O Gagagapalag 22

1Ragai ira tatasik wa ira tamtamak, tur tiŋqoro nok o vavae is vitag, nau te gaganag mun kamiu ilokenake. 2Wa neira me roŋotag si ni we vava mun neira mun o vavae ta Hebrew, neira qara naenae roroŋo nan amoa, pa ti vet wa, 3Inau wa gai tamaira Israel, me wota a Tarsus a Kilikia, pa me poa sage alo vanua iloke ape raŋon Gamaliel, wa me vatogo inau mun o liŋai we togtogoa tape lea nora tamanina, wa na me lolotutun apen God, tama kamiu nol qarig nake. 4Wa nau me gege iragai tape matesala ilone gai mate, wa we suegira we rot o rereata wa o retavine ŋaŋ ilo ima rotrot. 5Wa i moe oloolo mulaŋ we gaganag we tira ape nau, tara vavtig tamtamatua nol; wa na me taur goro nan neira o raverave mun o retatasiu, wa na me mule i Damaskus, si a vantak ma we rot i Jerusalem irasei qe aia, si a sarsar mun neira. 6Wa alo nau we mulemule wa we peteŋ Damaskus, alo tine liwomaran, o valawar we poa ma vunana me siŋa waliog gaplot inau. 7Wa nau me masu ilo tano, me roŋotag o liŋai ti vet mun nau wa, Saul, Saul, ape sava ko we gege inau. 8Naŋ nau me valui goroa wa, Iniko isei, Lord? Naŋ ni we vet mun nau wa, Inau i Jesus ta Nasaret, ko we gege inau nake. 9Wa iragai amen nau me ilo o valawar, pa neira gate roŋotag naliŋan i gene we vet mun nau. 10Naŋ nau wa, Lord, na ge o sava? Naŋ i Lord me vet mun nau wa, Tavaraka, mule i Damaskus, wa te gaganag lue muniko aia ape savasava me vono veta muniko si ka ge. 11Wa na gate ilo lai ape leŋas valawar ilone, pa ira tuanik me sapan inau, wa na me niŋa lai i Damaskus. 12Wa o tuara aia nasasana i Ananias, ineia o kokor goro o lea, wa ira Israel nol we togatoga aia we sotalia, 13ti mule ma surinau ti tira peteŋ, ti vet munau wa, Tasik, Saul, ka iloilo kel. Wa alo masao qoŋ ran ilone na qara ate laŋ kalo suria. 14Naŋ neia wa, God nora tamanina me vonog moai veta iniko si a lolomaran non o maros, wa si a ilo i Taniniga, wa si a roŋotag o liŋai nan navalana. 15Ape ko te gaganag we tira ape neia mun o tanun ŋaŋ o gene ŋaŋ ko me ilo wa me roŋotag moma veta. 16Wa ilokenake apesa ko we maul? Tavaraka, taur moma o vasugroŋo, wa ka vasug reag napugama ŋaŋ mun o loglog nasasana. 17Wa me ge tamaike, na me niŋa kel i Jerusalem, wa we tataro alo vatike we roŋo, wa qara suar munau, 18wa na me iloa we vet mun nau wa, Togtogoa, vanreag lue gaplot nan o Jerusalem, ape neira tete taur mora nom o vavae we gaganag we tira ape nau. 19Naŋ nau wa, Lord, neira we gilala mantag mora si na me rot wa me towos val ima siwo tuwale irasei we nomtupuko. 20Wa alo nanaran Stephen o Martur anama me liwoliworag, inau mulaŋ me tira mok arivtag, wa me lolowia apena, wa na me ilogoro nor o siopa me ge mateia. 21Naŋ ti vet munau wa, Vanreag, ape na te vatraŋ rasu ko at sur o sul ŋaŋ we sea.

22Wa neira qale tiŋqoroa gai niŋa o vavae iloke, pa qara awoawo eleele, we vava wa, Ge reag i gene we tamaike nan o marama, ape gate wia ni qale esu. 23Wa neira we awoawo, wa we savsavrag nor o siopa, wa we savur kalo o wuwue tano ivunana, 24wa i liwoa goro tar me vatraŋ si a lav kaloa ilo ima vatgao; ti vava si a sike waririag amaia mun o towtowosia, si ni gilala mona o manigiu o sava neira me awoawo ape neia tamaine. 25Wa neira me vil togtogoa veta ineia mun o vin kau, pa i Paul we vet mun i liwoa goro melnol we tira peteŋia wa, We tira qa ape lea, si kamiu a towos o tanun ta Rom, wa gate veveg qaloa? 26Wa i liwoa goro melnol me roŋotag o ike, ti mule sur i liwoa goro tar, ti gaganag munia, ti vet wa, Ko we ge o sava? Ape i gene iloke we ta Rom. 27Wa i liwoa goro tar me mule ma suria, ti vet wa, Ka gaganag mun nau, Alova, iniko o ta Rom? Naŋ neia wa, We nun. 28Naŋ i liwoa goro tar me valui goroa wa, Na me tuvag o tano tagvanua iloke mun o som we qoqo. Naŋ i Paul wa, Pa na me wota tamaine. 29Pa ragai si a ge ineia me vareag gaplot nania; wa i liwoa goro tar mulaŋ me gogolo alo we gilala si ineia we ta Rom, wa ape ni me rotia ti.

30Wa tavala maran ni we maros we gilala o liŋe nun ape gene ŋaŋ ra Israel we tila ineia apena, ti ulia, ti vet si ira oloolo liwoa wa o vavtig veveg nol a vug tuwale, wa ni me tak i Paul siwo, ti vatira ineia goro nanagora.

Currently Selected:

O Gagagapalag 22: MOTA

Highlight

Copy