O Gagagapalag 11

1Naŋ ira sala tara retatasiu we toga val Judea me roŋotag si ragai talo sul ŋaŋ we sea me lav mora mulaŋ o vavae non God. 2Wa i Peter me mule sage veta i Jerusalem, wa ragai tamera teve vaglala we varleasag amaia, we vet wa, 3Ko me mule pata sur o tanun gate teve vaglala, wa ko me ganagana tuwale amaira. 4Naŋ i Peter me qeteg raka, ti gaganag lue tapare mun neira, ti vet wa, 5Inau alo laqlaqe vanua a Jopa, te tatataro ti, wa me suar mun nau, wa na me ilo o taqaŋiu, o gene ti siwo ma tama o tavala epa we poa, me varoro sur mavunana mun o sigrae nivat; qara niŋa inau. 6Wa nau me matarag nononom ilolona, qara ilo o sale qoe ŋaŋ talo tano o raŋoi nivat apena, wa o qoe turtur ŋaŋ, wa o gene ŋaŋ we kalokalo, wa o manu ŋaŋ talo maea. 7Wa na me roŋotag mulaŋ o liŋai, ti vet mun nau wa, Tavaraka, Peter, ka vus, ka pig. 8Naŋ nau wa, Nipea nan wa, Lord, ape savasava we purepurei si we lepa gate mule tea tiqa ilo valak. 9Pa o liŋai me valui goro nau vagaruei ma vunana wa, Ko wa ge purepurei o sava God me ge wenewene. 10Wa me ge paso tamaike vagatol, qara rave kalo kel o savasava ivunana. 11Wa gaplot, ilo, o tanun pultol me tira ape nago ima kamam we toga alolona, me vatraŋ neira ma ti a Kaisareia sur nau. 12Naŋ o Vui me vet mun nau si na mule tuwale amaira, wa nipea nom varuarua. Wa o retatasiu iloke pul laveatea me gora amen nau, wa ikamam me mule pata ilo iman o tanun ilone. 13Wa ni me gaganag mun kamam, si ni me ilo gasavai o angel we tira alo imana, we vet wa, Ka vatraŋ isei i Jopa, ka suware i Simon ma, navaruesasana i Peter, 14wa ni te gaganag muniko o vavae ŋaŋ ko te esu apena, iniko, wa naimama nol. 15Wa alo inau we qeteg raka o vavava, o Vui we Roŋo me siwo avunara tama avunanina alo qetegiu. 16Wa na qara lolomaran kel ape mon Lord o vavae ni me vet wa, I John gai me vasugroŋo mun o pei; pa te vasugroŋo kamiu mun o Vui we Roŋo. 17Pa si God me vasoal veta ma we sasarita mun neira o sogov ilone, tama mun nina mulaŋ we nomtup raka monina i Lord Jesus Christ, inau isei we vavakae si na ge goro lai God? 18Wa neira me roŋotag o ike, me toga roroŋo, wa me wievavae God, we vet wa, Aia, pa God me le at mun o sul ŋaŋ we sea o nomleas a esu kel apena!

19Naŋ iragai me salsaleŋa ape ganawono me qeteg ti amen Stephen, pa me mule sir vanua, me niŋa Phenikia, wa Kupros, wa Antiokia; pa gate gaganag o vavae munsei, panava mun ra Israel magesera. 20Wa ira tuanira o tanun ta Kupros, wa ta Kurene, me niŋa i Antiokia, wa vava mun ra ta Grekia mulaŋ, we gaganag o lea we wia apen i Lord Jesus. 21Wa napanen Lord amaira, wa o sul we qoqo me nomtup, qara vusiag kel sur i Lord. 22Wa o roro ike ape neira me roro nol ilo qoro loglue a Jerusalem: wa neira me vatraŋ at i Barnabas ni mule niŋa a Antiokia. 23Wa ni me niŋa aia, wa me ilo mona o sogov mon God, ti malakalaka apena, wa ni me vava varagai neira nol, si neira a nom mot alo toqara ape kata maremare amen i Lord. 24Ape neia o matai tanun, wa we uravag o Vui we Roŋo wa o nomtup; wa me tuan o sul we qoqo mun i Lord. 25Naŋ ineia iloke me rowolue at i Tarsus, sin sike i Saul. 26Wa me ilo suaria, ti vantakia i Antiokia. Wa me ge tamaike, si irarua me vug tuwale amen o loglue o tau tuwale nol, we vatvatogo o sul we qoqo. Wa me log totoworag ira tiŋqoro si ira Christ a Antiokia.

27Naŋ alo qoŋ ŋaŋ ilone ira tuan prophet me mule siwo nan o Jerusalem i Antiokia. 28Wa tuara amaira me tavaraka, nasasana i Agabus, ti gaganag vaglala mun o Vui, si rigrig o maro liwoa te ge o marama nol; wa me ge tamaike alo qoŋin Klaudius. 29Naŋ ira tiŋqoro, tama isei te la lai, isei te la lai, me nom mot si a la o aleŋa te tiratirag mun o retatasiu we toga a Judea. 30Wa neira me ge tamaine, wa me vatraŋ at sur ra tamaragai mun napanenra Barnabas tana i Saul.

Currently Selected:

O Gagagapalag 11: MOTA

Highlight

Copy