O Gagagapalag 20

1Wa o rorovia me sotoga, i Paul me suware ma ira tiŋqoro, we vasosovira wa we vava vatulag mun neira, ti rowolue sin van i Makedonia. 2Wa ni me mule sir vanua ilone, wa me vasosovira mun o vavae we qoqo, ti mule niŋa a Grekia. 3Ti toga aia o vula nitol; wa alo we taka o gamova i Suria, ira ta Judea me soravia, pa ni me nom mot sin kel lue a Makedonia. 4Wa iragai iloke me takoa gai niŋa a Asia, i Sopater ta Berea natun Pirus; wa i Aristarkus tana i Sekundus, ta Thesalonika; wa i Gaius ta Derbe; wa i Timotheus; wa i Tukikus tana i Trophimus, ta Asia. 5Iragai ŋaŋ iloke me mule amoa, we toga nerei kamam a Troas. 6Wa o qoŋ bread vatuga me paso, kamam me gamo nan o Philipi, wa me niŋa ineira a Troas alo qoŋ tavelimai, wa me toga aia o qoŋ lavearua.

7Wa alo qoŋ tuwale talo wik ikamam me vug tuwale si a tuqe o bread; wa i Paul me vavava mun neira, we sora sin gisraka amaran; wa ni me vavava paparau me niŋa o tine qoŋ. 8Wa o pul we qoqo alo tawtawu ima ikamam me vug aia. 9Wa o tuara lumagav nasasana i Eutukus me pute alo matetironin, o matiriva we mava me ge aneanea; wa i Paul we vavava maul, wa ni we maturu tapesopeso ti masu siwo nan o tawtawu ima vatoliu, we me lav kaloa me mate veta. 10Wa i Paul me taqel siwo, ti rowo taqa ivunana, ti garovagia, ti vet wa, Turpea matmatiko, ape naesuna qale toga alolona. 11Wa ni me vara kalo kel, ti tuqe o bread ilone, ti gana mona, ti vava vagamaul niŋa o mera me lamasag, qara vanreag tamaine. 12Naŋ neira me tak ma o lumagav we esu, wa natoqara qara masur mantag kel apena.

13Wa ikamam me mule moai vawo aka, me gamo kalo i Asos, o manigiu si te lav Paul aia; ape ni me vatavata tamaine, wa ni we maros we mule mun naraŋona. 14Wa ni me varniŋa ikamam a Asos, ikamam me lavia we mule Mitulene. 15Wa ikamam me ukeg aia, wa tavala maran me niŋa taniniga o Kios, wa tavala maran mulaŋ ikamam me vatieg a Samos, wa me toga galtag a Trogulium, wa a tavala maran mulaŋ kamam me niŋa a Miletus. 16Apen i Paul me nom mot veta sin te tira taso nan o Ephesus, nan wa toga maul a Asia; wa ni me ge titkeliga, si qe lai, ni toga a Jerusalem alo qoŋ Pentekost.

17Wa ni me vatraŋ irasei nan o Miletus i Ephesus, me suware ma suria ira tamatua ŋaŋ talo loglue. 18Wa neira me niŋa neia ma, ti vet mun neira wa, Kamiu we gilala momiu si alo qoŋ ilone na me vara kalo taqai a Asia ma, na me togatoga we savai valqoŋ amen kamiu; 19na me mawmawui alo liŋe nompepewu nol mun i Lord, wa mun o surmata, wa alo meregale ŋaŋ me qalo inau alo ra ta Judea me sorav nau; 20si na gate luqe goro nan kamiu o sava tea te piriŋ kamiu nia, pa nau me gaganag lue, wa me vatogo kamiu alo sul, wa val imamiu, 21we gaganag weswes mun ra ta Judea, wa mun ra ta Grekia, ape o nomleas ilone sur God, wa o nomtup apen i Lord inina i Jesus Christ. 22Wa ilokenake, ilo, na we mule i Jerusalem, amon o Vui me rot inau, wa na gate gilala o sava ŋaŋ te ge inau aia. 23Nava si o Vui we Roŋo we ligog ape nau val laqlaqe vanua, we vet wa si o garotrot wa o ganawono ŋaŋ we nerei inau. 24Pa na gate nom mava ran tea naesuk, wa na gate nonom si o gene tun, pa si na ge paso vunvun malakalaka nok o tano valvalago wa o gagapalag i Jesus Christ me la ma munau, si na gaganag weswes o lea we wia ape sogov mon God. 25Wa ilokenake, ilo ma, nau we gilala si kamiu nol, na me toretore goro kelkel ma o marana non God amen kamiu, tete ilo qalo mulaŋ nanagok. 26O manigiu iloke na we gaganag we tira mun kamiu qarig, si na we wenewene nan nanarara tanun ŋaŋ. 27Ape na gate luqe goro nan wa gaganag lue qet mun kamiu o liŋai nol God me nom vasarig ti apena. 28O manigiu iloke, tur ilogoro kel kamiu, wa o vavtig sheep nol, o Vui we Roŋo me map kamiu ira ilogoro apena, si a vaŋan o loglue non God, ni me tun mona ti mun naturnarana. 29Wa nau we gilala iloke, wa si nau me rowo vitag veta kamiu, o qoe kurkur we mava te kalo pata amen kamiu, wa tete mot we anumag o vavtig sheep. 30Wa o tuan tanun amen kamiu te tavaraka, wa te vava valvalil, si a rave sur ira tiŋqoro ape kulara. 31O manigiu iloke tur mamata goro, wa tur lolomaran kel si na gate mapsag nan we vatvatanau val kamiu mun o surmata o tau nitol veta, o qoŋ wa o maran. 32Wa ilokenake, ratasik, na we sueg kamiu mun God wa mun o vavae ni me sogov ti, we mana si a tape kalo lai kamiu, wa si a le at mun kamiu o vanua usurag amen ra sul nol me varoŋo neira. 33Nalolok gate toron pulansei o silver, si o gold, si o siopa. 34Pa ikamiu we gilala momiu, si napaneksa iloke me gagapalag matapurara o gene ŋaŋ tak ragai amen nau me maros ran. 35Alo savasava ŋaŋ nau me map lue o makaliu mun kamiu, si namomiu ran we mawmawui tamaine, wa we piriŋ ragai we mageregere; wa si a lolomaran kel ape vavae mon Lord Jesus si ni me vava mona was, We tur wia ras we le munsei nan we taur nansei.

36Wa me vava paso tamaike, ti vatieqau, we tataro tuwale amaira nol. 37Wa o ruruŋtap me gorogoro gorora nol, wa neira me rowotaqa ape nenen Paul, we nimnimia; 38mun o lolowono raka sage ape vavae ilone ni me vet mun neira wa si neira tete ilo qalo tea mulaŋ nanagona. Wa neira me vantakia ape aka.

Currently Selected:

O Gagagapalag 20: MOTA

Highlight

Copy