Génesis 25

Xnich'nabtac ti Abraham ti laj yilic xchi'uc ti Ceturae

(1 Cr 1.32-33)

1Ti Abrahame laj to sa' yan yajnil, Cetura sbi. 2Ti sbitac ti xnich'nab laj yilic xchi'uque, ti Zimrame, ti Jocsane, ti Medane, ti Madiane, ti Isbaque, ti Súae. 3Ti Sebae xchi'uc ti Dedane, ja' stotic ti Jocsane. Snitilultac ti Dedane, ja' ti asuereoetique, ti letuseoetique, ti leumeoetique. 4Xnich'nabtac ti Madiane, ja' ti Efae, ti Efere, ti Hanoque, ti Abidae, xchi'uc ti Eldaae. Scotolic taje, ja' snitilultac ti Ceturae. 5Ti Isaaque ja' laj stsob comel scotol ta rextoinel ti c'usi oy yu'un ti Abrahame. 6Ja'uc xnich'nabtac ti Abraham ta sventa ti yan ants yu'une, ja' no'ox laj sq'uelanbe smotontac. C'alal cuxul to ox ti Abrahame, laj xch'ac loq'uel ti xnich'nabtac ta stojol ti Isaaque. Yu'un laj stacanan batel ta osil ti oy ta sloq'ueb c'ac'ale.

Cham ti Abrahame, laj yich' muquel

7Ti Abrahame ch'i c'opoj vo'lajuneb sbalunvinic (175) jabil ta scotol. 8Mol xa cham, lequil chamel laj ya'i. Yu'un bat stsob sbaic xchi'uc ti smolmuc'totaque. 9Bat mucatuc ta jombil muquinal ti oy ta Macpelae, ta stuq'uil sloq'ueb c'ac'al ti oy ta Mamree, yosil ti Efrone, xnich'on ti Zohar ti hititae. Yu'un laj yich' muquel yu'un ti Isaaque xchi'uc ti Ismael ti ja' xnich'nabe. 10Ti banomil taje, ja' ti laj smanbe ta stojol ti hititaetic#Gn 23.3-16. ti Abrahame. Ti bu taje, laj yich' muquel ti Abraham ti bu mucul ti Sara ti ja' yajnile. 11C'alal cham xa ox ti Abrahame, jech ti Diose lic sva'an sba ta stojol ti Isaaque, ti nacal com ta sts'el joc' ti jech sbie, “Sjoc' ti Buch'u cuxul yilojune”.

Snitilultac ti Ismaele

(1 Cr 1.28-31)

12Li'e, ja' xnich'nabtac ti Ismael ti ja' xnich'on ti Abrahame, yol ti egipcioal ants Agare, smosov xtoc ti Sarae. 13Ti c'u s'elan xcholet laj voq'uicuc talele, jech c'u cha'al li'e: ti Nebaiote ti ja' sbanquilal nich'onile. Tal no'ox xtoc un ti Cedare, ti Adbeele, ti Mibsame, 14ti Mismae, ti Dumae, ti Masae, 15ti Hadare, ti Temae, ti Jeture, ti Nafise, ti Cedemae. 16Taje, ja' sbiic ti lajcha'vo' xnich'nab Ismaele. Xchi'uc xtoc, ja' jech ojtiquinbil c'ot sbi slumalic ti jujunique, xchi'uc ti jujuchop ti svoloj sbaique. Yu'un ti jujunique, c'otemic ta jtsobvaneje yu'un ti xchi'ilique.

17Ti Ismaele yich'oj xa vuclajuneb yucvinic (137) jabil c'alal chame. Bat xchi'in ti smolmuc'totaque. 18Jech ti snitilultaque bat nacliicuc ti oy ta o'lol Havila banomil xchi'uc ti Shure, ti oy ta yeloval Egipto ta sbelal Asiriae. Ti bu taje, lic naquiicuc manchuc mi chopol x'a'yiatic yu'un ti xchi'iltaque.

Ta xvoq'uic ti Jacobe, ti Esaue

19Li'e, ja' sc'oplal ya'yejal ti Isaac xnich'on ti Abrahame. 20Ti Isaaque yich'oj xa cha'vinic (40) jabil c'alal laj yic' ti Rebeca xchi'il ta voq'uel ti Labane, yantsil nich'on ti Betuele, ti ja'ic arameoetic nacalic ta Padán-arame. 21Ti Rebecae mi ja'uc x'alaj. Jech o xal ti Isaaque laj sc'anbe vocol Dios ta sventa ti yajnile. A'yibat yu'un Dios ti sc'opojel sti'inele. Jech ti Rebecae lic xchi'in ti yole. 22C'u stu un, ti uni vachetique xvujetic no'ox ta spas sbaic ti oy ta ch'utile. Va'i un, xi laj snope: “Mi ja' jech ta xc'ot ta pasel ti va'i s'elan taje, ¿c'usi xa xtun o ti li' cuxulune?” Ja' yu'un un, lic sjac'be Dios ti c'u cha'ale. 23Va'i un, xi tac'bate:

“Ti olol achi'inoj toe, chib muc'tiquil lum,

chib lum ta scontrain sbaic ti jech mu to voq'uemique.

Ti june ech'em tsots xu' yu'un,

ja'uc ti june mu sta xu' yu'un,

yu'un ti banquilale mosovinbil ta xc'ot yu'un ti its'inale.”#Ro 9.12.

24Sta yorail ta svoq'ues yol ti Rebecae, uni vach laj yilbe sat. 25Ti ba'yel voc' talele, c'an xican stsotsil sjunlej. Jech o xal laj yac'beic sbi Esaú. 26Voc' no'ox talel xtoc ti its'inale, stsacojbe snuc yoc ti Esaue. Ja' yu'un un, Jacob, laj yac'beic sbi. Ti Isaaque yich'oj xa ox oxvinic (60) jabil c'alal voc' yol ti Rebecae.

Ti Esaue laj sjel ti c'usi albil sc'oplal ta x'ac'bate

27Ti ololetique ch'iic. Ti Esaue, banquilal jnutsuvil xa'i sba, yabtel ti paxyal ta te'tique. Yan ti Jacobe xlajet no'ox xa'i sba, lec ta xa'i ti tey no'ox xtiq'uet ta snae. 28Jech ti Isaaque syalesoj xc'uxul ta stojol ti Esaue, ja' ti ta sta ta lajesel ti c'usi ta sta ta nutsele. Yan ti Rebecae syalesoj xc'uxul ta stojol ti Jacobe.

29Oy jun c'ac'al un, ti Jacobe ja' o yacal ta spas sve'el c'alal ja' o lubem xa sut talel ta nutsuvil ti Esaue. 30Va'i un, xi laj yalbee:

—Avocoluc, ac'bun jutebuc ave'el ti lec chac'olan xa meltsajem avu'un le'e, yu'un chamal vi'nalun xa talel.

(Jech o xal un, ojtiquinbil c'ot ta Edom#Ti biil Edome, “ja' tsoj”, xi ta xal ti ta hebreo c'ope. ti Esaue.)

31Xi laj yal ti Jacobe:

—Ti xcaltique, jeltic o xchi'uc ti c'usi albil sc'oplal ta xa'ac'bat ti jech banquilal nich'onilote.

32Va'i un, xi laj yal ti Esaue:

—Xvinaj xa ti chamal vi'nalun ta q'uelele. Jech ti c'usi ta xquich' ti jech banquilal nich'onilune, mu'yuc c'usi stu o cu'un.

33—Jamal albun avi une mi ta xavac'bune —xi liquel ti Jacobe.

Jamal laj yal ti Esaue. Ja' jech laj yac' jelavel ta stojol Jacob ti c'usi albil sc'oplal ta xich' ti jech banquilal nich'onile.#Heb 12.16. 34Va'i un, ti Jacobe lic yac'be pan xchi'uc toc'on chenec' ti Esaue. C'alal laj yo'nton ta ve'el uch'ubajel ti Esaue, loc' batel. Mi ja'uc tsots sc'oplal laj ya'i ti c'usi oy sc'oplal ta xich' ti jech banquilal nich'onile.

Currently Selected:

Génesis 25: TZC00

Highlight

Copy