O Gagagapalag 18

1Naŋ me paso o ike ŋaŋ, i Paul me toavtag o Athens, ti mule niŋa a Korinth. 2Wa me ilo suar aia o tanun tamaira Israel, nasasana i Aqila, naqetegvanuana a Pontus, qara mule rigrig ma ti nan o Italia, tana Priskila rasoana; ape Klaudius me vet naliŋana, si ra Israel nol a toavitag o Rom. Wa ni me mule sur rara. 3Wa ape moratol o gagapalag i tuwale ni me toga amen rara, wa ratol me mawmawui; ape norara o gagapalag o gege ima sausau. 4Wa ni me ginginita alo ima siwo tuwale valqoŋ mapsag, ti meimei ra Israel tara ta Grekia neira nomtup.

5Wa i Silas tana Timotheus me taqel ma nan o Makedonia, nalolon Paul qara niniŋ goro ape vavae, ti gagaganag weswes mun ra Israel si i Jesus i Christ. 6Wa alo neira we vatriv goroa, wa we vava nawono, ti neneŋag non o siopa, ti vet mun neira wa, Nanaramiu avune qatumiu kel; nau we wenewene nan: nan ilokenake na te mule sur ra sul ŋaŋ we sea. 7Wa ni me mule leas nan aia, ti kalo pata lele iman o tuara tanun, nasasana i Justus, we momogo God; wa naimana we taqa peteŋ o ima siwo tuwale. 8Wa i Krispus o moai goro ima siwo tuwale me nomtup i Lord, tara talo imana nol; wa ra ta Korinth we qoqo me roŋotag, wa me nomnomtup, qara vasvasugroŋo neira. 9Naŋ i Lord me vet alo qoŋ mun i Paul mun o taqaŋiu wa, Nipea gogolo, pa vava; wa nipea toga roroŋo; 10ape nau amaiko; wa tagai qalo o tanun te takuliko si a ge manarasiko; ape sul anak we qoqo alo laqlaqe vanua iloke. 11Wa ni me toga aia o tau tuwale wa o vula laveatea, ti vatvatogo ape vavae non Lord alo vatitnara.

12Wa i Galio o governor ta Akaia; wa ira ta Judea me iraka sara tuwale ivunan Paul, wa me vanogagia ape tano veveg, 13we vet wa, I gene iloke we korkorave o tanun ŋaŋ, si a momogo God we sea nan o lea. 14Wa i Paul sin waka navalana, pa i Galio ti vet mun ra ta Judea wa, Si iloke qe tira ape gene ge variava, si ape we gale nurnurug, ragai ta Judea, we tira apena si na tiŋqoro taso kamiu. 15Pa si iloke o varleasag ape vavae vires, wa ape sasai ŋaŋ, wa ape lea tamen kamiu, tur ilo momiu apena; inau gate maros mok si na veveg ape gene ŋaŋ tamaike. 16Pa ti vure reagira nan o tano veveg. 17Wa neira nol me takul i Sosthenes o moai goro ima siwo tuwale, wa me towosia goro o tano veveg; pa i Galio gate nonom ilo tea ape ike ŋaŋ.

18Wa i Paul qale toga aia o qoŋ we qoqo; paso nan ni me vava vatulag mun o retatasiu, ni qara gamo i Suria, ratol i Priskila wa i Aqila; pa ni me palapala veta naqatuna a Kenkrea, ape ni me ligog ti. 19Wa me niŋa a Ephesus, ni qara rowovitag rara aia, pa ti mule pata ilo ima siwo tuwale, ti vavava varsar amera Israel. 20Wa neira me paere munia ni toga vagamaul amaira, pa ni gate mawui apena. 21Pa ni me vava vatulag muneira, ti vet wa, Na te kel tal ma sur kamiu, si God ta maros. 22Pa me tavaraka nan o Ephesus, ti siwo nan o aka a Kaisareia, ti kalo sage, ti wievavae o loglue, ti qara siwo kel i Antiokia. 23Wa me toga tuan qoŋ aia, ti vareag, ti mule tapare valvanua a Galatia, wa a Phrugia, ti varagai ira tiŋqoro nol.

24Wa o tuara tamaira Israel nasasana i Apolos, naqetegvanuana a Aleksandria, o liŋeul ineia, ti siwo i Ephesus; wa ni we mana mun o raverave ŋaŋ. 25Me vatogo lolomaran mantag veta i gene iloke ape matesalan Lord, wa ni me lolotutun alo atai, ti vavava wa ti vatvatogo mantag o gene ŋaŋ we tira apen i Jesus; pa ni me gilala vires o vasugroŋo non i John. 26Wa ni me wawaŋ raka alo ima siwo tuwale. Nava i Aqila tana i Priskila me roŋotagia, we lavia ma sur rara, qara gaganag lue mantag raka sage munia namatesalan God. 27Wa ni me maros we levegao i Akaia, o retatasiu me piriŋia, we rave mun ra tiŋqoro si neira a lav vasgotia; wa ni me niŋa, ni qara piriŋ lava irasei me nomtup veta mun o sogov. 28Ape ni me vava qalo maremare ira Israel alo nagora sul, ti vatira wono mun o raverave ŋaŋ apen i Jesus, si ineia iloke i Christ.

Currently Selected:

O Gagagapalag 18: MOTA

Highlight

Copy