O Gagagapalag 17

1Naŋ neira me sir vanua Amphipolis wa Apolonia, me niŋa a Thesalonika, wa o ima siwo tuwale nora Israel aia. 2Wa i Paul me mule pata surira, tama naliŋana nane, ti ginita ulul gorora alo raverave o qoŋ mapsag nitol, 3ti liklik, ti tuatuan o vavae si Christ te roŋovivtig ran, wa te tavaraka kel nan ra mate; wa si Jesus iloke, inau we gaganag luea mun kamiu, ineia i Christ. 4Wa o tuaniu nan neira me mawui apena, wa me pul amen i Paul tana i Silas, wa o sul we qoqo tamaira ta Grekia we momogo God, wa tamaira moe tavine ŋaŋ gate tapai. 5Pa ira Israel we loloanuanu apena, me lav mora tuan tanun kiskislag, o tanun nalnal wora, wa me vile vawlig o sul, me ge matikotiko o laqlaqe vanua, wa me iraka goro naiman Jason, we sike si a lav lue rarua sur o sul. 6Wa neira gate ilo irarua, pa me rave i Jason tara tuan retatasiu sur ra moai goro o vanua, we awoawo wa, Ragai me anumag risris o marama me mule ma iake; 7wa i Jason me lav vasgotira; pa ira gene ŋaŋ ilone nol we leasag o lea ŋaŋ non i Kaisar, we vava si o maranaga we sea, i Jesus. 8Wa neira me ge matikotiko o sul tara moai goro o vanua alo neira we roŋotag tamaike. 9Wa ineira me la mora o tigoro nan i Jason, wa nan ragai we sea, qara ukegira.

10Wa o retatasiu me vatoav reag gaplot i Paul tana i Silas alo qoŋ i Berea; wa irarua me niŋa aia, we mule pata ilo ima siwo tuwale nora Israel. 11Wa ragai iloke namatevura we wia nan ira ta Thesalonika; wa ineira me lav matakalava ran o vavae, wa me sike waririag valqoŋ alo raverave ŋaŋ, si iloke ŋaŋ we tamaine, si tagai. 12O manigiu ilone we qoqo nan neira me nomtup, wa o retavine motar mulaŋ ta Grekia, wa o rereata, gate tapai. 13Pa ira Israel a Thesalonika me roŋotag si i Paul me gaganag mulaŋ o vavae non God a Berea, neira we mule ma aia, wa we anoanor o sul. 14Naŋ alo ine o retatasiu me vatoav gaplot i Paul, ni van i lau; pa i Silas tana i Timotheus qale toga aia. 15Wa ragai me vantak i Paul, me lavia siwo i Athens; wa me la paso naliŋana mun i Silas tana i Timotheus, si irarua a mule matakalava ran ma suria, neira qara vusiag kel.

16Naŋ i Paul we toga nerei irarua a Athens, nalolona me sausau ape ni me ilo o laqlaqe vanua we uravag o totogale vui ŋaŋ. 17O manigiu iloke, ni me ginita alo ima siwo tuwale amaira Israel tara momogo, wa valvalqoŋ alo sare wolwol mun ragai we vatatua aia. 18Pa tuan vatogo mulaŋ nan ra Epikurus wa nan ra Stoe me varniŋa ineia. Naŋ tuaniu wa, O sava i gapagapa iloke we maros we vava? Naŋ tuaniu wa, Ni we maros wun we gaganag o vui we sea ŋaŋ; ape ni me gaganag mun neira o lea we wia apen i Jesus, wa o tavaraka kel. 19Wa neira me takulia, qara vantakia vawo tauwen Ares, we vet wa, Kamam te roŋotag lai o liŋai we garaqa iloke ko we vavava apena? 20Ape ko we vanogag ma ilo qoromam tama o gene ŋaŋ we sea; wa kamam we maros we gilala apena, si o gene ilone we savai. 21Wa ra ta Athens, wa ira tawu ŋaŋ we toga galean aia, me ur qoŋ gese ape ike tuwale, si a gaganag, wa si a roŋotag ape gene tea we garaqa.

22Naŋ i Paul me tira alo vatitne tinesaran Ares, ti vet wa, Ragai, ra ta Athens, nau we ilo mok alo savasava ŋaŋ si kamiu we mano momogo aneane o vui ŋaŋ. 23Wa nau me mule niŋniŋ, na we iloilo mok nomiu o gene momogo ŋaŋ, wa na me ilo suar mulaŋ o tano oloolo me rave apena tamaike wa, Mun o god iloke nina gate gilala apena. Pa nau we gaganag lue mun kamiu o gene iloke kamiu we momogo wa gate gilala apena. 24God, namona me tiŋ o marama wa o ronronotar alolona, ineia we Lord goro o vunana wa o lalaŋana, gate toga alo ima ŋaŋ o tanopane tanun; 25wa isei gate tataga suria mun o pane tanun; tama si ni qe maros ran o sava; ape ni we le mona mun o tanun ŋaŋ o esu wa o mapsagiu wa o gene ŋaŋ. 26Wa ni me tiŋ mun o nara tuwale o val veve tanun si a togatoga alo nago marama nol; wa ni me ilo raka tuai o masaoi ni me vonog ti, wa o tiŋgoro vanua neira te toga alolona. 27Si neira a sikesike God, si neira a tatataŋo matapulea wun ape neia, wa a sike qaloa; pa ni gate toga asau nansei nansei tamenina. 28Ape nina we esuesu alo ineia, wa we alial kelkel, wa we togatoga: tama tuan towtowo as tamen kamiu me vava veta wa, Inina mulaŋ ira gene wota ma amaia. 29Wa gate wia si nina ira gene wota ma amen God a nonom ape matevun God si we tam o gold, wa o silver, wa o vat o tanun te tit matanur, tataga o tarapei me nom suar ti apena. 30Naŋ God sin tete ilo o masao loloqoŋ ilone ŋaŋ; nava ilokenake ni we vareg mun o tanun ŋaŋ valvanua ŋaŋ neira a nomleas. 31Ape ni me map o qoŋ ni te veveg taniniga o marama alolona mun o tanun ilone ni me vonoa; pa me tuan mun o tanun sul o vaglala neira nomtup lai apena, me ge raka kelua gina nan ra mate.

32Wa neira we roŋotag ape tavaraka nora mate, tuaniu me aresag apena; pa o tuaniu wa, Kamam te roŋotagiko mulaŋ aŋaisa ape ike. 33Pa alo we tamaine, i Paul me serelue nan o vatitnara. 34Nava o tuan tanun qale goara amaia, wa we nomtup; wa i Dionusius o talo tauwen Ares amaira, wa o vavine nasasana i Damaris, wa tuan rasei mulaŋ amaira.

Currently Selected:

O Gagagapalag 17: MOTA

Highlight

Copy