O Gagagapalag 27

1Naŋ me vet mot si kamam a gamo i Italia, neira me sueg i Paul tara tuan tanun rotrot mulaŋ we sea mun i liwoa goro soldier melnol, nasasana i Julius, talo vavtig Sebaste. 2Wa kamam me vega kalo vawo aka ta Adramutium me toga taurmate ti si a gamo sirpan a Asia, wa me tavaraka; wa i Aristarkus o ta Makedonia we ta Thesalonika amen kamam. 3Wa a tavala maran kamam me niŋa a Sidon, wa i Julius me lolowia mantag i Paul, wa me ukegia ni mule sur rapulsalana si neira a tokosia. 4Wa me tavaraka alo vatine, kamam qara gamo alo ruruŋe Kupros, ape laŋ me qalo goro kamam. 5Wa me gamo lue o lama ta Kilikia wa ta Pamphulia kamam qara niŋa a Mura o laqlaqe vanua ta Lukia. 6Wa i liwoa goro soldier melnol me ilo suar aia o aka ta Aleksandria te gamo i Italia; wa ni qara vile kamam vawo aka ilone. 7Wa o aka me rusuŋvag kamam o qoŋ we qoqo wa o mantagai tie sin pea sar taniniga ape Knidos, ape o laŋ me varu goro kamam; wa kamam me gamo alo ruruŋe Krete we sar taniniga Salmone. 8Wa mantagai tie sin pea gamo sir pan vanua ilone kamam qara niŋa o tanoi me log si o Ruruŋa we wia, wa o laqlaqe vanua Lasaia arivtag.

9Wa o qoŋ we qoqo me paso, wa te gamo tatu goro o mateawota wun ilokenake ape qoŋ garagara mamasa me wesu veta, i Paul me ŋorov gorora, 10ti vet mun neira wa, Ragai, na we ilo vaglala mok si alo gamova iloke o mateawota apena, wa te rowo reag aneane nan nina; pa gate reŋe vires wa o aka, pa naesunina kel mulaŋ. 11Pa i liwoa goro soldier melnol me tiŋqoro o qat tagiaka wa o tagiaka, wa ni gate tiŋqoro o gene ŋaŋ i Paul me vet apena. 12Wa o ruruŋa ilone gate wia mantag si a toga aia alo rara, iragai we qoqo me vet si a tavaraka nan aia, si ta niŋa lai wun i Phenike, wa qara toga alo rara aia; ilone o ruruŋa tavala Krete we ilo i sage wa i rowo. 13Wa o laŋ ta i sage qara saw malumlum, ineira me nonom si te lai o gene neira me maros ti apena, wa me rave kalo o vatligo neira qara gamo sisirpan a Krete. 14Wa gate maul o siwo liwoa me siwo ma, we log o sase laŋ ilone si Euraqilo. 15Wa o laŋ me poarag o aka, pa gate wasgoro lai o mate laŋ, kamam me tivtag o aka, wa me sale. 16Wa me sesene ape ruruŋe vanua wot, o sasai Klaude, me galoi ape sausau kalo o welewele. 17Wa me sau kalo lai, neira qara rapai o aka, we rot goro, wa me gogolo nan wa rowo ilo one we marororo, me la sur o soesoe aka, wa me sale tamaine. 18Wa kamam me taptapagolegole aneane, wa tavala maran qara sese savrag raka o reŋe. 19Wa alo qoŋ vatoliu neira me savrag mun naturpanera o soesoe aka. 20Wa o qoŋ we qoqo o loa gate siŋa lue wa o vitu tagai, wa o laŋ vus we poa qale vus kamam, o nonomia ape esuva me lareag qet veta nan kamam. 21Wa me matmatir wora maul, i Paul qara tira lue alo vatitnara ti vet wa, Ragai, si kamiu me roŋotag nau, ta tete tavaraka nan Krete, inina gate vatatu o mateawota iloke, wa o gene gate rowo reag tamaike nan nina. 22Wa ilokenake na we pes kamiu tur mamasug kel naapemiu; ape naesunsei amen kamiu tete rowo nania, nava o aka vires. 23Ape alo qoŋ nake iloke o angel anan God, inau qa o tanun anana wa nau we gagapalag munia, me tira peteŋ nau, 24ti vet wa, Nipea gogolo, Paul, ape ko te tira ran ape nagon Kaisar; wa, ilo ma, God me le at muniko iragai ŋaŋ iloke we gamo tuwale amaiko. 25Gai ragai, tur mamasug naapemiu; ape nau we nomtup God si te ge ran tama me gaganag veta ti mun nau. 26Pa nava nina te sage ran avawo tuara vanua wot.

27Wa o qoŋ saŋavul tuwale o numei vavatiu me wesu, wa kamam qale wawaliog alo masao Adria; naŋ alo tine qoŋ ragai talo aka me nonom si me rivtag tuara vanua. 28Wa neira me tul iloilo, qara gilala was tama o rova vaga saŋavul rua, wa me asau mantagai neira me tul iloilo mulaŋ wa qara gilala was tama o rova vaga saŋavul tuwale o numei tavelima. 29Wa neira me gogolo si nan wa sage wun avawo malo, me tul o vatligo nivat ape kere aka wa we maros lava sin maran. 30Wa iragai ŋaŋ talo aka me ge si a toavtag o aka, me varoro sur siwo veta o natiaka o manig gale tama si a tul togtogoa o vatligo ape nago aka. 31Pa i Paul me vet mun i liwoa goro melnol tara soldier ŋaŋ wa, Si ira gene ŋaŋ iloke ta tete toga alo aka kamiu tete esu lai. 32Naŋ ira soldier ŋaŋ me teve mot o tal ape natiaka, qara ukegia sin sale. 33Wa alo loŋloŋe maran i Paul ti pes raka ineira nol si neira a ganagana, ti vet wa, O qoŋ saŋavul tuwale o numei vavatiu nake kam me nerei, wa me matmatur wora, wa gate gana o sava. 34O manigiu iloke, na we pes kamiu si a gana o sinaga, ape esumiu iloke; ape o tape uluna tete tagea lai nan naqatunsei amen kamiu. 35Wa me vava paso tamaike, ti taur o bread, ti wievavae God alo vatitnara nol; ti tuqewora, ti qeteg ganagana. 36Wa neira nol me mamasug naapera, qara gana mora. 37Wa ikamam nol alo aka melnol vagarua o avaviu saŋavul lavearua o numei laveatea. 38Wa me gana toqo, neira me savrag siwo o korn ilo lama, we ge o aka sin sage mataketake apena. 39Wa me maran veta, neira gate gilala o vanua ilone; pa neira me ilo suar o kerepei wa o oneone aia, wa neira me varvava apena si te ge lai wun o aka sin wora aia. 40Wa me savrag vitag o vatligo alo lama, wa me ul saratuwale o gae nan o tur wose, wa me rave kalo o epa lava ape laŋ, neira qara sasawa ilo one. 41Wa neira me roro alo lama variaso wa o aka qara wora aia, wa o qati aka me warget pa me pute netenete, pa o kere aka me qeteg maworawora ape rep liwoliwoa. 42Wa ira soldier ŋaŋ me vet mora si a ge mate ira gene rot si nan neira wa garu vitag o aka, wa totoa. 43Pa i liwoa goro soldier melnol me maros si a vaesu i Paul, me gatogorora nan wa ge tamaine, wa me vet si irasei qe garugaru wia te rowosur amoa, a garu kalo salilina; 44wa iragai qale toga, tuaniu vawo irav, wa tuaniu mulaŋ vawo soesoe aka. Wa me ge ran tamaine, neira me rowo wasawasa nol salilina.

Currently Selected:

O Gagagapalag 27: MOTA

Highlight

Copy