O Gagagapalag 24

1Wa o qoŋ tavelima me paso, i moe oloolo i Ananias, tara tuan tamtamatua wa o tuara liŋeul i Tertulus, me taqel tuwale siwo, wa neira me vava lue goro i Paul mun o governor. 2Wa me suware ineia ma, i Tertulus qara tila raka ineia, ti vet wa, Wowut Feliks, ikamam we toga tamata o manigiu iniko, wa me wurvag veta o gene ŋaŋ we qoqo alo sul iloke ape ko me nom raka ti apena; 3wa kamam we taur o ike ŋaŋ vagae wa val tanoi mun o loloi we vareaniko apena. 4Pa nan nau wa vule ko, na we paere muniko, si ka roŋotag lolowia ikamam, tete maul. 5Ape kamam me ilo i gene iloke we vakiskislag, wa o qeteg matikotiko amaira Israel nol we toga a marama nol, wa ineia o moai amaira talo vilewora ta Nasaret. 6Wa ni me ge ilo mulaŋ si a ge savsavawora o vatiu we roŋo; pa kamam me tauria, wa me maros we vevegia tataga nomam o lea. 7Nava i Lusias i liwoa goro tar me mule ma, ti wosagia mun o vavakae liwoa nan napanemam, 8ti vatraŋ ragai me tila ineia ti, si neira van ma suriko; wa ko ta sike waririag amaia, ko te lolomaran lai moma ape gene nol ŋaŋ iloke kamam we tila ineia apena. 9Wa ira ta Judea me vava piriŋia, we vet si we tamaine o ine ŋaŋ.

10Wa o governor me qatmawui munia, i Paul qara valui wa, Ape na we gilala si ko me veveg ra talo sul iloke o tau we qoqo veta, o manigiu ilone nau we is vitag apesov nan nau ape mok gene ŋaŋ. 11Ape ko te lolomaran moma lai si naqoŋik me saŋavul tuwale o numei nirua gese iloke nan o qoŋ na me mule sage i Jerusalem si a tataro. 12Wa ineira gate ilo qalo inau alo vatine we roŋo we varleasag amensei, si we ge matikotiko ilo o sul, si alo ima siwo tuwale ŋaŋ, si alo laqlaqe vanua. 13Wa ineira tete tila qalo lai ape gene ŋaŋ iloke neira we tila nau nake apena. 14Pa na we gaganag lue tamaike muniko si nau we gagapalag mun God nora tamamam alo Matesala iloke ineira we log si o vilewora; wa na we nomtup nol o gene ŋaŋ we sasarita ape lea, wa me rave veta ti alo mora prophet ŋaŋ; 15wa me maros nerei mun God si ra mate, ira taniniga wa ira kiskislag, te tavaraka gegese aŋaisa; pa neira mulaŋ we toga nerei iloke. 16Wa apen iloke na we ge iloilo si nok o lolomaran kel ni toga wasawasa vagae nan o gene tutuag apen God wa ape tanun. 17Pa o tau we qoqo me paso, nau me mule ma si na le o aleŋa mun o veve sul inau, wa o oloolo. 18Wa alo tamaine me ilo suar inau alo vatine we roŋo me ge wenewene veta nau ti, pa o sul tagai wa o qorogatagata tagai; pa o tuaniu tamaira Israel we ta Asia aia. 19Wa namoragai ilone ran si a mule ran ma alo nagoma, wa si a tila, o gene tila ta apena amaira ape nau. 20Pa si ta tagai tamaine, ira gene iloke a gaganag lue, si neira me ilo qalo o sava malagene amen nau, alo nau we tira alo nagor o vavtig veveg; 21pa o vavae iloke wun tuwale, na me vava eleele alo na me tira alo vatitnara wa, Kamiu we veveg nau qarig ape tavaraka kel nora mate.

22Wa i Feliks, ni we gilala wurvag ape Matesala ilone, ti vasur goro galtag neira, ti vet wa, Aŋaisa i Lusias i liwoa goro tar qe siwo ma, na te sike waririag o gene tamomiu. 23Wa ni me vet mun i liwoa goro melnol si ni ilogoroa, wa si nipea taktakul maremarea, wa nipea gatgatogoro tea ira tuanina si qe tataga suria.

24Wa o tuan qoŋ me paso, i Feliks tana rasoana i Drusila, ineia tamaira Israel, me van ma, wa ni me vatraŋ goro i Paul, wa me tiŋqoroa we vava ape liŋe nomtup apen i Christ Jesus. 25Wa ni we vava nurnur ape liŋe taniniga wa ape liŋe ora goro, wa ape we veveg aŋaisa, wa o surere me lav i Feliks, pa ti vet wa, Ilokenake ka vareag galtag, wa alo qoŋ wasawasa na te suware ko ma. 26Wa ni me maros mulaŋ si Paul ni la o som munia, wa me suwarea ma vaga qoqo we varvava amaia. 27Nava o tau nirua me paso, i Feliks me lav i Porkius Festus sin leasia; wa ni me maros we ge lolowia ra ta Judea, ti tivtag i Paul we toga rot.

Currently Selected:

O Gagagapalag 24: MOTA

Highlight

Copy