Génesis 22
22
Ti Diose ta sq'uel c'u s'elan xch'unoj ti Abrahame
1Ech' c'u sjaliluc un, ti Diose lic sq'uelbe c'u s'elan yo'nton ti Abrahame. Jech ti Diose xi laj yalbee:
—Abraham.
—Li' oyune —xi laj staq'ue.
2Xi laj yal ti Diose:
—Ic'o talel ti Isaac ti c'ajomal yo jun ti avuni quereme, ti mu tuch'baj ta avo'ntone. Batan ta yosilal Moria. C'alal mi tey xa oyot une, loc'uc ayanuc ta avo'nton ti ta xavac' ta chiq'uel ta matanal ta jol vits ti bu ta xcac'bot avile.
3Ti Abrahame, sob xa ta yoc'omal, lic slapbe siya ti sburroe. Laj sboj batel si' sventa xchic'obil ti matanale. Bat xchi'uc ti Isaac ti ja' xnich'one xchi'uc chib smosov. Bat bu albil yu'un ti Diose. 4Ta yoxibal xa ox c'ac'al un, ti Abrahame laj sta ta ilel ta nom ti vitse. 5Xi laj yalbe ti smosovtaque:
—Comanic li' xchi'uc ti burroe. Yan ti vu'un xchi'uc ti jquereme ta to xijelavcutic batel le'e. Yu'un chba jtacutic ta c'oponel ti Diose. Ts'acal to un, ta xisutcutic talel.
6Jech ti Abrahame laj stam batel ti si' sventa ta xich' chiq'uel o ti matanele. Laj yac'be batel xcuch ti Isaaque. Ja' jech xtoc laj yich' batel xcuchilu xchi'uc c'oc'. Bat xchibalic. 7Lec xa ox muc' ta jal un, ti Isaaque xi laj sjac'be ti Abrahame:
—Tot
—¿C'usi ta xaval, Nich'on? —xi laj stac' ti Abrahame.
—A'yio ava'i —xi ti Isaaque—, quich'ojtic batel ti si'e xchi'uc ti c'oq'ue, ja' no'ox un, ¿bu oy ti chij ti ta xich' chiq'uel ta sventa ti matanale?
8—Dios ta sbain bu ta xtal jcotuc chij ti ta xich' chiq'uel ta sventa ti matanale, Nich'on —xi tac'bat yu'un ti stote.
Jmoj xanavic batel xchibalic. 9C'alal c'otic bu albilic yu'un ti Diose, jech ti Abrahame lic smeltsan jun altar. Laj yac'be si'il. Ts'acal to un, lic xchuc ti Isaac ti ja' xnich'one. Laj scajan ta ba si' oy ta altar.#Stg 2.21. 10Ja' no'ox un, ti c'alal naca xa mu ta syales ti sc'ob xchi'uc xcuchilu ta stojol ti xnich'one, 11ti yaj'ánjel Diose xi biiltasvan talel ta vinajele:
—¡Abraham! ¡Abraham!
—¿C'usi ta xaval? Li' oyune —xi itac'av ti Abrahame.
12Ti ánjele xi laj yale:
—Mu xayales ac'ob ta stojol ti quereme. Yu'un laj xa quil ti axi'taoj ti Diose. Yu'un mu'yuc laj ajalta ta yac'belun ti c'ajomal yo jun ti aquereme.
13Jech ti Abrahame laj stoy batel sat, ja' o laj yil jcot chij ts'otol xulub ta vach'il te'. Va'i un, bat yic' talel ti chije. Ja' laj yac' ta chic'bil matanal ti c'ot ta q'uexolil ta sventa ti squereme.#Heb 11.17-19. 14Ts'acal to un, ti Abrahame xi laj yac'be sbi ti bu taje: “Ti Diose ta xac' c'usi tsots sc'oplal ta xtun.” Ja' yu'un un, xi to sbi yu'unic avie: “Ti li' ta vitse, Dios ta xac' c'usi tsots sc'oplal ta xtun.”
15Ti yaj'ánjel Diose c'opoj talel ta xchibal xa velta ta stojol ti Abrahame. 16Xi laj yale:
—Ti Diose xi ta xale: “Ti jech laj apas ti mu'yuc xajaltabun ti c'ajomal yo jun ti aquereme, ta jva'an jba ta rextico jtuc. 17Ep ta jc'uxubinot. Ta xcac' bolicuc ti anitilultaque. Ta x'epajic jech c'u cha'al ta xavil ti c'analetic oy ta vinajele, jech c'u cha'al ti yi' oy ta sti'il nabe.#Heb 6.13-14; 11.12. Ja' jech xtoc ti stuquique ta ono'ox stsal yu'unic ti scontraique. 18Yu'un scotol ti muc'tiquil lumetic oy ta banomile, ta staic xc'uxubinelic ta sventa ti stuquique.#Hch 3.25; Gá 3.8. Yu'un ti vo'ote laj ach'un ti c'usi laj calbote.”
19Jech ti Abrahame sut batel ti bu comemic ti yajtuneltaque. Ts'acal to un, jmoj tsobol batic ta Beerseba. Tey jmoj c'ot naquiicuc xchi'uc ti Abrahame.
Xnich'nabtac ti Nacore
20Ech' xa ox c'u sjaliluc, ti Abrahame laj ya'ibe sc'oplal ti Nacor ti ja' xchi'il ta voq'uele, ti laj xa yil yan yol ti Milca yu'une. 21Ti jun ba'yel voq'ue, ja' Uz ti sbie. Ts'acal to un, voc' jun yits'in ti ja' Buz sbie. Voc' talel xtoc ti Kemuele, ti ja' stot ti Arame. 22Voc' talel xtoc ti Quésede, ti Hazoe, ti Pildase, ti Idlafe, ti Betuele. 23Ti Betuel taje, ja' stot ti Rebecae. Ti vaxacvo' alab nich'nabiletique, voq'uic ta stojol ti Milcae, xnich'nab ti Nacor ti ja' xchi'il ta voq'uel ti Abrahame.
24Ma'uc no'ox taje, ti Nacore laj to yil yalab xnich'nab xchi'uc ti sts'acal ajnil Reumá sbie, ti laj voc'uc talel yu'un ti Tebae, ti Gáhame, ti Tahase, ti Maacae.
Currently Selected:
Génesis 22: TZC00
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000