O Gagagapalag 10

1Naŋ o tuara tanun a Kaisareia, nasasana i Kornelius, ineia o liwoa goro soldier melnol alo vavtig vagalo we log si ta Italia. 2O matai tanun wa we momogo God, tara talo imana, wa ni me aleŋa aneane mun o sul, wa me tataro vagae mun God. 3Wa ni me ilo nurnur tama alo qoreqore, tama alo masao qoŋ lavevatiu, o angel anan God we mule pata suria, ti vet wa, Kornelius. 4Wa ni me sagaragia we gogolo aneane, ti vet wa, O sava nake, Lord? Naŋ neia wa, Nom o tataro wa o aleŋa me kalokalo tama o iloilo nagoi alo nagon God. 5Wa ilokenake ka vatraŋ o tuan tanun at i Jopa, si a suware i Simon ma, navaruesasana i Peter. 6Ni we toga tawu amen i Simon i mawu vin qoe, pa naimana a panpan lau. 7Wa o angel me vava ti munia me vanreag kel; ni qara suware ma o talo imana pulrua, wa o soldier, o matai tanun, tuwale nan ragai ilone we goara amaia. 8Wa ni me gaganag ulul mun ratol o gene ŋaŋ iloke, ti vatraŋ ratol at i Jopa.

9Naŋ tavala maran alo ratol qale vava a matesala, wa me rivtag ma o laqlaqe vanua, i Peter ti vega kalo vawo ima si a tataro, tama alo masao qoŋ laveteai. 10Wa ni we maliŋsala, ni qara maros sin gana. Wa alo neira we gagapalag o sinaga, me suar munia, 11ti ilo o tuka me rave wora, wa o gene tama o tavala epa we poa we siwo sur ma, me vagae ape sigsigrae nivat, me varowo sur ilo tano. 12Wa o sale qoe ŋaŋ talo marama alolona, wa o gene ŋaŋ we kalokalo alo tano, wa o manu ŋaŋ talo maea. 13Naŋ o liŋai ti vet munia wa, Tavaraka, Peter, ka vus, ka pig. 14Nava i Peter me vet wa, Nipea nan, Lord; ape nau gate gana tea o sava ilo we purepurei si we lepa. 15Pa o liŋai vagaruei ma munia wa, Ko wa ge purepurei o sava God me ge wenewene. 16Wa me ge tamaike vagatol; paso nan, qara lav kel o tavala epa ivunana.

17Wa alo me tama mun Peter si o sava o taqaŋiu iloke ni me ilo mona ti; ilo, iragetol i Kornelius me vatraŋ ma we vavaris vagaute naiman Simon, we tira ape mateima, 18we loglog, wa we varvaris si i Simon, navaruesasana i Peter, we toga tawu aia. 19Wa alo i Peter qale nonom vasarig ape taqaŋiu ilone, o Vui ti vet munia wa, Ilo, o tanun pultol we sike ko. 20Pa tavaraka, siwo at, ka van ameratol, nipea nom varuarua, ape nau me vatraŋ ratol ma. 21Naŋ i Peter me siwo at, ti vet mun o tanun wa, Ilo, inau iloke kam we sike inau; o manigiu o sava kamtol me mule ma? 22Naŋ ratol wa, I Kornelius, o liwoa goro soldier melnol, o tanun taniniga wa we momogo God, wa ira ta Judea nol we gaganag we wia ape neia, wa o angel we roŋo me nir lue munia si a suware ko ilo imana, wa a roŋotag o vavae amaiko. 23Wa me suware ratol ma alo imana, ti tokos ratol. Wa a tavala maran ni me gisraka, me rowolue tuwale amairatol, wa o tuan ratatasira ta Jopa me tako ineia.

24Wa tavala maran mulaŋ neira me niŋa pata a Kaisareia. Wa i Kornelius me nare ineira ti, me suware tuwale veta ma ti ira sogona, wa ira pulsalana we tutun. 25Wa alo i Peter te kalokalo pata ti, i Kornelius me varniŋa ineia, ti suragia ape raŋona, ti vatieqau goroa. 26Pa i Peter ti rave kaloa, ti vet wa, Tavaraka, pa inau mulaŋ o tanun. 27Wa irara we varvava, naŋ ti mule pata, ti ilo o tanun me qoqo me vug tuwale veta; 28ti vet mun neira wa, Kamiu we gilala momiu si me gatogoro veta isei tea ta Judea nan wa pul amensei we sea, wa si nan wa mule suria; pa God me gaganag lue mun nau, si nau nipea log isei we purepurei si we lepa. 29O manigiu iloke na me mule maŋas goro kamiu me suware nau ma. Sowo, na varus kamiu, o manigiu o sava kamiu me suware nau ma? 30Naŋ i Kornelius wa, O qoŋ me vat veta, me niŋa tama alo masao qoŋ iloke; wa alo masaoi lavevatiu nau me tataro alo imak; wa ilo, o tanun me tira ape nagok we saru o siopa we terelawa, 31ti vet wa, Kornelius, me roŋotag nom o tataro, wa nom o aleŋa tam o iloilo nagoi alo nagon God. 32Ka vatraŋ isei i Jopa, ka suware i Simon ma, navaruesasana i Peter; ni we toga tawu alo iman Simon i mawu vin qoe, a panpan lau, pa ni me mule ma, ni te vava muniko. 33Pa nau me vatraŋ gaplot iragetol suriko; wa ko me mule ma, we wia nane. Wa ilokenake kamam nol we tira alo nagon God, si a roŋotag o gene ŋaŋ God me vareg ti muniko.

34Naŋ i Peter me waka navalana, ti vet wa, We nun, nau we ilo vaglala mok si God gate lav vires nagoi. 35Panava si amaira val veve sul isei we momogoa, wa we gagapalag taniniga, te lav vasgotia. 36Kamiu we gilala momiu ape vavae ni me vatraŋ ma sur ra nanatun Israel, wa we gaganag o lea we wia ape tamata mun Jesus Christ, pa ineia Lord goro o ronronotar; 37ape vavae ilone me gao waliog o Judea, me qeteg raka a Galilea, me paso veta o vasugroŋo i John me toretore apena; 38apen Jesus ta Nasaret God me uraia mun o Vui we Roŋo wa o mana, wa ni me mule kelkel, me gagapalag wia, wa me ge esu irasei ŋaŋ i Satan me mana ineira ti, apen God amaia. 39Wa ikamam ira gaganag we tira ape gene ŋaŋ nol ni me ge ti alo vanuara ta Judea, wa a Jerusalem; pa neira me ge mateia, me vatakaua avune tangae. 40Pa God me ge tavaraka ineia alo qoŋ vatoliu, wa me la ineia at sin ŋaŋa lue; 41pa gate mun o sul nol, nava mun ira gaganag we tira, God me ilo raka moai ti, ikamam qa, kamam me ganagana tuwale, wa me unun tuwale ti amaia, ni me tavaraka veta nan ra mate. 42Wa ni me vatraŋ kamam si a toretore goro o sul, wa si a gaganag we tira, si iloke ineia God me vonoa si a veveg ira esu tara mate mulaŋ. 43Wa ira prophet nol we gaganag we tira ape neia, si isei qe nomtupua te le mona o nomvitag pugai mun nasasana.

44Wa alo i Peter qale vava o vavae ŋaŋ iloke, o Vui we Roŋo me siwo avunara nol we roŋotag o liŋai. 45Wa ira nomtup tamera teve vaglala, irasei me mule tuwale ma ti amen i Peter, we mamakei lava; ape me liŋ siwo o sogov Vui we Roŋo avunara sul ŋaŋ we sea. 46Ape neira me roŋotag neira we vava gato, wa we ge ronoga God. Naŋ i Peter me valui goro wa, 47Isei te gatogoro lai tea o pei, si nan wa vasugroŋo o tanun ŋaŋ iloke me lav mora o Vui we Roŋo tama inina? 48Naŋ ni me vet si a vasugroŋo neira alo sasan Jesus Christ. Naŋ neira me paere munia ni toga amaira o tuan qoŋ.

Currently Selected:

O Gagagapalag 10: MOTA

Highlight

Copy