O Gagagapalag 23
23
1Naŋ i Paul me sagarag o vavtig veveg, ti vet wa, Ragai ratatasik, na me rowogis ma mun God mun o lolomaran kel we wia, niŋa o qoŋ iloke. 2Naŋ o moe oloolo i Ananias me vet mun ragai me tira arivtagia si a wosa goro navalana. 3Naŋ i Paul me vet munia wa, God te wosa goro ko rigrig ti, paparis we lamas aqaga! Pa ko we pute si a veveg nau tataga o lea, wa we vet si a vus raka nau we ge goro o lea? 4Wa iragai we tira rivtag we vet wa, Ko we vava vasigtag i moe oloolo anan God? 5Naŋ Paul wa, Pa na gate gilala, ratatasik, si neia i moe oloolo, ape me rave veta ti we tuai wa, Nipea vava tatas isei we liwoa goro o sul anama. 6Nava i Paul me ilo mona si o tavala vavtigiu ira Saduke wa o tavaliu ira Pharise, ti vet eleele alo vavtig veveg wa, Ragai, ratatasik, wa inau o Pharise, natura Pharise, wa we veveg inau ape maros nerei o tavaraka kel nora mate. 7Wa me vava paso tamaike, qara qeteg varleasag amaira Pharise tara Saduke, wa o sul me vilewora. 8Apen ra Saduke ŋaŋ we vava si o tavaraka kel tagai, wa o angel tagai, wa o vui tagai; nava ira Pharise ŋaŋ we vet lue si tatarua apena. 9Wa o rorovia we poa me gorogoro raka, wa ira vatogo amaira Pharise me tavaraka, wa me varleasag, we vet wa, Ikamam gate ilo qalo o gene kiskislag amen i gene iloke; sa si o vui si o angel wun me vava munia! 10Wa o varleasag liwoa me gorogoro, i liwoa goro tar me gogolo si neira wa sare i Paul, ti vet mun o vavtig soldier ŋaŋ neira siwo si a wosagia nan alovatitnara, wa a lav kelua ma ilo ima vatgao.
11Wa alo qoŋ ilone i Lord me tira peteŋia, ti vet wa, Ka sov naapema; ape tama ko me gaganag ti we tira ape nau a Jerusalem, tamaine mulaŋ gina ko te gaganag ran a Rom.
12Wa me maran, ra ta Judea me pulpul naliŋara mun o vivnag kelura, me vet si neira tete gana wa tete ima, neira gai vus mate i Paul. 13Wa neira we qoqo nan saŋavul vat me pul naliŋara tamaine apena. 14Wa neira me mule sur ra oloolo liwoa, wa ira tamtamatua, we vava wa, Ikamam me vivnag kel kamam mun o vivnag we mava, si kamam tete nimnim ilo tea kamam gai vus mate i Paul. 15Wa ikamiu tamiu o vavtig veveg a gaganag mun i liwoa goro tar, ni vantakia siwo sur kamiu, tama si we maros momiu we sike wurvag nan amoa ape neia; wa ikamam we toga taurmate, ni gate susurut tiqa ma, si a vus mateia. 16Pa vanaŋon Paul me roŋotag o vave pute goro, ti mule ti kalo pata ilo ima vatgao, ti gaganag mun i Paul. 17Wa i Paul me suware ma tuara nan ra liwoa goro melnol, ti vet wa, Ka vantak o lumagav iloke sur i liwoa goro tar, ape roro gene amaia sin gaganag munia. 18Wa ni me lavia, ti vantakia sur i liwoa goro tar, ti vet wa, I Paul i gene rot me suware nau ma suria, wa me paere mun nau si na vantak suriko o lumagav iloke, ape roro gene amaia si a gaganag muniko. 19Wa i liwoa goro tar me taur napanena, rara we va ilo we sage mot, ti varusia wa, O sava iloke amaiko ko te gaganag mun nau? 20Naŋ neia wa, Ra ta Judea me nom saratuwale si a paere muniko, si amaran ko te tak i Paul i siwo sur o vavtig veveg, tama si a mano sike wurvag nan amoa ape neia. 21Pa nipea mawui gorora, ape tuan rasei amaira we qoqo nan saŋavul vat me vivnag kelura, si neira tete gana wa tete ima, neira gai vus mateia; wa ilokenake neira me taurmate veta, wa we nerei o vatavata naniko. 22Wa i liwoa goro tar me ukeg o lumagav, ti vet maremare munia si, Nipea gaganag munsei si ko me na lolomaran inau ape ike ŋaŋ. 23Wa ni me suware ma suria i liwoa goro melnol pulrua, ti vet wa, Ura vile taurmate o soldier ta melnol vagarua, si a mule niŋa Kaisareia, wa iragai avawo horse saŋavul lavearua, wa iragai mun o isar melnol vagarua, alo qoŋ alo masaoi vatoliu. 24Wa ni me vet si a vile o tuan horse si a map i Paul avunana, wa a vantak wasawasa ineia sur i Feliks o governor.
25Wa ni me rave o raverave tamaike wa, 26I Klaudius Lusias we vava vawia mun Feliks o matai governor. 27Ra ta Judea me taur i gene iloke, wa o mantagai ti si a ge mateia, pa inau me mule surira mun o vavtig soldier, me lareagia; ape na me roŋotag si ineia o ta Rom. 28Pa inau me maros we roŋotag mok o manigiu o sava ineira me tila ineia, na me lavia siwo sur o vavtig veveg tamaira. 29Wa na me ilo mok, si neira me tila ineia ape vavae varleasag tape nor o lea, pa neira gate tila ineia ape gene we tira ape matea si ape garotrot. 30Wa me gaganag lue munau si we soravia, nau me vatraŋ gaplotua suriko, wa na me vet mulaŋ mun ragai we tila ineia, neira a vava goroa alo nagoma. Ka toga wia.
31Wa ira soldier ŋaŋ me lav i Paul, tama me vareg ti mun neira, me vantakia alo qoŋ i Antipatris. 32Pa tavala maran neira me ukeg ragai vawo horse si a mule tuwale amaia, pa neira me vusiag kel ilo ima vatgao. 33Wa ineira me niŋa a Kaisareia, wa me la o raverave mun o governor, me map mulaŋ i Paul goro nanagona. 34Wa ni me vasogo paso, qara varus si ineia ta tavala vanua avea; wa me roŋotag si ineia we ta Kilikia, 35ti vet wa, Nau te tiŋqoro mantag iniko aŋaisa, alo iragai me tila ko qe mule ma. Wa ni me vet si a ilogoroa alo ima maranaga non i Herod.
Currently Selected:
O Gagagapalag 23: MOTA
Highlight
Share
Copy

Want to have your highlights saved across all your devices? Sign up or sign in
New Testament was published by the British and Foreign Bible Society in 1931.