O Gagagapalag 16

1Naŋ ni me mule niŋa mulaŋ a Derbe wa a Lustra; wa ilo, i tuara tiŋqoro aia, nasasana i Timotheus, natun o vavine tamaira Israel we nomtup, pa i tamana we ta Grekia. 2Wa o retatasiu ta Lustra wa ta Ikonium me gaganag weswes ape neia. 3Wa i Paul me maros sin mule lue tuwale amaia; wa ni me lavia, ti teve vaglala ineia, manigiu ra Israel we togatoga alo vanua ŋaŋ ilone; ape neira nol me gilala mora si i tamana we ta Grekia. 4Wa alo irarua me mulemule val laqlaqe vanua, we le mun neira o lea si a matagisgis goro, ira sala wa ira tamatua me veveg ti a Jerusalem apena. 5Wa me varagai tamaine o loglue ŋaŋ alo nomtup, wa we valulug valqoŋ ineira.

6Wa rarua me mule tapare valvanua a Phrugia wa a Galatia; pa o Vui we Roŋo me gatogoro rarua nan wa gaganag o vavae a Asia; 7rarua me niŋa we sar taniniga ape Musia, irara qara ge iloilo si a mule i Bithunia; pa o Vui non Jesus gate ukeg rarua. 8Wa rarua me mule sispara nan o Musia, irarua qara taqel siwo i Troas. 9Wa me suar mun i Paul alo qoŋ; O taqaŋiu o tanun ta Makedonia we tira, we paere munia, ti vet wa, Ka levegao ma i Makedonia, ka piriŋ kamam. 10Wa ni me ilo o taqaŋiu, wa ikamam me ge iloilo gaplot si a siwo lue i Makedonia, we nonom si i Lord me suware kamam si a gaganag o lea we wia mun neira.

11O manigiu o ine me tavaraka nan Troas, ikamam me gamo taniniga i Samothrake, wa a tavala maran i Neapolis. 12Paso nan i Philipi, o laqlaqe vanua ta Makedonia o moai ta tavala vanua ilone, o Kolonia. Wa ikamam me toga o tuan qoŋ alo laqlaqe vanua ilone. 13Wa alo qoŋ mapsag kamam me rowolue tavala mategeara a pan peilava, we nonom si o vatine we tatataro aia: wa me pute siwo, qara vavava mun o retavine me vugvug ti aia. 14Wa o tuara tavine, nasasana i Ludia, o tavine wolwol siopa sorsoroga, we talo laqlaqe vanua Thuatira, we momogo God, me tiŋqoro ikamam; wa i Lord me waka nalolona, sin tiŋqoro mantag o vavae ŋaŋ i Paul me vava. 15Wa me vasugroŋo paso ineia, wa irasei ŋaŋ talo imana, ni me tias kamam, ti vet wa, Si kam qe nonom si nau we nomtup i Lord, tur van ma ilo imak, tur toga aia. Wa ni me takul kamam.

16Wa me ge tamaike, kamam we mule ilo tano tataro, o tuara malamala me varniŋa kamam, o tamate so ilo amaia; wa ni me ligoligog, wa me wane ma we qoqo munra tagina apena. 17Wa iro gene iloke me mule ape kulamam ira Paul, ti awoawo eleele, ti vet wa, Iragai iloke o rowrowovag anan God i Eleele, we gaganag mun kamiu o matesale esu. 18Wa ni me ge tamaike o qoŋ we qoqo. Nava i Paul me lolowono apena, ti taleag ris, ti vet mun o tamate wa, Nau we vatraŋiko alo sasan Jesus Christ, ka rowolue nania. Wa ni me rowolue nania alo masao qoŋ ran ilone.

19Pa ira tag malamala ilone me ilo mora si nasalepulara me tagea nan neira, neira we taur i Paul tana i Silas, qara rave irarua ilo sare wolwol ape nagora liwoa goro. 20Wa neira me vantak rarua sur ra veveg, we vet wa, Iragera iloke, o ta Judea, we ge nalia aneane nalaqlaqevanuanina; 21wa we gaganag mun nina o liŋai ŋaŋ gate tira ape lea si nina a taur, wa a ge tataga; ape nina we ta Rom. 22Wa o sul nol me iraka saratuwale apen rarua, wa ira veveg me sare savrag norara siopa nanrara, wa me vet si a towos rarua. 23Wa me towos vaga qoqo irarua, qara tuqerag rarua ilo ima rotrot; wa me vet maremare mun i ilogoro, ni taur netenete rarua. 24Wa ni me roŋotag o vavae vatraŋ tamaine, wa ni qara tuqerag irarua ilo nin ape pupuima, wa me sarovag naraŋonrara alo vat tangae. 25Wa tama alo tine qoŋ i Paul tana i Silas we tatataro, wa we sursur o as mun God; wa iragai mulaŋ we rot we roŋroŋotag irara. 26Wa o rir liwoa me rir gaplot, o sagere ima rotrot we magologolo apena; wa o mateima ŋaŋ me waka gaplot, wa o garotrot me tatavaul nan neira nol. 27Wa i ilogoro me mamata raka, ti ilo o mateima rotrot ŋaŋ we tawala, ti naŋalue non o gasal sin ge mate kelua; we nonom si ragai we rot me totoa lue veta. 28Pa i Paul me awoawo eleele, ti vet wa, Nipea ge tatas iloko, ape kamam nol qale toga iake. 29Wa ni me paere o pul, ti rowo pata, ti mule gologolo ma, ti suragia mun i Paul tana i Silas; 30wa me vantak irarua ivarea, ti vet wa, Ragera, na ge ran o sava, si na esu apena? 31Naŋ irarua wa, Ka nomtup i Lord Jesus, wa te vaesuko nia, tamiu ragai talo imama. 32Wa irarua me gaganag munia o vavae non i Lord, wa mun neira nol talo imana. 33Wa ni me lav rara alo masao qoŋ ran ilone, ti vasug o tano qatkere; wa me vasugroŋo gaplot neia, wa ira anana nol amaia. 34Wa ni me vantak kalo rara ilo imana, ti vasvasager o sinaga mun rara, ti malakalaka aneane, tara ragai nol talo imana, me nomtup veta God.

35Wa me maran, ira veveg me vatraŋ ira gagapalag anan rara, we vava wa, Ka mamasug iragera ilone. 36Wa i ilogoro ima rotrot me gaganag o vavae iloke mun i Paul, ti vet wa, Ira veveg me vatraŋ irasei si a ukeg kamurua. Sowo, ilokenake ura va lue, ura mule tamata at. 37Nava i Paul me vet muneira wa, Ineira me towos gap ikara alo nagor o tanun ŋaŋ, pa gate veveg tiqa; wa ikamam o tanun ta Rom; wa me tuqerag kara ilo ima rotrot; wa ilokenake neira we vurelue kel kara alo pupuel? Tagai wa, pa neira mule mora ma, a vantak lue kara. 38Wa ira gagapalag me gaganag kel o vavae ilone mun ra veveg; wa rarua me gogolo, ape rara we roŋotag si rarua we ta Rom. 39Wa rara me mule ma we pes irarua, wa me vantak lue irarua, we paere si rarua a rowolue nan o laqlaqe vanua. 40Wa me rowolue nan o ima rotrot, irarua qara mule pata ilo iman Ludia; wa me ilo o retatasiu, we vava varagaira, qara vareag.

Currently Selected:

O Gagagapalag 16: MOTA

Highlight

Copy