O Gagagapalag 6
6
1Naŋ alo qoŋ ŋaŋ ilone ira tiŋqoro te qoqoqo ti, me sug raka o wutoto amaira Grik gorora Hebrew, ape me raka ava raro naro amaira alo we tiratirag valqoŋ. 2Naŋ ira numei nirua me suware ma ira tiŋqoro o sul surira, we vava wa, Gate wia nan si kamam a makarag o vavae non God, pa a gagapalag ape tano ganagana ŋaŋ. 3O manigiu iloke, ratatasimam, tur ilo raka amen kamiu o tanun ta lavearua, we gaganag weswes namatevura we wia, wa we uravag o Vui we Roŋo wa o lolomaran, si kamam a vono ineira ape gagapalag iloke. 4Pa kamam te goara tasovule ape tataro, wa ape gagapalag o vavae. 5Wa o sul nol we lolowia ape vavae iloke, wa neira me iloraka i Stephen, o tanun we uravag o nomtup wa o Vui we Roŋo, wa i Philip, wa i Prokorus, wa i Nikanor, wa i Timon, wa i Parmenas, wa i Nikolas, o proselut ta Antiokia. 6Wa me vatira neira ape nagora sala, wa neira me tataro, me taŋovira.
7Wa o vavae non God me gao, wa ira tiŋqoro me sul aneane a Jerusalem; wa o sul we qoqo amaira oloolo me mawui goro o nomtup.
8Wa i Stephen we uravag o sogov wa o mana, me gege o vasasa wa o vaglala ŋaŋ we poa amaira sul. 9Wa o tuanrasei talo ima siwo tuwale me log was nora Libertin, wa ta Kurene, wa ta Aleksandria, wa ta Kilikia, wa ta Asia, me tavaraka, we varvar leasag amen i Stephen. 10Wa neira gate tiriaga goro lai non o lolomaran, wa o Vui ni me vava nia. 11Naŋ neira me vatanau pal o tuan tanun, wa neira me vava wa, Ikamam me roŋotag i gene iloke we loglog o vavae nawono apen i Moses wa apen God. 12Wa neira me ge tiketike o sul, tara tamaragai ŋaŋ, wa ira vatogo; wa neira me rowolue ivunana, me taur varagetia, me sapania sur o vavtig veveg. 13Wa neira me vatira irasei si a gaganag galegale wa, O tanun iloke gate motmot o vavava lealeasag ape vatike we rono, wa ape lea. 14Ape kamam me roŋotag ni we vava wa si, I Jesus iloke ta Nasaret te ge tagea o vatike, wa te ge ris o liŋai ŋaŋ i Moses me le veta ma ti mun nina. 15Wa iragai nol we pute alo vavtig veveg me sagarag maremarea, wa me ilo nanagona tama o nago angel.
Currently Selected:
O Gagagapalag 6: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
