O Gagagapalag 19

1Naŋ me ge tamaike, i Apolos qale toga a Korinth, wa i Paul me mule valvanua i sage, ti niŋa a Ephesus, ti ilo suar o tuan tiŋqoro. 2Naŋ ti vet mun neira wa, Kamiu me la nomiu veta o Vui we Roŋo alo me nomtup? Naŋ neira wa, Kamam gate roŋotag ilo tiqa si o Vui we Roŋo apena. 3Naŋ neia wa, Pa me vasugroŋo kamiu ilo sava? Naŋ neira wa, Ilo vasugroŋo non John. 4Naŋ i Paul ti vet wa, I John me vasugroŋo mun o vasugroŋo nomleas, mun o vavava mun o sul si neira a nomtup i gene we mule ma ape kulana, i Jesus Christ nane. 5Wa neira me roŋotag, qara vasugroŋo neira ilo sasan i Lord Jesus. 6Wa i Paul me taŋovira, o Vui we Roŋo me siwo avunara, wa neira me gato seasea, wa me ligoligog. 7Wa iragai nol tama saŋavul tuwale o numei nirua.

8Naŋ ni me mule pata ilo ima siwo tuwale, ti wawaŋ aia o vula me tol, ti vava varsar ulul, wa ti vavava qalo ape gene ŋaŋ tape marana non God. 9Pa o tuan tanun me wasvat, wa me sirigavtag, wa me vava tatas o matesala ilone alo nago sul, ni qara asau nan neira, ti vile sea ira tiŋqoro, ti vava varsar ulul valqoŋ alo ima vatogo non Turanus. 10Wa me gege tamaike tam o tau nirua; wa neira nol we togatoga a Asia me roŋotag mora o vavae non Lord, ira Israel wa ira ta Grekia mulaŋ. 11Wa God me ge o vasasa lawalawa ŋaŋ mun napanen i Paul; 12ape me vile nan naturiana o maŋmaŋ lalais wa o siopa rotig mun rasei we gopa, wa o gopae ŋaŋ me tagea nan neira apena, wa o vui we tatas ŋaŋ me rowolue. 13Wa o tuanrasei ra Israel, vires raŋoal neira, ira manmanag, me na iloilo si a log nasasan i Lord Jesus avunan ragai o tamate leralera amaira, we vet wa, Na we manag kamiu mun i Jesus i Paul we maŋasagia. 14Wa ranatun i Skeva, o ta Judea i oloolo liwoa, pul lavearua me ge tamaine. 15Naŋ o tamate leralera ti valuira wa, Nau we gilala mok i Jesus, wa nau we lolomaran apen i Paul; pa ikamiu irasei? 16Wa o tanun ilone o tamate leralera amaia ti rowo ivunara, ti maremare nan neira wa ti mana gorora; wa ineira me totoa nan o ima ilone, naturiara mamasa, wa we manaranara. 17Wa ira Israel tara ta Grekia we togatoga a Ephesus me gilala mora ape ike; wa o gogolo me rowo ivunara nol; wa nasasan i Lord Jesus ti ronoga apena. 18Wa we qoqo mulaŋ amaira nomtup me mule ma we gaganag lue, wa we gaganag weswes nor o gagapalag ŋaŋ. 19Wa tuaniu nan ragai me manmanag gate tapai me vile tuwale nor o raverave ŋaŋ, wa we siŋ tagea alo nagor o tanun nol; wa me vasogo tuwale o som ape raverave ŋaŋ ilone, qara ilo apena si o som, o silver, tar vaga saŋavul tavelima. 20Tamaine gina o vavae non God me gao maremare, wa me lai.

21Wa me paso o ike ŋaŋ, i Paul me nommot mun o Vui sin mule raveaglue o Makedonia, wa o Akaia, qara mule i Jerusalem, ti vet wa, Nau te toga paso aia, namok ran mulaŋ si na ilo o Rom. 22Wa ni me vatraŋ at i Makedonia o tanun pulrua we tataga suria, nasasanrara i Timotheus wa i Erastus; pa ni me toga galtag a Asia.

23Naŋ alo masaoi ilone o matikotiko gate mantagai me sug raka ape Matesala ilone. 24Ape o tuara tanun nasasana i Demetrius, o mawu ape silver, wa we gege o natiima we roŋo ŋaŋ non Artemis o silver; wa me wane vagaqoqo munra mawmawuitag apena. 25Wa ni me vile tuwale ineira, wa iragai mulaŋ me gagapalag o gene ŋaŋ tamaine, ti vet wa, Ragai, kamiu we gilala si o gagapalag iloke nasalepulanina. 26Wa kamiu we ilo, wa we roŋotag momiu, si i Paul iloke me pes wa me vile ris o sul we qoqo, gate a Ephesus vires, pa arivtag tie si a Asia nol, ti vet wa si ilone me tano pane tanun gate God. 27Wa gate non nina o gagapalag vires iloke we rivtag we surtagtageag; panava te vasigtag mulaŋ o ima we roŋo non i Artemis o god liwoa, wa te savrag siwoa nan non o liwoa; pa o Asia nol wa o marama we momogoa. 28Wa neira me roŋotag o ike, wa me uravag o lologagara, we awoawo eleele wa, We liwoa gai i Artemis nora ta Ephesus! 29Wa o laqlaqe vanua me uravag o matikotiko; naŋ neira me valago nom sara tuwale ilo Theatron, me taur varaget i Gaius tana i Aristarkus ragera ta Makedonia, rara we toga tawu tuwale ti amen i Paul. 30Wa i Paul me maros sin mule ilo vatitne sul, pa ira tiŋqoro gate ukegia. 31Wa tuaniu mulaŋ nan ra liwoa goro Asia, we lolowia i Paul, me vatraŋ rasei suria, we tiasia sin pea ukeg kelua ilo Theatron. 32Wa rasei we awo gasei, wa rasei we awo gasei; ape o vavtig tanun me popolotag nol; wa we qoqo gate gilala o manigiu neira me vug tuwale apena. 33Wa ineira me gasuware i Aleksander nan o sul, wa ira Israel me vasuratia; wa i Aleksander ti taqtaqar gorora mun napanena, we maros we vava isvitag mun o sul. 34Pa neira me gilala mora si ineia o ta Judea, o liŋai tuwale me rowolue nan neira nol, tama o masao qoŋ nirua, we awoawo si, We liwoa gai i Artemis nora ta Ephesus! 35Wa i raverave alo vanua ilone me ge naenae o sul, ti vet wa, Ragai ta Ephesus, pa isei tea gate gilala si navanuara ta Ephesus we tataga wurvag ape ima we roŋo non i Artemis liwoa, wa o totogale me mas ma amen i Dis? 36Wa tete wales lai o ike ŋaŋ; o manigiu apena, tur naenae momiu wa nipea ge raka solsol o sava. 37Ape ikamiu me vile ma o tanun ŋaŋ iloke, pa rarua gate pal savsavawora alo tano roŋo, wa gate vava nawono ape god inina. 38Wa si o gene apensei amen Demetrius wa ira mawu amaia, me ligog veta o qoŋ veveveg; wa ira veveg apena; ineira var tilatila alo nagora. 39Panava si kamiu qe sike mulaŋ ape gene ŋaŋ we sea, te vava tavaul apena alo loglue ilone te vug tuwale tataga o lea. 40Ape nina we vagona gai si te tila nina ape sul me rowovatur anaqarig; ape nina me vug tuwale matikotiko, wa tagai qalo o manigiu te map goro nia. 41Wa me vava paso tamaike, ni qara ukeg o loglue.

Currently Selected:

O Gagagapalag 19: MOTA

Highlight

Copy