Génesis 24

Ti Abrahame ta sa'be yajnil ti Isaaque

1Mol xa ti Abrahame. Scotol ti c'usi laj spase, laj sta ti laj sva'an sba ti Dios ta stojole. 2Oy jun c'ac'al, xi laj yalbe jun yajtunel ti vulem xa xch'ulele, ti ja' sbainoj scotol c'usi x'ayan yu'une:

—Ac'o ac'ob li' ta yolon co'e.#Ti ta vo'nee, ja' jech stalelic ta spasic ti ta xnupvanic ti cristianoetique. Ta xac' batel sc'ob c'alal to yich'on ti buch'u snupique. 3Ta sba ta sat ti Cajvaltique, Dios yu'un ti vinajel banomile, alo ta jamal ti mu xavac'be yic' junuc tseb ti jnich'on Isaac li' ta yosilal Canaán ti bu nacalune. 4Alo ti ta xabat ta cosilal yo' ta xat'ujbe junuc yajnil ti ta xloc' talel ta stojolal junuc stsebtac ti cuts' calale.

5Xi laj stac' ti jtunele:

—Xcaltic no'ox, mi mu xch'un iq'uel talel cu'un ti tseb une, ¿c'usi ta xcut unbi? ¿Mi ja' sc'an ta xquic' batel ti anich'on ta banomil ti bu lalic talele?

6Ti Abrahame xi laj staq'ue:

—Mo'oj, mu xavic' batel ti jnich'on teye. 7Ti Ajvalil Dios yu'un ti vinajele, laj sloq'uesun talel ta sna ti jtote, ta yosilal ti cuts' calale. Laj yac' ye sti' ta xiyac'bun jventain xchi'uc jnitilultac ti banomil li'e. Ja' jech xtoc ta stacbot talel yaj'ánjel yo' xu' avu'un ta yiq'uel talel jun tseb ta sventa yajnil ti jnich'one. 8Mi mu sc'an xchi'inot talel ti tsebe, ma'uc xa ta xcom ta aba ti c'usi loc' ta ave ta xapase. Ja' no'ox un, jbel sc'oplal, mi ja'uc xavic' batel ti jnich'on teye.

9Va'i un, ti jtunele laj yac' sc'ob ta yolon yo' ti Abrahame, ti ja' yajvale. Jamal laj yal ti jech ta spas jech c'u cha'al albate. 10Ts'acal to un, lic st'uj matanal ti bu lequic oy yu'un ti yajvale. Lic xchapan lajuncot camello. Va'i un, bat ta jteclum Nacor ti oy ta Mesopotamia banomile. 11C'alal c'ot ti jtunel ta loq'ueltic yu'un ti jteclume, mal xa ti c'ac'ale. Ti jech ora taje, ja' o ta xbat slupic vo' ti antsetique. Jech ti jtunele laj xcux yu'un ti scamellotac ta nopol sti'il ti joq'ue. 12Xi laj yal ti lic c'opoj ti'inuque: “Cajval, Diosot yu'un ti cajval Abrahame, coltaun yo' lec ta xbat ti jech li' talemune. Ac'o ta ilel ti xc'uxul avo'nton ta stojol ti cajvale. 13Li' ta xicom ta sts'el sti'il ti joq'ue. Li' ta jmala ti ja' o yorail ta xtal slupic vo' ti tsebetic li'e. 14Ta xavac' ave, ti buch'u xi ta xcalbe ti tsebe: ‘Avocoluc, yaleso aq'uib, yu'un ta xcuch' ca'i vo'’ mi xcute, ‘Li' oye, uch'an’, mi xiyute, ja' jech xtoc, ‘ta xcac'be yuch' vo' ti acamellotaque’, mi xiyute, ja'uc me ti buch'u t'ujbil avu'une yo' ta xic' ti avajtunel Isaaque. Ja' to jech ta jna' ti laj avich' ta c'ux ti cajvale.”

15Mu to xlaj yo'nton ta sc'oponel c'alal ja' o laj yil scajanoj batel ta snequeb sq'uib jun tseb. Ti tseb taje, Rebeca sbi, yantsil nich'on ti Betuele. Ti Betuel taje, ja' yol ti Milcae, yantsil nich'on ti Nacor ti ja' xchi'il ta voq'uel ti Abrahame. 16Ti Rebecae, toj c'upil sba. Ja' jech xtoc tojol tseb to. Mu'yuc to yiloj vinic. Yal batel ta joc'. Laj snojes ti sq'uibe. Bat xa ox 17c'alal ti jtunele, bat sta ta be ta anil ti xi laj yalbee:

—Avocoluc, ac'bun jutebuc vo' cuch' ti oy ta avuni q'uibe.

18—Uch'an, juntot —xi laj stac'.

Spetoj ti sq'uib laj yac'be yuch' ti vo'e. 19C'alal laj yo'nton ta yuch'el vo' ti jtunele, ti Rebecae xi laj yale:

—Ja' jech xtoc ta xquean talel vo' ta sventa ti acamellotaque yo' ta xuch'ic ti bu c'alal x'ech' ti yo'ntonique.

20Ta ora no'ox, laj sq'ueb comel ti ya'lel sq'uib ta jomte'e. Ep ta velta laj yean talel ti vo' ta joq'ue, ja' to ti c'uxi laj yuch' vo' yu'un scotol ti camelloetique. 21Ti jtunele sq'uel no'ox. Mu'yuc c'usi laj yal. Yu'un ta sc'an ta sna' mi ja' c'ot ta pasel ti c'usi laj sc'anbe ti Diose yo' jech lec ta sta ti bu tacbil talele. 22C'alal laj yuch'ic vo' ti camelloetique, jech ti jtunele laj sloq'ues talel jun xot-xot oro ti yich'oje, vaquib (6) gramo ti yalale. Laj sjoc'anbe ta sni' ti tsebe. Ja' jech xtoc laj yac'be chib xoj nuc' c'obal ti ja' oroe, ti yich'oj vo'vinic (100) gramo ti yalele. 23Va'i un, xi laj yalbee:

—Avocoluc, albun ca'i, buch'u yantsil nich'onot. Ja' jech xtoc, albun ca'i mi xocol sna atot yo' jech ta x'ech' cu'uncutic ti ac'ubal xchi'uc ti jchi'iltaque.

24Ti tsebe xi laj staq'ue:

—Ja' yantsil nich'onun ti Betuele, squeremic ti Nacore xchi'uc ti Milcae. 25Ti bu nacaluncutique, xocol jnacutic ti bu xu' ta x'ech' avu'unic ti ac'ubaltique, xchi'uc oy ep jobel slo' acamellotac tey.

26Jech ti jtunele laj squejan sba ta yich'el ta muc' ti Diose. 27Xi lic yale: “Lequil c'optabiluc ti Ajvalile, Dios yu'un ti cajval Abrahame, yu'un xc'ot xc'opoj, oy slequil yo'nton ta stojol ti cajvale. Yu'un laj stojobtasun talel ta sbelel sna ti yuts' yalaltaque.”

28Ti Rebecae bat ta anil ta sna, c'ot yalbe ya'i sme' scotol ti c'usi c'ot ta pasele. 29Ti tsebe oy jun xchi'il ta voq'uel ti Labán sbie. Jech ti stuque bat sq'uel ta anil c'alal laj ya'i oy ta joc' ti vinique. 30Yu'un laj yil ti anilloe xchi'uc ti xoj nuc' c'obal xojol batel ta sc'ob ti xchi'il ta voq'uele, xchi'uc laj ya'i ti c'ot xchap ti c'usi laj yal ti jtunele. Ja' yu'un un, ti Labane nopaj batel ta stojol yajtunel ti Abrahame, yu'un tey to oy ta sts'el joc' xchi'uc ti scamellotaque. 31Ja' yu'un un, xi c'ot yalbee:

—Xnich'on Dios, la', batic ta jna. ¡Mu smeloluc ta xacomic ta osiltic ti c'alal laj xa jch'uba ti jnae, ti oy xa bu xu' ta xvayic ti acamellotac cu'une!

32Jech ti jtunele bat ti bu oy ti nae. Jech ti Labane lic syalesbe yicats ti camelloetique, laj yac'anbe sve'el. Ts'acal to un, laj yich' talel vo' yo' jech ta spoc yacan ti jtunele xchi'uc ti xchi'iltaque.

33C'alal ta xa x'aq'ue ve'icuque, yajtunel ti Abrahame xi lic yale:

—Mu smeloluc ti ba'yel ta xive'cutic c'alal mu'yuc to calojcutic ti c'usi yatel co'ntoncutic talele.

—Alo ca'itic un cha'e —xi ti Labane.

34Va'i un, ti jtunele xi lic yale:

—Vu'un yajtunelun ti Abrahame. 35Yu'un ti cajvale, xi s'elan ep sva'anoj sba ti Dios ta stojolal ti pasem ta jc'uleje: Ac'bil ep xchij, xvacax, oro, plata taq'uin, xchi'uc ep mosovil viniquetic, antsetic. Oy ep scamellotac, sburrotac xtoc. 36Ma'uc no'ox taje, ja' jech xtoc, ti Sarae, yajnil ti cajvale, ta syayilal xa laj yil jun yol ti xnich'on ti cajvale. Jech ti cajval une laj xa yac'be ta yoc ta sc'ob xnich'on scotol ti c'usi x'ayan yu'une. 37Ja' yu'un un, ti cajvale laj yich'bun ta rextico ti xi laj yalbune: ‘Alo ta jamal ti mu xavac' ave ati' ta xic' junuc tseb ti jnich'on li' ta Canaán banomil bu nacalune. 38Ja' lec, batan bu nacalic yuts' yalal ti jtote. Ti ta scotol ti antsetic ti ja' jnamtal nitilultaque, t'ujbun loq'uel talel junuc yajnil ti jquereme.’ 39Va'i un, ti vu'une xichi laj cale: ‘Yojtot, mi mu xch'un iq'uel talel ti tseb une, ¿c'usi ta jpas?’ 40Va'i un, ti stuque xi laj stac'bune: ‘Nabalun ta spasel ti c'usi ta sc'an ti Diose. Ta stacbot talel junuc yaj'ánjel ta atojol yo' jamal lec abe axaneb bu ta xac'ot, yo' jech ta xat'ujbe talel junuc yajnil ti jquerem ta stojol scotol ti antsetic ti ja' jnamtal uts' alaltaque. Ti lec xcaltique, yuts' yalaltac ti jtote. 41Xcaltic no'ox, mi ja' mu xayac'beic talel ta c'abal stseb ti cuts' calaltaque, ma'uc xa amul ta xc'ot ti laj ava'an ta rexticoe.’

42“Ja' yu'un un, nax c'alal livul ta joc' eque, xi lic c'opoj ti'incun ta stojol ti Ajvalil Dios yu'un ti cajval Abrahame: ‘Mi melel ta xac'an lec ta xc'ot ta jtojol ti lital li'e, 43ti li' oyun ta sts'el ti joq'ue, xi s'elan ta jc'an ta xc'ot ta pasele: Ti tseb buch'u xi ta xcalbe c'alal ta xtal slup vo'e: Avocoluc, ac'bun jutebuc vo' cuch' oy ta avuni q'uibe, 44mi xi ta stac'bune: Uch'an ava'i, ja' jech xtoc, ta xquean loq'uel talel vo' yo' ta xuch' ti acamellotaque, mi xiyute, ja'uc me ti tseb t'ujbil avu'une, Dios, yo' jech ta xic' squerem ti cajvale.’ 45Naca to jyaquil ta c'opojel ti'inel, c'alal ja' o laj quil ti scajanoj batel ta snequeb sq'uib ti Rebecae, ti yal batel ta slupel vo' ta joq'ue. Va'i un, xichi laj calbee: ‘Ac'bun jutebuc ava'al cuch', avocoluc.’ 46Jech ti stuque laj syales ta anil ti sq'uibe, xi laj yalbun une: ‘Uch'an ava'i. Ja' jech xtoc ta xcac'be yuch' vo' ti acamellotaque.’ Ja' yu'un un, laj yac'bun cuch' ti vo'e, xchi'uc xtoc laj yac'be yuch' vo' ti jcamellotaque. 47Laj taj une, xichi lic jac'bee: ‘¿Buch'u yantsil nich'onot?’ Xi laj stac'bune: ‘Yantsil nich'onun ti Betuele, squeremic ti Nacore xchi'uc ti Milcae.’ Va'i un, laj joc'anbe ta sni' ti xot-xot taq'uine, xchi'uc laj jxojbe ti xoj nuc' c'obale. 48Laj jquejan jba ta yalbel vocol ti Diose. Yu'un laj quich' ta muc' ti Ajvalil Dios yu'un ti cajval Abrahame, ti laj stojobtasun ta bee yo' jech ta xquic' batel stseb yuts' yalaltac ti cajvale, yo' ta xic' ti xnich'one. 49Avi tana un, albeicun ca'i, ¿c'uxi ta xc'ot ta t'ujel ta nopel avu'unic? ¿Mi oy smoton xc'uxubinel avu'unic ti cajvale? Yan ti mi mu'yuc une, albeicun ca'i xtoc un yo' ta jna' c'uxi xu' ta jpas.”

50Va'i un, ti Labane xchi'uc ti Betuele xi laj staq'uique:

—Taje, liquem talel scotol ta stojol ti Diose. Ja' yu'un un, mu xu' ta xcalcutic ava'i ti xu'e, ti mo'oje. 51A'yio ava'i, li' oy ti Rebecae, ic'o batel, batanic. Ac'o yajnilin ti xnich'on avajvale jech c'u cha'al nopbil yu'un ti Diose.

52C'alal jech laj ya'i yajtunel ti Abraham ti va'i s'elan ti c'ope, snupilan xa banomil laj spatan sba ta lum ta stojol ti Diose. 53Ts'acal to un, laj sloq'uesan talel ep ta tos c'usitic meltsanbil ta oro, ta plata, xchi'uc c'u'iletic xtoc. Laj yac'be jelavel ti Rebecae. Jech xtoc ti xchi'il ta voq'uele, ti sme'e, laj yich'ic smotonic ec. 54C'alal laj yo'ntone, ja' o lic ve'icuc, uch'ubajicuc xchi'uc ti xchi'iltaque. Ech' yu'unic ac'ubal ti bu taje. Ta yoc'omal c'alal liquique, xi laj yal ti jtunele:

—Ac'o ave ati'ic un ti xu' ta xibatcutic ta sna ti cajvale.

55Jech ti xchi'il ta voq'uele xchi'uc sme' ti Rebecae, xi laj yalique:

—Ac'o to comuc lajunebuc c'ac'al ti tsebe. Ts'acal to un, xu' xaviq'uic batel.

56Va'i un, ti jtunele xi laj yale:

—Mu xa xapajtsanuncutic. Yu'un ti Diose, lec xa c'ot ta pasel ti laj yac'bun talel jbe jxanebcutique. Ja' yu'un un, ac'o xa ave'ic ati'ic ti xu' ta xisutcutic batel ta sna ti cajvale.

57Va'i un, xi laj yal ti stuquique:

—Quic'tic talel ti tsebe. Ca'itic c'usi ta xal.

58Laj yiq'uic talel ti Rebecae, ti xi laj sjac'beique:

—¿Mi xu' ta xachi'in batel ti jtunel li'e?

—Tana —xi laj stac' ti stuque.

59Va'i un, laj yaq'uic batuc ti Rebecae xchi'uc jun ants ti ja' yajts'itesvaneje. Batic xtoc yajtunel ti Abrahame xchi'uc ti xchi'iltaque. 60Xi s'elan spatobil yo'nton laj yalbeic batel ti Rebeca:

“Ti vo'ote, jchi'il ta voq'uel,

me'ilucot c'otan yu'un ep ta millon.

Cuchuc yu'unic ta yu'ninel slumalic yajcontraic ti anitilultaque.”

61Ja' yu'un un, ti Rebecae xchi'uc ti sme' mosove, cajiic batel ta camello. Ts'acalic batel ta spat yajtunel ti Abrahame. Ja' jech c'ot ta pasel laj yic' loq'uel Rebeca ti jtunele.

62Ti Isaaque naca sut talel ta joc' ti sbiinoj “ti Buch'u cuxul xiyilune”, yu'un nacal ta yosilal Néguev. 63Yu'un mal xa c'ac'al, loc' batel ta paxyal. Va'i un, ja' o laj yil ta xnopaj talel ti camelloetique. 64Jech ti Rebeca eque, ja' o laj stoy batel sat. C'alal laj sta ta ilel ti Isaaque, yal ta camello. 65Va'i un, xi lic sjac'be ti jtunele:

—¿Buch'u ti vinic le' xtal ta stenlej ti tuc' ta xtal ta jtojoltique?

—Ja' ti cajvale —xi laj stac' ti jtunele.

Jech ti stuque lic smac sat ta chajal poc'.

66Ti jtunele lic yalbe ya'i ti Isaac scotol ti c'usi laj spase. 67Laj taj une, ti Isaaque laj yic' batel ti Rebeca bu oy sna ti Sara ti ja' sme'e. Laj yic' sbaic xchi'uc ti tsebe. Ti Isaaque, snup xa xch'ulel laj ya'i ti Rebecae. Ja' to jech c'ot ta ch'ayel sme'inalil ti anima sme'e.

Currently Selected:

Génesis 24: TZC00

Highlight

Copy