O Gagagapalag 26

1Naŋ i Agripa ti vet mun i Paul wa, Sowo, me ukeg muniko si ka vava moma. Wa i Paul me sigag lue napanena ti is nania wa, 2Nau we nom qaraqara kel nau, Agripa maranaga, ape nau te is nan nau qarig alo nagoma o savasava ŋaŋ ra ta Judea we tila inau apena. 3Ape ko we menaro raka sage ape liŋai ŋaŋ nora Israel wa ape nor o vavae varleasag nol; o manigiu ilone nau we paere muniko si ka roŋotag malumlum inau. 4Ra ta Judea nol we gilala mora nok o togara alo lumagav ma, na me qeteg toga amaira talo sul inau, wa a Jerusalem mulaŋ. 5Wa neira we gilala tuai ran ma, si neira qe maros we vava lue apena, si nau me toga o Pharise tataga o liŋai we togtogoa aneane tape liŋe gagapalag roŋo inina mun God. 6Wa na we tira nake iloke, wa te veveg nau ape we maros nerei o ligoligog God me ligog ti apena mun ra tupunina; 7o veve nina saŋavul tuwale o numei nirua we gagapalag togtogoa val qoŋ val maran apena, we maros nerei si a niŋa o ligoligog ilone. Wa ira Israel we tila inau ape maros nerei ilone, gai maranaga. 8Ape sava kam we veveg si o gene iloke tete nomtup lai apena, si God qa we na raka kel ira mate? 9Inau gina me nonom si namok ran si na ge goro vagaqoqo nasasan i Jesus ta Nasaret. 10Wa nau me ge tamaine a Jerusalem, wa na me pala goro ira roŋo we qoqo alo ima rotrot, ira oloolo liwoa me le ti mun nau o mana apena; wa me ge mate neira, wa nau me veveg mok tuwale si a gege neira. 11Wa na me sar mun neira vaga qoqo val ima siwo tuwale, wa me ge neira si neira a vava nawono; wa me vara loloqoŋ nau o lologagara, nau me ara ineira ilo vanua ŋaŋ we sea. 12Naŋ alo we ge tamaike wa we mule i Damaskus ape ra oloolo liwoa me le ma o mana wa me vono nau apena; 13alo tine liwomaran, gai maranaga, na me ilo mok a matesala o valawar mavunana we siŋa nan o siŋesiŋe loa, we sar waliog nau tak ragai we mulemule tuwale amenau. 14Wa ikamam nol me mamas qet alo tano, na me roŋotag mok o liŋai we vava mun nau mun o vavae ta Hebrew wa, Saul, Saul, ape sava ko we gege inau? ko te vara kilau matila o nago isar. 15Naŋ nau wa, Iniko isei, Lord? Naŋ neia wa, Inau i Jesus ko we gege inau nake. 16Pa tavaraka, tira mun naraŋoma, ape manigiu iloke nau me ŋaŋalue muniko, si a vonogiko mun tanun gagapalag, wa mun gaganag we tira ape gene ŋaŋ ko me ilo nau ti apena, wa ape gene ŋaŋ na te ŋaŋalue muniko aŋaisa apena. 17Wa na te wosagiko nan o sul, wa nan o sul ŋaŋ we sea na we vatraŋiko at ilokenake surira, 18si a waka namatara wa a ge vusiag kelura nan o silsiliga ilo marmararan, wa nan o mana non i Satan sur God, si neira a taur mora o ulsavrag pugai, wa o tano usurag amaira sei me varoŋora veta, mun o nomtup ape nau. 19Wa na gate tames o taqaŋiu ilone mavunana, Agripa maranaga; 20pa na me gaganag mun neira a Damaskus amoa, wa a Jerusalem, wa val vanua nol a Judea, wa mun o sul ŋaŋ we sea, si neira a nomleas, wa a vusiag kel sur God, wa a ge o gagapalag we tira ape nomleas. 21O manigiu iloke ira Israel me taur nau alo vatiu we roŋo, wa me ge iloilo si a ge mate inau. 22Wa ape God me piriŋ nau, na we tira niŋa ma o qoŋ iloke, we gaganag lue munsei qe mantagai wa munsei qe liwoa, pa gate vava seasea nan o gene ŋaŋ ira prophet wa i Moses me vet ti si te wesu aŋaisa: 23si i Christ te roŋo lai o vivtig, wa si ineia o moai mun o tavaraka nora mate te vagaus ma o valawar mun o sul iloke, wa mun o sul ŋaŋ we sea.

24Wa ni we is nania tamaike, pa i Festus we vet eleele wa, Paul, ko we lelera, o sale lolomaran we valeraiko. 25Naŋ i Paul wa, Na gate lelera, wowut Festus, pa na we vava lue o vavae we nun wa we vatawasai. 26Ape o maranaga we gilala ape gene ŋaŋ iloke, wa na we wawaŋ alo nagona; wa na we gilala mok si gate liŋarag tea nania o ike ŋaŋ; ape gate ge pata o gene iloke alo wonowono. 27Agripa maranaga, ko we nomtup ira prophet ŋaŋ? Na we gilala mok si ko we nomtup. 28Naŋ i Agripa mun i Paul wa, Ko we gasuware qatutui gap nau si na tanun anan Christ. 29Naŋ i Paul wa, Nalolok gai we toron iloke amen God, si ta qatutui si ta maul, si gate iniko vires magesema, nava si iragai nol mulaŋ we roŋotag nau qarig te qeteg tama inau ran, pa o garotrot iloke ŋaŋ nipea.

30Naŋ i maranaga me tavaraka, wa o governor, wa i Bernike, wa iragai we pute tuwale amaira. 31Wa me vanreag, neira me varvava wa, I gene iloke gate ge o sava we tira ape matea si ape garotrot. 32Naŋ i Agripa me vet mun i Festus wa, Me ukeg mamasug lai i gene iloke si ni gate log raka i Kaisar.

Currently Selected:

O Gagagapalag 26: MOTA

Highlight

Copy