O Gagagapalag 28

1Wa me rowo wasawasa qet, kamam qara gilala o sase vanua ilone si Melita. 2Wa iragai we gato gap ilone me lolowia aneane ikamam, wa neira me pulaŋ o av, wa me lav vasgot nol kamam, ape wena te qale wena ma, wa ape malaso. 3Pa i Paul me vile o vavtig ŋarŋar lito, ti taqai vawo av, wa o mata me siolo lue ape tutun, wa me ŋit teter napanena. 4Wa iragai we gato gap ilone me ilo o mata qale tako ape panena me varvava wa, We nun i gene iloke o tanun vuspal, ni me rowolue wasawasa ti nan o lama pa i Dike gate ukegia sin esu. 5Pa nava ni me neneŋag savrag o mata vawo av, wa gate vivtig apena. 6Pa neira me nonom si ni te riga gaplot, si te mas mate ran siwo, wa neira me nerei maul apena, pa gate ilo si o mala sava we ge neia, neira me nom ris, we vet si neia o god.

7Wa alo masaoi ilone nautagin Publius, neia o moe tanun talo vanua ilone, wa ni me lav vasgot kamam wa me kokor lolowia kamam mun tawuna o qoŋ nitol. 8Wa i taman Publius iloke me risa, o gopae tutunsag wa o sisire nara me ge neia; pa i Paul me mule pata suria, ti tataro, ti taŋovia, wa qara ge esua. 9Wa me ge o ike, iragai nol we sea we gopagopa alo vanua ilone me mulemule ma suria, we esuesu apena. 10Wa neira me tuan kamam mun o sogov ŋaŋ we qoqo, wa kamam we tak o gamova, neira me sogov vawo aka o savasava kamam we maros ran.

11Wa o vula nitol me paso, kamam me tak o gamova vawo aka ta Aleksandria, o vaglala o Varapa, pa me toga ti alo rara alo vanua mot ilone. 12Wa me olo a Surakus, kamam me toga aia o qoŋ nitol. 13Wa nan aia kamam me gamo tal rowo qara mule niŋa Regium, wa o qoŋ tuwale me paso o laŋ sage me saw lue, wa tavala maran kamam me niŋa a Puteoli. 14Wa ikamam me ilo suar tuan retatasiu aia, wa neira we vet maremare si kamam a toga amaira o qoŋ ta lavearua; wa tamaine gina ikamam me mule i Rom. 15Wa o retatasiu taia me roŋotag naroromam, neira qara mule at si a varniŋa kamam a Apii Forum, wa a Taverne Nitol; naŋ i Paul me ilora, ti wievavae God, wa qara sov naapena.

16Wa ikamam me niŋa pata a Rom i liwoa goro melnol qara sueg ira rotrot ŋaŋ mun i moai goro ira ilogoro; pa me ukeg i Paul sin toga magasena tana o soldier tuwale we ilogoroa. 17Naŋ me ge tamaike, o qoŋ nitol me paso, ni qara suware tuwale ma o moe tanun ŋaŋ amaira Israel. Wa neira me vug tuwale, ti vet mun neira wa, Ragai ratasik, na gate ge ava ilo o sava mun o sul si mun naliŋara tupunina, panava me sueg rot ran nau ma a Jerusalem ilo panera ta Rom. 18Wa neira me sikesike ape nau qara maros si a ukeg inau, ape manig matea tagai apenau. 19Pa ira ta Judea me tamtames, nau qara log raka ran i Kaisar, pa gate tama si o tila goro sul anak amenau. 20Pa iloke o manigiu nau me suware tuwale kamiu ma si kamiu a ilo inau, wa we varvava amenau; ape me rot inau mun o taltalai iloke, manigiu o maros nerei nora Israel. 21Naŋ neira me vet munia wa, Kamam gate taur ilo o raverave apeniko nan o Judea, wa o retatasiu ma aia gate gaganag lue ilo o sava, wa gate vava we tatas apeniko mun kamam. 22Pa ikamam we maros si a roŋotag nom o nonomia naniko; pa ape vilewora iloke kamam we gilala si valvanua ŋaŋ we vasvasir goro gese.

23Naŋ neira me ligog mot o qoŋ, wa we qoqo me mule ma suria ilo ima ni me toga tawu aia, wa ni me gaganag matanur mun neira, wa me gaganag we tira ape marana non God, wa me pesira apen Jesus mun o vavae talo lea mon Moses, wa tamora prophet ŋaŋ, alo matava ma gai niŋa o ravrav. 24Wa o tuaniu me nomtup o gene me vava ti apena, wa o tuaniu gate nomtup. 25Wa neira gate nom saratuwale, neira me rowolue. Pa i Paul me vet paspasoanai o vavae tuwale was, We wia ras o Vui we Roŋo me vava mun i Isaia o prophet mun ratamamiu, 26we vet wa,

Ka mule sur o sul iloke, ka vet wa,

Kamiu te roŋotag mun o tano roŋroŋotag pa tete lolomaran qalo apena:

Wa kam te ilo mun o ilova, pa tete ilo qalo vaglala:

27Ape toqe sul iloke me lologoro:

Wa we roŋotag we mava mun naqorora,

Wa neira me vataqav namatara;

Nan neira wa ilo vaglala mun namatara,

Wa nan wa tiŋqoro mun naqorora,

Wa nan wa lolomaran mun natoqara,

Wa nan wa vusiag kel,

Wa na te ge esura.

28O manigiu o ike, tur lolomaran momiu si me vatraŋ at o vaesuva mon God iloke mun o sul ŋaŋ we sea; ineira mulaŋ te tiŋqoro. 29Wa ni me vet paso tamaike, ra Israel me rowolue, we varleasag vires neira vagaqoqo.

30Wa ni me toga alo ima ni me tove ti o tau wonowono nirua, wa we lav vasgot iragai ŋaŋ we mule ma suria. 31Wa we toretore ape marana non God, wa we vatvatogo ape gene ŋaŋ apen Jesus Christ, mun we wawaŋ lue qetqet ran, wa isei gate gatogoroa.

Currently Selected:

O Gagagapalag 28: MOTA

Highlight

Copy