O Gagagapalag 15

1Naŋ o tuan tanun me siwo ma nan o Judea, wa we vatogo o retatasiu wa, Si ta tete teve vaglala kamiu, tama naliŋan Moses, kamiu tete esu lai. 2Pa i Paul tana i Barnabas me leasag we poa, wa me vagalateg neira, wa neira qara vasarig suar i Paul tana i Barnabas, wa tuan rasei mulaŋ nan neira, si a mule i Jerusalem sur ra sala tara tamtamatua ape varleasag ilone. 3Wa o loglue me takira at tamaine; wa neira me mule raveaglue Phenikia wa Samaria, wa we gaganag si o sul ŋaŋ we sea me vusiag kel ma; wa me qeteg raka o malakalaka liwoa munra tatasiu apena. 4Wa neira me niŋa a Jerusalem, o loglue wa ira sala wa ira tamtamatua ŋaŋ me lav vasgotira; wa neira me gaganag tasovule o savasava ŋaŋ God me ge ti mun neira. 5Nava o tuaniu nan neira we tataga o liŋe Pharise, pa we nomtup, me tavaraka we vava wa, Tete ava lai pa si a teve vaglala neira, wa a vatraŋ neira, si neira a matagisgis goro o lea mon Moses.

6Naŋ ra sala tara tamatua ŋaŋ me vug tuwale, si a ilo vaglala ape vavae iloke. 7Wa me varsikesike vagaqoqo paso, i Peter qara tavaraka, ti vet mun neira wa, Ragai, ratatasik, kamiu we gilala momiu si God me iloraka we tuai amen kamiu, si o sul ŋaŋ we sea a roŋotag o lea we wia mun navalak, a nomtup apena. 8Wa God, i gilgilala ape toqai, me gaganag we tira ape neira, me vasoal mun neira o Vui we Roŋo, tama mun nina. 9Wa ni gate ge sea inina nan neira, pa me ge matartoga natoqara mun o nomtup. 10Wa ilokenake, ape sava kamiu we meregale God, si a map o qatiiwa avune nenera tiŋqoro, wa inina wa ira tamanina gate iwa lai? 11Pa inina we nomtup si te vaesu nina mun o sogov non Lord Jesus, tama ineira mulaŋ. 12Wa o sul nol me toga roroŋo, wa me tiŋqoro i Barnabas tana i Paul we gaganag tasovule o vaglala wa o vasasa ŋaŋ, God me ge ti amaira sul ŋaŋ we sea mun rara.

13Wa irarua me vava mot paso, i James me valui gorora, ti vet wa, Gai ratasik, tur tiŋqoro nau. 14I Simeon me gaganag si God me vaatev amoa o sul ŋaŋ we sea si a la kalo nan neira o sul mun nasasana. 15Wa o vavae nora prophet ŋaŋ we tira i tuwale apena, tama me rave ti,

16O ike ŋaŋ me paso, na te kel ma,

Wa te taur kel naiman David me masu ti;

Wa na te taur kel o oroima,

Wa na te tape raka kel:

17Si o tanun ŋaŋ qale toga a sike i Lord,

Wa o val sul ŋaŋ we sea, me log nasasak avunara,

18Amon i Lord we vava, we tiŋ o gene ŋaŋ iloke si a lolomaran apena, alo qeteg marama ran ma.

19O manigiu iloke, na we veveg lue mok, sin pea anumag irasei amaira sul ŋaŋ we sea me vusiag kel veta ma sur God. 20Pa nina a rave mun neira, si neira ora goro kelura nan o gene ŋaŋ tape totogale ŋaŋ we ge pulua, wa nan o pakapaka, wa nan o sava me gisir mate ti, wa nan o nara. 21Ape amen Moses alo taraŋiu ŋaŋ we tuai ma irasei we toretore ape neia valvanua ŋaŋ, we vasogo mon o raverave ŋaŋ val qoŋ mapsag alo ima siwo tuwale ŋaŋ.

22Paso nan ira sala, wa ira tamatua ŋaŋ, wa o loglue nol me nonom tuwale, si a vatraŋ ira tuan ilo raka nan neira i Antiokia, a tako i Paul tana Barnabas; nasasan rara i Juda, we logia si i Barsabas, wa i Silas, irara we liwoa amaira tatatasiu. 23Wa me raverave tamaike alo panera wa, Ira sala, wa ira tamatua ŋaŋ, wa o retatasiu, we vava vawia mun o retatasiu nan o veve sul ŋaŋ we toga a Antiokia, wa a Suria, wa a Kilikia. 24Ape kamam me roŋotag veta si o tuan tanun me rowolue amen kamam, me anumag kamiu mun nor o vavae, wa we ge valilil naatamiu; pa kamam gate vatraŋ ilo neira apena. 25Wa ikamam me vug nom sara tuwale, qara nonom si we wia si a vatraŋ at sur kamiu o tuan tanun iloraka, neira a tako i Barnabas tana i Paul ira meratape; 26irarua me nonom mot nan naesunrara ape sasan Lord inina i Jesus Christ. 27Wa ikamam we vatraŋ at i Juda tana i Silas, wa irarua te gaganag mulaŋ tamaine mun navalanrara. 28Ape o Vui we Roŋo wa ikamam mulaŋ me nonom, si nipea map avunamiu o reŋe we mava nan o ike ŋaŋ tete gevtag lai, 29si a ora goro nan o sava me oloolo veta ti mun o totogale, wa nan o nara, wa nan o gene me gisir mate ti, wa nan o pakapaka; wa si kam qe matagisgis goro kel kamiu nan o ike ŋaŋ, te wia nan. Tur toga wia.

30Naŋ me ukegira, rara qara siwo niŋa o Antiokia, wa me vile tuwale o sul nol, qara la o raverave mun neira. 31Wa neira me vasogo paso, qara malakalaka ape vavae masur. 32Wa i Juda tana i Silas, irarua mulaŋ o prophet, wa me ge masur o retatasiu mun o vavae we qoqo, wa me varagai neira. 33Wa me toga galean aia, ira tasira we ukeg tamata irara at sur ragai me vatraŋ irara ma ti. 34Pa i Silas we maros si ni toga galtag aia. 35Nava i Paul tana i Barnabas me togatoga a Antiokia, wa irasei we qoqo mulaŋ, we vatvatogo, wa we gaganag o vavae non Lord.

36Naŋ o tuan qoŋ me paso, i Paul me vet mun i Barnabas wa, Nara vusiag kel ilokenake si a vaatev ira tasinina val laqlaqe vanua, nara me gaganag veta aia o vavae non Lord, si a ilo neira we savai. 37Wa i Barnabas me maros we lav tuan rara i John, we logia si Mark. 38Wa i Paul me nonom sin pea lav neia mun tuanirara, me toa vitag irarua ti a Pamphulia wa gate mule tuwale amen rara ape gagagapalag. 39Wa me vartike raka apena; wa irarua me vilewora irarua apena; wa i Barnabas me lav i Mark, me gamo i Kupros. 40Nava i Paul me iloraka i Silas, me rowolue, wa o retatasiu me ukeg irarua mun o sogov mon i Lord. 41Wa ni me mule raveaglue o Suria wa o Kilikia, ti varagai o loglue ŋaŋ.

Currently Selected:

O Gagagapalag 15: MOTA

Highlight

Copy