Génesis 23

Cham ti Sarae, laj yich' muquel

1Ti Sarae ch'i c'opoj vucub yucvinic (127) jabil. 2Cham ta Quiriat-arba ti ja' no'ox jteclum Hebrón oy ta Canaán banomile. Ti Abrahame ta xoq'uita ti jech cham ti Sarae. Mu x'ech' ta xa'i ti me'inale. 3Tuts'ul laj yicta comel ti anima Sarae. Xi bat yalbe ti hititaetic ti tey nacalique:

4—Ac'o mi jyanlumun li' oyun ta atojolique,#Heb 11.9,13. chonbeicun jutebuc mucobbail yo' xu' ta jmuc ti cajnile.#Hch 7.16.

5Ti hititaetique xi laj staq'uique:

6—A'yio ava'i, yojtot, ts'etano ani' achiquin, yu'un ta xquilcutic ta jba ta jsatcutique, t'ujbilot yu'un ti Diose. Jech o xal, avocoluc, muco ti avajnile ti bu t'ujom ti mucobbail cu'uncutique. Yu'un mu'yuc buch'u junucal cu'uncutic ta sjaltabot ti muquinale.

7Jech ti Abrahame va'i batel. Laj snijan sba ta stojol ti hititaetique. 8Xi laj yale:

—Mi melel lec xava'iic ta jmuc ti cajnil li'e, avocolicuc, c'anbeicun yosil ti Efrone, ti ja' xnich'on ti Zohare. 9Ac'o xischonbun ti jombil muquinal ta Macpelá oy ta sti'il avosilique. Ta jtoj c'u yepal ta sc'anbeic ti stojole yo' jech ta xc'ot ta cu'un ti muquinal taje.

10Ja'uc ti Efrón ti hititae, ti bu capal xchi'uc ti xchi'iltac taje, xi s'elan laj stac'be ti Abrahame yo' jech ta xa'i ti xchi'iltaque, xchi'uc ti buch'utic chlaj ech'icuc ta x'ochic batel ta jteclume:

11—Avocoluc, mu jechuc xaval, yojtot. Ta jq'uelanbot ti jbanomile, xchi'uc ti jombil muquinal oy ta cosile. Muco ti avajnil bu taje. Ja' rexticoetic ti jvinquileltac li'e ti jech xcale.

12Yan velta ti Abrahame laj snijan sba ta stojol ti jnaclejetic teye. 13Jech ti Abrahame xi laj stac'be ti Efrón ta sba ta sat scotol ti c'u yepal oyique:

—Avocoluc, a'yio ava'i ti jc'ope. Tsacbun stojol ti avosile, avocoluc. Ts'acal to un, ta jmuc ti cajnil bu taje.

14Va'i un, ti Efrone xi laj staq'ue:

15—A'yio ava'i ti xi ta xcalbote, yojtot: Ti banomile ma'uc no'ox chanib ciento (400) ta sep plata taq'uin ti stojole. Ja' yu'un un, ch'an xa chicutic xchi'uc ti va'i yepal taje, ba muco xch'a ti avajnile.

16Ti Abrahame laj stoj ti c'u yepal laj yal ti Efrón ta sba ta sat ti xchi'iltac ti ja' hititaetique. Sts'inlajet xa xpechequil plata taq'uin jelav. 17Ja' yu'un un, yosil ti Efrón ti oy ta Macpelá ta yeloval sloq'ueb c'ac'al yu'un ti Mamree, ti lec xcaltique, ti banomil bu oy ti jombil muquinale, xchi'uc scotol ti te'etic oy ta yut osile, 18jelav ta yoc sc'ob ti Abrahame. Ja' ic'ot ta sman osil. Ti jech taje, ja' rextico c'otic ti hititaetique, xchi'uc ti buch'utic ta x'ochic batel ta jteclume.

19Ts'acal to un, ti Abrahame bat smuc ti Sara ta jombil muquinal ta osil oy ta Macpelae, ti oy ta yeloval sloq'ueb c'ac'al yu'un ti Mamree, ti ojtiquinbil xtoc sbiinoj Hebrón ti oy ta Canaane. 20Ja' jech com ta yu'un ti osile, xchi'uc ti jombil muquinale, ti chonbat yu'un ti hititaetique yo' jech ta xtun ta mucobbail.

Currently Selected:

Génesis 23: TZC00

Highlight

Copy