O Gagagapalag 21

1Naŋ me ge si kamam me tavareag nan neira, me tavaraka qara gamo taniniga i Kos; wa tavala maran i Rodos; wa nan aia i Patara. 2Wa me ilo qalo o aka te gamo levegao i Phenikia, kamam we vega kalo, qara tavaraka. 3Wa o Kupros me wot mun kamam, me gamo vitag alo galao, me niŋa a Suria; wa me olo kalo a Tur, ape o aka te savrag nareŋena aia. 4Wa me ilo qalo ira tiŋqoro, ikamam me toga galtag aia o qoŋ lavearua; wa neira iloke me vet mun i Paul mun o Vui, si nipea mule kalo i Jerusalem. 5Wa ikamam me toga wes o qoŋ ŋaŋ iloke, ikamam qara rowo lue at, me gisraka; wa neira nol, wa ira rasrasoara, wa ira nanatura, me vantak lue kamam nan o vanua, wa ikamam me vatieqau a lau, we tataro, 6wa we varvava vatulag; wa ikamam me vega vawo aka; pa neira me vusiag kel ilo imara.

7Wa ikamam me gamo paspasoanai ma nan o Tur qara sasawa i Ptolemais; wa me varpis amaira o retatasiu aia, ikamam me toga amaira o qoŋ tuwale. 8Wa a tavala maran me rowolue, wa me niŋa a Kaisareia, wa me kalo ilele iman Philip i gagapalag ape lea we wia, ineia tuwale nan ragai Pul lavearua ilone, wa me toga amaia. 9Wa i gene iloke, ranatuna o retavine pul vat apena, o qilowar gegese, wa neira we gagapalag o liŋe prophet. 10Wa alo kamam we togatoga aia o qoŋ we qoqo, o tuara prophet me taqel siwo ma nan o Judea, nasasana i Agabus; 11ti mule sur kamam, ti la narotigin Paul, ti rot kel napanena wa naraŋona nia, wa ti vet wa, O Vui we Roŋo we vava tamaike si, Ra ta Judea te rot tamaike a Jerusalem o tanun narotigina iloke, wa te suegia ilo panera sul ŋaŋ we sea. 12Wa ikamam me roŋotag o ike ŋaŋ, ikamam wa iragai talo vatine me tiasia sin pea mulemule kalo i Jerusalem. 13Naŋ i Paul ti valui goro wa, O sava kamiu we ge, we taŋtaŋ, we ge manoanoa natoqak? Ape inau me taurmate veta, si neira tete rot vires nau, pa si nau te mate ran a Jerusalem ape sasan Lord Jesus. 14Pa gate gil laia, kamam me naenae, we vet wa, O maros non Lord ni lai.

15Wa o qoŋ ŋaŋ iloke me paso, kamam me soso mantag o savasava, qara mule sage i Jerusalem. 16Wa o tuan tiŋqoro a Kaisareia me mule tuwale amen kamam, we vantak tuwale o tuara tiŋqoro tamoa, i Mnason ta Kupros, si kamam a togatoga tawu amaia.

17Wa me niŋa a Jerusalem, o retatasiu me lav malakalaka ikamam. 18Wa a tavala maran kamam i Paul me kalo pata sur James, wa ira tamtamatua nol we vug aia. 19Wa me varpis paso amaira, ni qara gaganag tuwatuwale o savasava God me ge ti alo sul ŋaŋ we sea mun mon o gagapalag. 20Wa neira me roŋotag, qara log ronoga God, wa me vet munia wa, Gai tasimam, ko we ilo moma si amaira ta Judea tartar me nomtup veta, wa neira we lolotutun gegese ape lea. 21Pa irasei me vava mun neira apeniko, si ko we vatvatogo ira Israel nol alo sul ŋaŋ we sea, si neira a toa asau nan i Moses; si ko we vet si neira nipea teveteve vaglala ira natura, wa nipea vanvan tataga o liŋai ŋaŋ. 22Pa o sava gai? neira te roŋotag ran si ko me niŋa veta ma. 23Pa ka ge o ike kamam we vava muniko apena; Iragai pulvat iake amen kamam, neira me ligog mora ti; 24pa ka lav tuanima ineira, tur ge wenewene tuwale kamiu; wa ka la o som ape neira, si neira a sir naqatura; wa iragai nol te ilo vaglala mora si o savasava ŋaŋ irasei me vava apeniko we ava; panava si ka qale mulemule moma mun ko we kokor o lea. 25Pa kamam me rave veta apen ragai talo sul ŋaŋ we sea we nomtup, wa me veveg si neira ora goro kelura nan o sava me oloolo ti nia mun o totogale, wa nan o nara, wa nan o gene me gisir mate ti, wa nan o pakapaka. 26Wa a tavala maran i Paul me lav iragai ilone, wa qara ge wenewene tuwalera, me mule pata ilo vatine we roŋo, we gaganag si o qoŋ ge wenewene me wesu, gai oloolo paso apensei apensei.

27Wa o qoŋ laveruai me susurut ma, ira nanat Israel we ta Asia me iloa alo vatine we roŋo, me ge matikotiko o sul, qara takulua, 28we awoawo eleele wa, Ragai, ra Israel, piriŋ ma! Ineia iloke we vatogo o tanun ŋaŋ valvanua, we vava goro o sul, wa o lea, wa o vatike; wa mulaŋ ni me vantak ma o tuaniu ta Grekia ilo tinesara we roŋo, wa me ge savsavawora o vatike we roŋo. 29Ape neira me ilo veta i Trophimus o ta Ephesus amaia alo laqlaqe vanua, wa neira me nonom mora si i Paul me vantakia ma ilo vatine we roŋo. 30Wa o laqlaqe vanua nol me matikotiko, wa o sul me rowo sargag tuwale, wa neira me takul i Paul, wa me rave luea nan o tinesara we roŋo; wa me tipag gaplot o matetipatipag ŋaŋ. 31Wa alo neira we gege si a ge mateia, o roroi me gao sage mun i liwoa goro tar, si o Jerusalem we toga popolotag nol. 32Wa ni me lav mona gaplot o soldier ŋaŋ tara liwoa goro melnol, ti valago saratuwale ivunara; wa neira me ilo i liwoa goro tar tara o soldier ŋaŋ, qara mot we vusvus i Paul. 33Wa i liwoa goro tar me niŋa, wa me tauria, ti vet si a rotia mun o taltalai ta rua, ni qara varus raka si ineia isei, si o sava ni me ge. 34Wa irasei me awoawo gasei, irasei me awoawo gasei amaira sul; wa ni gate gilala lai o liŋe nun ape wulawulano, ti vet si a vantakia ilo ima vatgao. 35Wa ineia avune tano varavara kalo veta, me ge tamaike si ira soldier ŋaŋ me sasa ineia, ape sul me rowo lalaktera suria. 36Ape o vavtig sul me tataga, we awoawo wa, Ge reagia.

37Wa me rivtag si a vantak i Paul ilo ima vatgao, ti vet mun o liwoa goro tar wa, Si na vava o sava muniko, we wia? Naŋ neia wa, Ko we gato ta Grik? 38Pa ko gate o ta Misraim lova ilone me ge lakosa alo qoŋ ŋaŋ we tuai, wa me vanogag lue ilo masao mot o tanun mun o gasal tar vagavat? 39Naŋ i Paul wa, Inau qa tamaira Israel, o ta Tarsus ta Kilikia, o tagvanua, wa gate vanua rig, wa inau we vatapariko, ukeg ma mun nau si na vava mun o sul. 40Wa me ukegia, i Paul qara tira vawo tano varavara kalo, ti wosawosa goro o sul mun napanena; wa neira me naenae roroŋo aneane, ni qara vet mun neira mun o vavae ta Hebrew wa.

Currently Selected:

O Gagagapalag 21: MOTA

Highlight

Copy