O Gagagapalag 25

1Naŋ i Festus me siwo ilo non o tano liwoagoro, wa o qoŋ nitol me paso ni qara mule kalo nan o Kaisareia i Jerusalem. 2Naŋ ira oloolo liwoa wa ira moai amaira ta Judea me gaganag munia apen i Paul; wa me paere munia, 3we vatapar o aleŋa goroa wasi ni vatraŋ goro i Paul ma i Jerusalem; pa neira te pute goroa a matesala si a vus mateia. 4Pa nava i Festus me valui gorora si we matagisgis goro i Paul a Kaisareia, wa rigrig ni te siwo mona aia. 5Wa ni me vet mulaŋ wa, Irasei amen kamiu we liwoa neira a taqel tuwale amenau, wa si ta gene kiskislag tea amen o tanun iloke, neira tila ineia apena.

6Wa ni me toga amaira o qoŋ gate purat nan laveatol si saŋavul, ti taqel siwo i Kaisareia, wa tavala maran ti pute vawo tano veveg, ti vet si a lav i Paul ma. 7Wa ni me mule ma, ra ta Judea me taqel ma ti nan o Jerusalem me tira waliogia wa me tila ineia ape gene we qoqo wa we mava; wa neira gate tila qalo laia. 8Pa i Paul me is vitag mona we vet wa, Na gate ge tatas ilo ape lea nora Israel, si ape vatiu we roŋo, si apen Kaisar. 9Nava i Festus me maros we ge lolowia ra ta Judea, ti valui goro i Paul we vet wa, Ko we maros we mule sage i Jerusalem, wa te vevegiko aia ape gene ŋaŋ iloke ape nagok? 10Naŋ i Paul wa, Na we tira ape tano veveg non Kaisar, wa te veveg ran nau aia; pa na gate ge valvalil ilo mun ra ta Judea, tama iniko mulaŋ we gilala mantag moma. 11Pa si nau me ge valvalil o sava, si me ge o sava we tira ape matea, na tete gogoroi kel nau nan wa mate; pa si o gene ŋaŋ neira we tila inau apena qe tagai, isei tete sueg mamasa lai nau mun neira. Na we log raka i Kaisar. 12Naŋ Festus me varvava paso amenra talo vavtig veveg anana, me valui goroa wa, Ko me log raka i Kaisar? Sowo, ko te mule ran sur i Kaisar.

13Wa o tuan qoŋ me paso, i Agripa o maranaga tana i Bernike, me niŋa Kaisareia, wa we wievavae i Festus. 14Wa irarua me toga aia o qoŋ we qoqo, i Festus me gaganag nurnur mun o maranaga o gene ŋaŋ apen i Paul, ti vet wa, O tuara tanun iake i Feliks me tivtagia we rot. 15Wa na we toga a Jerusalem, ira oloolo liwoa ŋaŋ wa ira tamaragai tamaira ta Judea me gaganag lue munau ape neia, we paere si na veveg qaloa. 16Wa nau me valui goro neira wa si gate liŋara ta Rom si a sueg mamasa o tanun, iragai we tila ineia gai tira alo nagona, wa a maukegia ni is nania o tila. 17Pa neira me van tuwale ma iake, na gate maul apena, pa tavala maran na me pute vawo tano veveg, me vet si a la ma o tanun ilone. 18Wa iragai we tila ineia we tavaraka goroa, pa gate tila ineia ape gene kiskislag, tama nau me nonom mok ti. 19Pa o tuan vavae varleasag goroa amaira ape mateliŋara, wa apen o tuara, i Jesus, me mate veta, pa i Paul me vava si ni we esu. 20Wa me tama mun nau na sike tama avea ape gene ŋaŋ tamaine, wa na me varusia si ni we maros we mule i Jerusalem, si a vevegia aia ape ike ŋaŋ. 21Pa i Paul me log raka si a taur goro galtagia i Augustus gai veveg lue ape neia, na qara vet si a tauria nau gai vatraŋia at sur i Kaisar. 22Naŋ i Agripa me vet mun i Festus wa, Pa na we maros we roŋotag mok i gene iloke. Naŋ neia wa, Amaran ko te roŋotagia.

23Wa tavala maran i Agripa tana i Bernike me mule ronoga ma, wa me kalo pata ilo vatiu roŋroŋotag, wa ira liwoa goro tar ŋaŋ wa ira moe tanun talo laqlaqe vanua amen rara, i Festus me vet apena, neira qara tak i Paul ma. 24Naŋ i Festus wa, Agripa maranaga, wa ragai ŋaŋ me vug tuwale ma, kamiu we ilo momiu i gene iloke, pa o sul nol ta Judea a Jerusalem wa iake mulaŋ me tiatias nau ape neia, me vava eleele wa si gate wia ni qale esu. 25Pa na me ilo mok si ni gate ge o sava we tira ape matea; wa ni me log raka mona i Augustus, wa nau me nonom mot mok si na vatraŋia at. 26Pa o liŋe nun tagai ape neia si na rave mun tagik apena. O manigiu iloke na me lavia ma alo nagomiu, wa alo nagoma raka sage, Agripa maranaga, si qe sikesike paso na te rave lai o sava. 27Ape na we nonom si we mataqurega, ta vatraŋ at i gene rot, wa gate vet lue tuwale o gene tila ape neia.

Currently Selected:

O Gagagapalag 25: MOTA

Highlight

Copy