiu te taur mun nau? amon i Lord we vava:

Wa avea o tanoi na te mapsag nau aia?

50Pa gate panek me gapalag o savasava ŋaŋ nol iloke?

51Ragai, nanenemiu we togtogoa, wa gate teve vaglala nalolomiu wa naqoromiu; kamiu we vatriv goro vagae o Vui we Roŋo; tama ira tamamiu, wa ikamiu. 52Avea tea o prophet ira tamamiu gate kos gapua? wa neira me vus mate iragai me maŋasag moai ti o vanoga ma amon i Taniniga, wa kamiu me maniriŋia, wa me vus nawonoa. 53Ikamiu me la momiu nake o lea mora angel ŋaŋ me gagapalag apena; wa ikamiu gate matagisgis goro.

54Naŋ neira me roŋotag o vavae ŋaŋ iloke, me gagan natoqara, wa me gargara ŋiŋiŋ ape neia. 55Pa ineia me uravag ran ma o Vui we Roŋo, wa me sagarag matapaparau o tuka, ti ilo naleŋasin God, wa i Jesus we tira ape matuan God; 56ti vet wa, Ilo, na we ilo o tuka we rave wora, wa i Nat tanun we tira ape matuan God. 57Pa neira me rorov nol mun o liŋai we poa, we gis goro naqorora, we iraka tuwale ivunana. 58Wa neira me vure savragia nan o laqlaqe vanua, qara patuŋia: wa ira gaganag we tira me map siwo nor o siopa ape raŋo lumagav, nasasana Saul. 59Wa neira me patuŋ i Stephen, ti loglog ti vet wa, Lord Jesus, ka taur moma naatak. 60Wa ni me vatieqau, me log poa mun o liŋai wa, Lord, nipea vasvasogo o pugai iloke mun pugara. Wa me vava paso tamaike, ti maturu.

Currently Selected:

O Gagagapalag 7: MOTA

Highlight

Copy